تاراز يننوۆاسيالىق-گۋمانيتارلىق ۋنيۆەرسيتەتىندە «قازستين» رمك جامبىل وبلىستىق فيليالى مەن تەحينكالىق رەتتەۋ جانە مەترولوگيا كوميتەتى وبلىستىق دەپارتامەنتىنىڭ ۇيىمداستىرۋىمەن سالاداعى جۇمىستى ىلگەرىلەتۋگە باعىتتالعان دوڭگەلەك ۇستەل وتىرىسى ءوتتى.

جيىنعا ءوڭىردىڭ بيزنەس قاۋىمداستىقتارىنىڭ وكىلدەرى قاتىسىپ، حالىقارالىق ستاندارتتاۋ، ساپالى ءبىلىم بەرۋ جولدارى بويىنشا پىكىر الماستى. ق ر يندۋستريا جانە ينفراقۇرىلىمدىق دامۋ مينيسترلىگى تەحنيكالىق رەتتەۋ جانە مەترولوگيا كوميتەتىنىڭ جامبىل وبلىسى بويىنشا دەپارتامەنتىنىڭ باسشىسى ءاليا احمەتوۆا ءوز العى سوزىندە بۇگىنگى قوعامعا ستاندارتتاۋ اۋاداي قاجەت ەكەنىن العا تارتىپ، اسىرەسە ەكونوميكا، ونەركاسىپ، ساۋدا، وزگە دە تۇتىنۋشىلارعا ءونىم ۇسىنىپ جۇرگەن كاسىپورىندار ناقتى پارامەترلەرگە ساي بولۋى قاجەتتىگىن جەتكىزدى. ال «قازاقستان ستاندارتتاۋ جانە سەرتيفيكاتتاۋ ينستيتۋتى» رەسپۋبليكالىق مەملەكەتتىك كاسىپورنى وبلىستىق فيليالىنىڭ ديرەكتورى اسقار مىڭبايەۆ «بەينەدەگى ستاندارتتار الەمدىك ارەنانى جاسايدى» تاقىرىبىندا بايانداما جاساپ، ستاندارت – بۇل كورسەتكىشتەردى ورناتىپ جۇيەلەيتىن قۇجات، دەمەك تالاپتار مەن كورسەتكىشتەر جوعارى بولعان سايىن ساپالى دا ءقاۋىپسىز ءونىم بولاتىنىن تىلگە تيەك ەتتى.

– قاتاڭ باسەكەلكتىك جاعدايىندا كوپتەگەن كاسىپورىندار نارىقتا ءوز ۇستانىمدارىن ورناتىپ قانا قويماي، يسو ستاندارتتارىن قولدانا وتىرىپ ساپالى دامۋدىڭ جاڭا بەلەستەرىنە دە وتەدى. يسو حالىقارالىق ستاندارتتاردى دايىنداۋمەن جانە جاريالاۋمەن اينالىساتىن الەمدەگى ەڭ ءىرى ۇيىمداردىڭ ءبىرى بولىپ تابىلادى. ول 163 ەلدىڭ ستاندارتتاۋ جونىندەگى ۇلتتىق ستاندارتتار جۇيەسىن بىرىكتىرەدى. قازىرگى تاڭدا يسو ستاندارتتارى الەمنىڭ بارلىق ەكونوميكالىق دامىعان مەملەكەتتەرىندە ساپا سالاسىندا ەنگىزىلگەن. ولاردىڭ نەگىزگى تۇجىرىمدامالارى ۇيىمداردىڭ ساپاسىن باسقارۋ جۇيەسىنە تالاپتار مەن ۇسىنىمدارعا قورىتىندىلانادى. يسو مودەلىنىڭ نەگىزگى ءبىر ەرەكشكلىكتەرىنىڭ ءبىرى امبەبەپتىعىمەن دە تۇجىرىمدالادى: مىسالى ستاندارتتار ناقتى ءبىر ونىمگە/قىزمەتكە ەمەس جالپى باسشىلىققا باعىتتالعان، ولاردىڭ سالاسىنا قاراماستان كەز كەلگەن ۇيىمداردا قولدانۋعا بولادى، – دەدى اسقار قۇرمان ۇلى.

سونداي-اق باسقوسۋدا تيگۋ «ستاندارتتاۋ جانە ۆەتەريناريالىق سانيتاريا» كافەدراسىنىڭ مەڭگەرۋشىسى پەرنەكۇل ماليكايەۆا اتالعان سالا بويىنشا ساپالى ءبىلىم بەرۋ جولىنداعى ىزدەنىستەرى مەن ستۋدەنتتەردىڭ بۇگىنگى الىپ جاتقان ءبىلىم جۇيەسىنە كەڭىنەن توقتالدى. تيگۋ ستۋدەنتتەرى مەن م.ح.دۋلاتي اتىنداعى تارمۋ ستۋدەنتتەرى اراسىندا «ستاندارتتاۋ سالاسىنداعى جاستاردىڭ ءرولى» تاقىرىبى بويىنشا پىكىر سايىستىرىپ، وزىندىك ويلارىن ورتاعا سالدى.

شارا سوڭىندا ستاندارتتاۋدا جانە وزدەرى وندىرەتىن ءونىمنىڭ نورماتيۆتىك بازاسىن قالىپتاستىرۋعا ەلەۋلى ۇلەس قوسقاندارى ءۇشىن «قازفوسفات» ج ش س، «پكف «فان» ج ش س، «ۋچەبنىي سەنتر «ەكسپەرت» ج ش س، «گسسيم «Zhambyl Standart» ج ش س جانە «ناسەكس» اق ەف «قازستين» رەسپۋبليكالىق مەملەكەتتىك كاسىپورنى العىس حاتتارىمەن ماراپاتتالدى.