قوعامداعى وزەكتى ماسەلەنىڭ استارىنا ءۇڭىلىپ ولاردى شەشۋ ىسىندە ۇكىمەتتىك ەمەس ۇيىمداردىڭ كومەگى كولدەي. ءوز كەزەگىندە بۇل ۇيىمدار ءوز قىزمەتتەرىن مەملەكەتتىك الەۋمەتتىك تاپسىرىس شەڭبەرىندە ىسكە اسىراتىنى بەلگىلى. وسى ماقساتتا جامبىل وبلىسىندا مەملەكەتتىك الەۋمەتتىك جوبالاردىڭ تيىمدىلىگىن ارتتىرىپ، ولارعا بولىنگەن قارجى كولەمى ەكى اسا ارتتىرىلىپ، ولاردى ماقساتتى پايدالانۋ ىسىنە باسىمدىق بەرىلۋدە، دەپ جازادى Qamshy.kz اقپارات اگەنتتىگى. 

بيىل وڭىردە مەملەكەتتىك الەۋمەتتىك تاپسىرىسقا 890 ميلليون تەڭگە قارجى قاراستىرىلىپ، وعان 198 الەۋمەتتىك جوبانى ىسكە اسىرۋ جوسپارلانعان. الەۋمەتتىك تاپسىرىس جوبالارىنىڭ ناتيجەلىلىگى مەن تيىمدىلىگىن ارتتىرۋ ماقساتىندا بۇل سەكتوردى قارجىلاندىرۋ كولەمى وتكەن جىلمەن سالىستىرعاندا 74،6 ميلليون تەڭگەگە دەيىن ارتتى. ىسكە اسىرىلۋى جوسپارلانعان مەملەكەتتىك الەۋمەتتىك تاپسىرىس كولەمىنىڭ 79،4 پايىزى جۇمىسپەن قامتۋدى ۇيلەستىرۋ جانە الەۋمەتتىك باعدارلامالار باسقارماسى مەن بولىمدەر جانە حالىقتى جۇمىسپەن قامتۋ ورتالىقتارى تاراپىنان بولىنگەن. ويتكەنى بۇل باسقارما وڭىردەگى ارناۋلى الەۋمەتتىك قىزمەتتەر كورسەتۋ، ينۆاتاكسي قىزمەتىن ۇيىمداستىرۋ، پروباسيا قىزمەتتەرىن مەملەكەتتىك الەۋمەتتىك تاپسىرىس نەگىزىندە جۇزەگە اسىرادى.

بۇگىندە وڭىردەگى مۇددەلى مەملەكەتتىك مەكەمەلەرمەن مەملەكەتتىك الەۋمەتتىك تاپسىرىس شەڭبەرىندە الەۋمەتتىك جوبالار سانىن قىسقارتىپ، مەيلىنشە باسەكەگە قابىلەتتى جوبالاردى ساپالى ىسكە اسىرۋعا باسىمدىق بەرىلىپ وتىر.

بيىل جوبالاردىڭ قاتارى سىبايلاس جەمقورلىققا قارسى مادەنيەت قالىپتاستىرۋ، مەكەمەلەر جۇمىسىنداعى اشىقتىقتى قامتاماسىز ەتۋدە «جامبىل - ادالدىق الاڭى» جوباسى تىزىلىمگە قوسىلدى. جوبانى ىسكە اسىرۋعا 7 ميلليون 400 مىڭ تەڭگە قارجى ءبولىندى. سونداي-اق، قوعامداعى ەڭ وزەكتى ماسەلە سانالاتىن كوپ بالالى انالاردى قولداۋدىڭ الەۋمەتتىك جوباسى دا قولعا الىنباق. كوپ بالالى انالاردى قولداۋدى ماقسات ەتكەن جوبا «قوسىمشا كاسىپكە ۇيرەتۋ ارقىلى حالىقتىڭ وسال توپتارىن قولداۋ» دەپ اتالادى. جوبا بارىسىندا 70 ايەلدى كاسىپكەرلىك داعدىلارىنا باۋلىپ، ولاردىڭ كەم دەگەندە 20-سىن تۇراقتى جۇمىسقا ورنالاستىرۋ مەجەلەنىپ وتىر.

اعىمداعى جىلى وبلىستا مەملەكەتتىك الەۋمەتتىك تاپسىرىسقا 48 بيۋدجەتتىك باعدارلامادان قارجى قاراستىرىلعان. مۇندا وبلىس اكىمدىگىنە قاراستى 9 باسقارما جانە قالا، اۋدان اكىمدىكتەرىنە قاراستى 32 ءبولىم، 7 حالىقتى جۇمىسپەن قامتۋ ورتالىعى بار.