ەلباسىنىڭ «بولاشاققا باعدار: رۋحاني جاڭعىرۋ» اتتى باعدارلامالىق ماقالاسى اياسىندا اتقارىلىپ جاتقان تىرلىكتەر از ەمەس. بۇل ەڭ ءبىرىنشى ۇلتتىق رۋحتى وياتاتىن جوبا بولعاننان كەيىن جامبىل وبلىسى كولەمىندە جۇيەلى جۇماستاردىڭ بويىنا جان ۇرلەنۋدە. سونىڭ ءبىر پاراسى جۋالى اۋدانىندا دا كورىنىس تابۋدا، دەپ جازادى Qamshy.kz اقپارات اگەنتتىگى. وبلىستىق قوعامدىق فورۋمنىڭ ءساتتى جالعاسى بولىپ تابىلاتىن بۇل جيىننىڭ ماقساتى «ۇرپاعىمىز ازباسىن، جەرىمىز توزباسىن» دەگەن اسىل مۇراتتان تۋىپ وتىر. فورۋمدى قازاقستان جازۋشىلار جانە جۋرناليستەر وداقتارىنىڭ مۇشەسى، جۋرناليست-جازۋشى ماقۇلبەك رىسداۋلەت اشىپ، جۇرگىزىپ وتىردى.
اۋدان باسشىلارى مەن اۋدان اقساقالدارى، اۋىل اكىمدەرى، مەشىت يمامدارى، اسابالار مەن جاستار، ءىىب قىزمەتكەرلەرى، كاسىپكەرلەر قاتىسقان جيىندا بۇگىنگى تاڭداعى وزەكتى ماسەلەلەر قامتىلدى.
2019 جىلدىڭ 21 قىركۇيەك كۇنى جامبىل وبلىسىنىڭ اكىمى اسقار يسابەك ۇلى مىرزاحمەتوۆ وبلىس جۇرتشىلىعىنا ۇندەۋ جاريالاعان بولاتىن. اتالعان ۇندەۋمەن قاراساز اۋىلدىق وكرۋگىنىڭ ارداگەرلەر كەڭەسىنىڭ ءتوراعاسى ساعىندىق توقبەرگەنوۆ تانىستىردى. سونداي-اق، «ءدىني جورالعىلاردى جاساۋدا ىسىراپشىلدىققا جول بەرمەۋ» تاقىرىبىندا اۋداندىق «جۋالى» مەشىتىنىڭ باس يمامى مەدەتبەكوۆ سەيتقازى، «اقمەنتەي» قوعامدىق بىرلەستىگىنىڭ ءتوراعاسى، اۋدانىمىزدىڭ «قۇرمەتتى ازاماتى» امانجول ءدۇرالى ۇلى «بىرلىگىمىز – باسىمىزداعى باعىمىز» تاقىرىبىندا، ءبىلىم بەرۋ سالاسىنىڭ ارداگەرى داۋلەتجان بايدالييەۆ «تاربيە تال بەسىكتەن باستالادى» تاقىرىبىندا ءسوز قوزعاسا، اقساي اۋىلدىق وكرۋگىنىڭ ارداگەرلەر كەڭەسىنىڭ ءتوراعاسى كارىباي قۇرماشيەۆ توي مادەنيەتىن جاڭعىرتۋ ماسەلەسىن باسا ايتتى. جيىن بارىسىندا باۋىرجان مومىش ۇلى اۋىلىنىڭ انالار القاسىنىڭ ءتورايىمى جاڭاش سەرعازينا قىز تاربيەسىنىڭ ۇلت ءۇشىن ماڭىزدىلىعى تۋراسىندا ءسوز وربىتسە، اۋداندىق ءماسليحات حاتشىسى تىلەۋبەكوۆ ەرعالي وتەمىس ۇلى «ۇمىتىلماس ۇلاعات، ومىرلىك ونەگە قالدىرعان اتا-بابا اماناتىنا ادال بولۋ – ۇرپاق پارىزى. ەلدىكتى تۋ ەتكەن حالقىمىزدىڭ قادىر-قاسيەتى سوناۋ عاسىرلار قويناۋىنان تامىر تارتادى»-دەدى.
وبلىس اكىمىنىڭ ۇندەۋىن قولداپ، قۋاتتاۋ، ەلدىكتىڭ ەلگە بايلانىستى ەكەنىن حالىققا جەتكىزۋ ماقساتىنداعى فورۋمدى جۋالى اۋدانىنىڭ اكىمى ەرگەبەكوۆ نارباي ءابىلقاسىم ۇلى قورىتىندىلاپ، بۇل بىررەتتىك شارا ەمەس، ناقتى ورىنداۋدى قاجەت ەتەتىن ماسەلە ەكەنىن ەسكەرتتى.
پىكىر قالدىرۋ