–«رەسەيدەگى  ەلشىمىز يمانعالي نۇرعالي ۇلى تاسماعامبەتوۆكە ريزاشىلىعىمدى بىلدىرەمىن. جازۋشى ءۇشىن شىعارماشىلىقتىڭ باعالانۋىنان اسقان قۋانىش جوق شىعار». بۇل تۋرالى جازۋشى –دراماتۋرگ Roza Mukanova ءوزىنىڭ فەيسبۋك پاراقشاسىندا ءمالىم ەتتى.

ال تاسماعامبەتوۆتى تاڭقالدىرعان نە؟ ەڭ الدىمەن اقىن فاريزاعا دەگەن قۇرمەت بولسا، ەكىنشىدەن اقىن بولمىسىن قاز قالپىندا بوياماسىز سۋرەتتەگەن جازۋشى روزا مۇقانوۆاعا ايتىلعان ريزاشىلىق سەزىم بولسا كەرەك..

«شىنشىل دا سىرشىل ولەڭدەرىمەن جۇرتتىڭ جۇرەگىنە جول تاپقان، ادالدىعى مەن اقىندىعى تەڭ تۇسەتىن، قايسار دا قايتالانباس تالانت  يەسى – فاريزا وڭعارسىنوۆانىڭ ءومىرى مەن ولەڭى تۋرالى ءسىز جازعان پەسا رەسەي استاناسىنىڭ تالعامپاز كورەرمەندەرىنە ەرەكشە اسەر قالدىرىپ، ەڭ جوعارى باعاسىن الدى»، –دەلىنگەن ەلشى جازعان حاتتا.

وسىدان بىرەر اي بۇرىن - دراماتۋرگ  روزا مۇقانوۆانىڭ «فاريزا» سپەكتاكلى يمانعالي تاسماعامبەتوۆتىڭ باستاماسىمەن ماسكەۋدىڭ «سوۆرەمەننيك» تەاترىندا كورەرمەندەرگە ۇسىنىلعانى بەلگىلى.

ەسكەرتە كەتەيىك، سونىمەن قاتار، الماتى مەن نۇر-سۇلتان قالالارىندا، «فاريزا» سپەكتاكلى زور تابىسپەن وتكەندىگىن ايتا كەتەيىك.

قويىلىم يدەياسىنىڭ اۆتورى – اينۇر كوپباساروۆا.  

فاريزانىڭ ءرولىن سومداعان اكتريسا – نازگۇل قارابالينا

مۋزىكاسىن جازعان – رينات گايسين.

سپەكتاكلدى قويعان  جاس رەجيسسەر – فارحات مولداعالي.