جامبىل وبلىسىنىڭ 80 جىلدىعىنا وراي تاراز قالاسىندا كەنەن ازىربايەۆ ەسكەرتكىشىنىڭ اشىلۋ سالتاناتى ءوتتى. قازاقتىڭ ايگىلى حالىق اقىنى، ءانشى، كومپوزيتور، قازاقستاننىڭ ەڭبەك سىڭىرگەن ونەر قايراتكەرىنىڭ ەسكەرتكىشى «بالاساعۇن» ورتالىق كونسەرت زالى عيماراتىنىڭ الدىنا ورناتىلعان.
كەنەن ازىربايەۆ — قازاق ونەرىندەگى سال-سەرىلىك جانە ايتىسكەرلىك داستۇرلەردى ۇزبەي، حح عاسىردىڭ 70-جىلدارىنا دەيىن جەتكىزگەن ونەرپاز. داستان جانرىن جاستايىنان جىرلاعان. قازاق حالقىنىڭ ايتىس ونەرىنىڭ ناسيحاتشىسى. 150-دەي ءان تولعاپ، اندەرى حالىق ءسۇيىپ ايتاتىن ماڭگىلىك رۋحاني قازىناعا اينالدى. كەنەن ازىربايەۆقا بيىل 135 جىل.
كەنەن ازىربايەۆ ەسكەرتكىشىن اشۋ قۇرمەتى قازاقستاننىڭ ەڭبەك سىڭىرگەن مادەنيەت قىزمەتكەرى، كۇيشى-كومپوزيتور ءابدىمومىن جەلدىبايەۆ، قازاقستاننىڭ ەڭبەك سىڭىرگەن قايراتكەرى مارال ىسقاقباي جانە كەنەن اتامىزدىڭ ۇرپاعى مۇرات كەنەنوۆكە بۇيىردى.
سالتاناتتى شاراعا ارنايى قاتىسقان ايماق باسشىسى اسقار مىرزاحمەتوۆ پەن وبلىستىق ءماسليحاتتىڭ حاتشىسى باعلان قاراشولاقوۆ بارشا جامبىلدىقتار اتىنان ەسكەرتكىشكە گۇل شوقتارىن قويدى. بۇدان سوڭ قوناقتار قورداي اۋداندىق ك.ازىربايەۆ ادەبي-مەموريالدىق مۋزەيى ازىرلەگەن كورمەنى تاماشالادى.
ەسكە سالا كەتەيىك، جىر الىبى – جامبىلدىڭ جانىندا جارتى عاسىر ۋاقىت ءجۇرىپ قازاق اۋىز ادەبيەتىنىڭ مول مۇراسىمەن قانىققان كەنەن اتى ۇلت مادەنيەتى تاريحىندا التىن ارىپپەن جازىلعان ەسىم سانالادى. وتكەن جىلى جىر ءدۇلد ۇلىنىڭ ەسىمى وبلىستىق فيلارمونياعا بەرىلگەن بولاتىن. سوندىقتان دا ونىڭ ەسكەرتكىشى ءدال وسى وبلىستىق فيلارمونيا قونىستانعان «بالاساعۇن» ورتالىق كونسەرت زالىنىڭ الدىنا قويىلۋى وتە ۇتىمدى ۇسىنىس بولىپ وتىر. دەمەۋشىلەر قاراجاتى ەسەبىنەن سالىنعان تاس ءمۇسىندى ءمۇسىنشى كولجىگىت تەمىرحان ازىرلەگەن.
پىكىر قالدىرۋ