ليۋكا انچەسكي – گلازگو ۋنيۆەرسيتەتىنىڭ ورتالىق ازيانى زەرتتەۋ بويىنشا پروفەسسورى. جاقىندا ونىڭ "Analysing Kazakhstan's Foreign Policy. Regime neo-Eurasianism in the Nazarbaev era" ("قازاقستاننىڭ سىرتقى ساياساتىنا ساراپتاما. نازاربايەۆ داۋىرىندەگى نەوەۋرازياشىلدىق") اتتى كىتابى جارىق كورگەن. نۇرسۇلتان نازاربايەۆ قىزمەتىنەن كەتكەننەن كەيىنگى ءبىر جىلدا قازاقستاننىڭ ىشكى-سىرتقى ساياساتىنداعى وزگەرىستەر جونىندە ول ازاتتىق راديوسىنا بەرگەن سۇحباتىندا ايتتى.

ساراپشى پرەزيدەن ساياساتى كوپ جاعدايدا ساباقتاستىققا قۇرىلاتىنىن اتاپ ءوتتى.

– توقايەۆ ساياساتى مۇنىڭ الدىنداعى نازاربايەۆتىكىنەن بالەندەي وزگەشە بولادى دەپ ايتا المايمىن. كوپ جاعدايدا ساباقتاستىقتى كورەمىز. ءتىپتى ونىڭ ءسىز نازار اۋدارعان ەۋرازيا وداعىنا قارسى جاريا مالىمدەمەسى – كەلىسسوز تاكتيكاسىنىڭ ءبىر بولىگى. بۇدان جاسىرىن ءمان-ماعىنا ىزدەمەس ەدىم. ءتىپتى قىرىم [اننەكسياسىنا] اشىق قارسى شىعۋدان قاشۋدىڭ ءوزى دە – ەكەۋىنەن بىردەي قاشىقتىق ۇستاۋ ساياساتىنىڭ جالعاسى. رەسەي مەن قىتايدىڭ اراسىنداعى تەپە-تەڭدىك – وتە كۇردەلى ماسەلە. ۇكىمەت قاشىقتىقتى ساقتاۋ مىندەتىن وتە جاقسى ورىنداپ وتىر. ءبىراق بىردەي قاشىقتىق ۇستاۋ دەگەن – كوپۆەكتورلىق ەمەس. ۇلى دەرجاۆالارمەن بىردەي دەڭگەيدە قارىم-قاتىناستى ۇستاپ تۇرۋ دەگەن ولارمەن قويان-قولتىق دوستىق ورنادى دەگەندى بىلدىرمەيدى. مەنىڭشە، بيلىك "كوپۆەكتورلىق" دەگەندە قازاقستاننىڭ ۇسىنىستاردى قابىلداۋعا اشىق ەكەنىن مەڭزەسە كەرەك. ولار مۇنى كوپۆەكتورلىق دەگەن سوڭ ءبىز دە سولاي اتاۋعا داعدىلانىپ كەتكەنبىز، – دەدى ول.