قازاقستان ءدارىحانالارىندا ءبىر جىلدا ەڭ كوپ قىمباتتاعانى – انتيسەپتيكتەر، باعاسى 17 پايىزعا وسكەن. سونىمەن بىرگە ىستىق تۇسىرەتىن دارىلەر 8،5 پايىزعا قىمباتتاعان، دەپ حابارلاندى energyprom.kz زەرتتەۋىندە.

جالپى فارماسيەۆتيكالىق پرەپاراتتاردىڭ باعاسى ءبىر جىلدا 7 پايىزعا ارتقان.

"2020 جىلدىڭ ءقاڭتار-ساۋىر ايلارىندا قازاقستاننىڭ فارماسيەۆتيكالىق كومپانيالارى 41،9 ملرد تەڭگەنىڭ نەگىزگى فارماسيەۆتيكالىق ونىمدەرىن شىعاردى. بۇل – ءبىر جىل بۇرىنعى ۇقساس كەزەڭمەن سالىستىرعاندا 33،9 پايىزعا كوپ. ينفلياسيانى ەسەپكە العاندا شىنايى ءوسىم 24،2 پايىزعا تەڭەسكەن. سەكتورداعى ءوندىرىستىڭ تورتتەن ءۇش بولىگى (75،7%) ءۇش ايماقتا، اتاپ ايتقاندا، الماتى وبلىسىندا (11،6 ملرد تگ، ءبىر جىل ىشىندە +3،1%)، شىمكەنت قالاسىندا (11،4 ملرد تگ، ءبىر جىل ىشىندە +6،5%)، الماتى قالاسىندا (8،8 ملرد تگ، ءبىر جىل ىشىندە +39،3%) شوعىرلانعان" دەلىنگەن زەرتتەۋدە.

جالپى دارى-دارمەك ءوندىرىسىنىڭ كولەمى 37،9 ملرد تەڭگەگە جەتكەن. شىنايى ءوسىم – وتكەن جىلعا قاراعاندا 50،4%-عا كوپ. ءوندىرىستىڭ اۋقىمدى بولىگى شىمكەنت قالاسىنا (11،4 ملرد تگ) تيەسىلى.

"2020 جىلدىڭ مامىرىندا فارماسيەۆتيكالىق پرەپاراتتار 6،9 پايىزعا (وتكەن جىلدىڭ مامىرىمەن سالىستىرعاندا) قىمباتتادى. ايماقتاردىڭ ىشىندە باعالاردىڭ ءوسۋى پاۆلودار وبلىسىندا (ءبىر جىلدا 9،4%)، اقمولا وبلىسى (ءبىر جىلدا 9،3%) مەن شىمكەنت قالاسىندا (ءبىر جىلدا 9،2%) بايقالادى. پرەپاراتتاردىڭ ىشىندە ايتارلىقتاي باعا ءوسىمى انتيسەپتيكتەر (16،9%)، ىستىق تۇسىرەتىن دارىلەر (8،5%)، بۇيرەكتى جازۋعا ارنالعان دارىلەر (7،4%) مەن انتيبيوتيكتەر (7،3%) بويىنشا تىركەلدى" دەلىنگەن energyprom.kz زەرتتەۋىندە.

دەرەككوز: inform.kz