الماتى اكىمى باقىتجان ساعىنتايەۆ ءوزىنىڭ Instagram-داعى پاراقشاسىندا مەگاپوليستە جۇمىسقا تۇرۋ جۇيەسىنىڭ قالاي اتقارىلاتىنى تۋرالى بەينەروليك جاريالادى.

بەينەروليكتە كەلتىرىلگەن مالىمەت بويىنشا اعىمداعى جىلى قالادا 56 مىڭ جۇمىس ورنى قۇرىلادى دەپ كۇتىلۋدە. ونىڭ ىشىندە 25 مىڭ جۇمىس ورنى «جۇمىسپەن قامتۋدىڭ جول كارتاسى» باعدارلاماسى بويىنشا. وسى باعدارلاما اياسىندا جول جوندەۋ، قوعامدىق كەڭىستىكتەر مەن باسقا دا ورىنداردى اباتتاندىرۋ جوبالارى جۇزەگە اساتىن بولادى.

– جۇمىس ىزدەگەن قالا تۇرعىندارى قالالىق جۇمىسپەن قامتۋ ورتالىعىنا جۇگىنەدى. "ەكى قولعا ءبىر كۇرەك ىزدەگەن" 27 مىڭ ازاماتتىڭ 13،5 مىڭى جۇمىسپەن قامتىلدى. ولاردىڭ ىشىندە كۇزەت كومپانياسىنا جۇمىسقا تۇرعان دينا ەرەكەشوۆا بار، – دەپ جازدى ب. ساعىنتايەۆ.

روليكتە باياندالعانداي، د. ەرەكەشوۆا كوپ ۋاقىت بويىنا جۇمىس تابا المايدى. سودان جۇمىسپەن قامتۋ ورتالىعىنا جۇگىنۋدى ءجون كورىپ، اتالعان مەكەمەگە بارادى. مۇندا ول قاجەتتى بارلىق كەڭەستەردى الادى جانە ۇسىنىلعان بوس ورىنداردىڭ ىشىنەن وزىنە كەرەكتىسىن تاڭدايدى. قازىرگى كەزدە الماتىلىق ايەل كۇزەت اگەنتتىگەندە اكىمگەر بولىپ جۇمىس ىستەۋدە.

– بىزدەگى «ەڭبەك» ناتيجەلى جۇمىسپەن قامتۋدى جانە جاپپاي كاسىپكەرلىكتى دامىتۋ باعدارلاماسىندا ءۇش باعىت بار: قوعامدىق جۇمىستار، الەۋمەتتىك جۇمىس ورىندارى جانە جاستار تاجىريبەسى، – دەپ حابارلادى الماتى اكىمى.