الماتى وبلىسى بالقاش اۋدانىنىڭ ءتارتىپ ساقشىلارى اۋدان ورتالىعى باقاناس اۋىلىندا تۇراتىن 6 بالالى وتباسىعا سانيتارلىق قورعانىس قۇرالدارىمەن قاتار، ازىق-تۇلىك پەن سول ۇيدەگى ءۇش وقۋشىعا بارلىق كەڭسە تاۋارلارىن اپارىپ بەردى.

 – جەكە قۇراممەن كەلىسە وتىرىپ، كوپبالالى ورمانبايەۆتار وتباسىنا قولداۋ كورسەتۋ تۋرالى شەشىم قابىلداندى. كارانتين كەزىنە وراي وتباسىعا مەديسينالىق بەتپەردەلەر مەن قولعاپتار، ازىق-تۇلىك، سونداي-اق ۇيدەگى ءۇش وقۋشىعا جاڭا وقۋ جىلىنا ارناپ بارلىق كەڭسە قۇرالدارىن تابىستادىق. ىندەتتىڭ جاپپاي تارالۋىنا بايلانىستى جاريالانعان توتەنشە جاعداي كەزىنەن باستاپ ءبىز كوپبالالى جانە كومەككە ءزارۋ وتباسىلارعا ۇنەمى قولداۋ كورسەتىپ كەلەمىز، – دەيدى بالقاش اۋدانى پوليسيا ءبولىمى باستىعىنىڭ مىندەتىن اتقارۋشى پوليسيا پودپولكوۆنيگى نۇرگەلدى ابيروۆ. الەمدى شارپىعان وسى پاندەميا كەزىندە قينالعان جانعا قولداۋ بەرگەن ءتارتىپ ساقشىلارىنا كوپبالالى وتباسى مۇشەلەرىنىڭ ايتار العىسى شەكسىز.

– اۋداندىق پوليسيا ءبولىمىنىڭ باسشىلىعى ۇيىمىزگە كەلىپ، ازىق-تۇلىك پەن مەكتەپكە قاجەتتى بارلىق قۇرال-جابدىقتى تابىستادى. وسىنداي قيىن كەزدە قولدا بارىمەن ءبولىسۋ، قولداۋ بەرۋ – ناعىز ادامگەرشىلىكتىڭ بەلگىسى دەپ بىلەمىن. بالالارىمدى قۋانىشقا بولەگەن پوليسەيلەردىڭ جۇمىسىنا تابىس، وتباسىلارىنا اماندىق پەن بەرەكە تىلەيمىن، - دەيدى باقاناس اۋىلىنىڭ تۇرعىنى، كوپبالالى انا ايگەرىم عالىم قىزى.

– پوليسەيلەر سانيتارلىق نورمالاردىڭ ورىندالۋىن تالاپ ەتىپ قانا قويماي، تۇرعىنداردى قولدان كەلگەنشە بەتپەردەلەرمەن قامتاماسىز ەتەدى. جاقىندا تۇرعىندارعا 1500 بەتپەردە تەگىن تاراتتىق. ۇلت ساۋلىعىن قامتاماسىز ەتۋ ءۇشىن پاندەميا كەزىندە ءار ادام الەۋمەتتىك جاۋاپكەرشىلىك تانىتىپ، سانيتارلىق تالاپتاردى قاتاڭ ساقتاۋى ءتيىس، – دەيدى بالقاش اۋداندىق اكىمشىلىك پوليسيا ءبولىمىنىڭ باستىعى، پوليسيا پودپولكوۆنيگى بالبەك لەپەسبايەۆ.