ىندەت جاعادان الىپ، ەل باسىنا كۇن تۋعان شاقتا «مەن نە ىستەي الامىن؟» دەپ قارلىعاشتىڭ قاناتىمەن سۋ سەپكەنىندەي كومەك بەرۋگە ىنتالانعان جاندار كوپ بولدى. ماسەلەن، بۇگىنگىدەي سىن ساعاتتا جاناشىرلىق تانىتىپ، كوپكە كومەگىن كورسەتىپ، قايىرىمدى ازاماتتاردىڭ باسىن قوسقان كاسىپكەر داۋرەن ءتالىپوۆتىڭ ەرەن ەڭبەگىن ەرەكشە اتاپ وتۋگە بولادى.
«التىن جۇرەك» سىيلىعىنىڭ يەگەرى قايىرىمدىلىق جاساۋدا الدىنا جان سالمايدى. ول بۇل سىيلىققا دا مەيىرىمدىلىگى مەن ادامگەرشىلىك قاسيەتى ارقىلى كوپكە كومەكتەسە ءجۇرىپ قول جەتكىزدى. جاقسىلىق جاساپ، جالپىعا جاناشىرلىق تانىتىپ جۇرگەن باۋىرمال ازامات «ەگەر نان ساتىپ الۋعا مۇمكىندىگىڭىز جوق بولسا، تەگىن الىڭىز» دەپ قالا تۇرعىندارىنا تەگىن نان تاراتتى. كارانتين كەزىندە سانيتارلىق بەكەتتەگى قىزمەتكەرلەردى تەگىن تاماقتاندىردى. ودان بولەك، كاسىپكەردىڭ دەمەۋشىلىگىمەن اتقارىلىپ جاتقان ءىس تە از ەمەس. ول قازىرگى تاڭدا وبلىستىڭ 125 مەديسينا قىزمەتكەرىن تۇسكى اسپەن تەگىن قامتاماسىز ەتۋدى قولعا العان. كاسىپكەر قاۋىمداستىعى وكىلدەرىنىڭ حالىققا ۇندەۋ جاريالاپ، ىندەتپەن بارشا قازاقستاندىقتى بىرلەسە كۇرەسۋگە شاقىرعانى بەلگىلى. سولاردىڭ ءبىرى ءبىزدىڭ كەيىپكەرىمىز بولاتىن. وسىلاي باستالعان يگى ءىستىڭ ناتيجەسىندە قازاقستاندىقتاردان 10 ميلليون تەڭگەگە جۋىق قاراجات جينالدى. «كوپ تۇكىرسە كول» دەگەندەي، حالىقتان تۇسكەن قاراجات قانشاما ادامنىڭ ءومىرىن امان الىپ قالۋعا سەپتىگىن تيگىزدى.
– بۇعانام قاتپاي جاتىپ، بيزنەسكە ارالاسا باستادىم. اكەم مەن ۇلكەن اعامنان كوپ دۇنيە ۇيرەندىم. كاسىپكەرلىكپەن اينالىسا ءجۇرىپ، كومەككە مۇقتاج جاندارعا قول ۇشىن سوزۋدى ازاماتتىق پارىزىم دەپ سانايمىن. ساۋاپتى ءىس اتقارىپ، ەلدىڭ باتاسىن الۋعا دەگەن قۇلشىنىسىم كۇن وتكەن سايىن ارتىپ كەلەدى. ءقازىر ءبىزدىڭ قوعامنىڭ تەك مەيىرىمگە شولدەپ تۇرعانىن ۇمىتپايىق. بۇل قايىرىمدىلىق شاراسى باستالعالى بەرى جومارت جۇرەكتى ازاماتتار وعان اتسالىسۋدان شارشاعان ەمەس. كاسىپكەر قاۋىمداستىعىنان 70، ال ۇجىمىمنان 50 ازامات يگى ءىستىڭ باسى-قاسىندا ءجۇر. مىناداي اۋىر ىندەت تاراعان كەزدە جايباراقات وتىرعان ادامدى كورمەدىم. «قولىمنان ەشتەڭە كەلمەيدى» دەگەن ادامنىڭ ءوزى ءبىز اشقان قورعا اقشا اۋداردى. ماسەلە قاراجاتتىڭ از، كوپتىگىندە ەمەس. ەڭ باستىسى،
حالىقتىڭ نيەتى مەن پەيىلى. وسى بەتىمىزدەن تايماساق، كوڭىلىمىزدى كىر شالماسا ءبىز بۇل دەرتتى جەڭىپ، بۇرىنعى جايما-شۋاق كۇنىمىزگە قايتا ورالامىز. ءبىراق وسى جولدا شارشاماي، تالماي ەڭبەك ەتۋىمىز كەرەك. اۋرۋحاناعا ءتۇسىپ، جاعدايدى ءوز كوزىممەن كورگەندە قاتتى تاڭعالدىم. اق حالاتتى جاندار دامىل تاپپاي، ءار ناۋقاسقا كوڭىل بولۋدە. ءومىر مەن ءولىم اراسىندا جان الىپ، جان بەرىسىپ كۇرەسكەن التىن قول دارىگەرلەردىڭ ەرلىگىنە باس يەمىن. مەديسينالىق قۇرالجابدىقتار جەتىسپەگەندىكتەن قايعىلى وقيعالاردىڭ ورىن الۋى ارتتى. بىردەن وسى ولقىلىقتىڭ ورنىن تولتىرۋ كەرەكتىگىن ءتۇسىندىم. ءمان-جايدى حالىققا ءتۇسىندىرىپ، قاراجات جيناۋ ماقساتىمەن قور اشتىق. تەز ارادا ىسكە كىرىسپەسەك ناۋقاستاردى قۇتقارىپ قالا المايتىنىمىزدى ءتۇسىندىم. بار بولعانى ءۇش اپتانىڭ ىشىندە 10 ميلليون تەڭگەگە جۋىق قاراجات جينالدى. وعان وكپەنى جاساندى جەلدەتەتىن 79 اپپارات الدىق. قازىرگى تاڭدا ونى وبلىس اۋماعىنداعى بارلىق اۋرۋحاناعا تاراتىپ بەردىك. «شۇعىلا» قورى ءار كونسەنتراتورعا ءوز شتيرح-كودىن ورناتىپ، ءوز بازاسىنا تىركەدى. كونسەنتراتوردىڭ قاي اۋرۋحانادا تۇرعانى باقىلاۋعا الىنعان. سوندىقتان كونسەنتراتورلار جەكە ادامنىڭ قولىنا بەرىلمەيدى. تەك قانا اۋرۋحاناعا تۇسكەن ناۋقاستارعا پايدالانىلادى. وسىنداي جۇمىس اتقارۋعا اتسالىسقان مەيىرىمدى جاندارعا العىس ايتامىز. زامانىمىز تىنىش، ەلىمىز امان بولسىن، – دەيدى مەيىرىمدى ازامات.
وتىزدا وردا بۇزىپ، قىرىقتا قامال الۋ – ءاربىر قازاق ازاماتىنىڭ نەگىزگى ماقساتى ەكەنىن تىلگە تيەك ەتكەن داۋرەن ورازعالي ۇلى وڭىردەگى كاسىپتىڭ دامۋىنا اتسالىسىپ جۇرگەن ازاماتتاردىڭ ءبىرى ءارى بىرەگەيى. ول كاسىپ باستاعان جاستارعا جول كورسەتىپ، قولداۋ بىلدىرۋدەن شارشامايدى. كەرىسىنشە، ولارعا دامۋدىڭ داڭعىل جولىن كورسەتۋگە قۇشتار. الەم مويىندايتىن قازاق كاسىپكەرلەرىنىڭ سانىن ارتتىرۋ – ونىڭ باستى ماقساتى. ازامات رەتىندە قوعامداعى جاۋاپكەرشىلىكتىڭ اۋىر جۇگىن ارقالاپ قانا قويماي ادامدار اراسىنداعى مەيىرىمدىلىك سەزىمىنىڭ سونبەۋىنە بىركىسىدەي اتسالىسىپ جۇرگەن قازاقتىڭ جىگەرلى ۇلى پرەزيدەنت قاسىم-جومارت توقايەۆتىڭ جارلىعىمەن «حالىق العىسى» مەملەكەتتىك مەدالىن يەلەندى. ەلىم دەپ ەڭبەك ەتكەن ازاماتتىڭ ەڭبەگى اقتالدى. ەڭ باستىسى – جاناشىر ازاماتقا حالىق ريزا.
ايدار قالييەۆ
پىكىر قالدىرۋ