1 قىركۇيەك - ءبىلىم كۇنى قارساڭىندا الماتى وبلىستىق پوليسيا دەپارتامەنتىنىڭ تەرگەۋشىلەرى مەن انىقتاۋشىلارى كومەككە مۇقتاج جاندارعا قول ۇشىن بەرىپ، بۇلدىرشىندەردى قۋانتتى.

ولار بالالاردىڭ ونلاين وقۋىنا قاجەتتى نوۋتبۋكتەر، پلانشەتتەر جانە باسقا دا وقۋ قۇرالدارىن سىيعا تارتتى. ەندى وسىنداي سىيلىقتاردى العان وقۋشىلار تەحنولوگيا مەن بايلانىستىڭ جاڭا قۇرالدارىنىڭ كومەگىمەن ءبىلىم ءنارىن قيىندىقسىز سىڭىرە الادى.

- ءبىز كوپبالالى، تۇرمىسى تومەن وتباسىلارعا قولداۋ كورسەتۋ بويىنشا قايىرىمدىلىق اكسيالارىن ودان ءارى جالعاستىرۋعا شەشىم قابىلدادىق. ءقازىر مەكتەپ جاسىنداعى بىرنەشە بالا تاربيەلەپ وتىرعان بىرنەشە وتباسى بار. ول بالالاردى مەكتەپكە ازىرلەۋ قاجەت. ءبىز قازىرگى ۋاقىتتا ونلاين ءبىلىم بەرۋ جاعدايىن ەسەپكە الىپ، داپتەرلەر مەن قالامدار عانا ەمەس، سونىمەن قاتار، تەحنيكالىق بايلانىس قۇرالدارىنىڭ دا قاجەت ەكەنىن ەسكەردىك. مىسالى، ءبىر وتباسىندا ءتورت بالا بولسا، ءبىز ولارعا نوۋتبۋك پەن وقۋ قۇرالدارى سالىنعان ريۋكزاك سىيلادىق. سونىمەن قاتار، اناسىمەن عانا جالدامالى پاتەردە تۇراتىن بالا دا وسىنداي سىيلىققا يە بولدى، - دەدى الماتى وبلىسى پوليسيا دەپارتامەنتى انىقتاۋ باسقارماسى باستىعىنىڭ ورىنباسارى، پوليسيا پولكوۆنيگى سامال ارعىنعازينوۆا.

تەرگەۋشىلەر بۇل شارانىڭ ءبىر رەتتىك قانا اكسيا ەمەس ەكەنىن جانە مۇمكىندىگىنشە تەرگەۋشىلەر مەن انىقتاۋشىلار ودان ءارى جالعاستىراتىنىن اتاپ ءوتتى. ويتكەنى، بالالاردىڭ شىنايى العىسىنا بولەنۋ قۋانىشىنا تەڭ كەلەتىن ەشتەمە جوق،- دەيدى پوليسەيلەر.