قازاقستاننىڭ تۇڭعىش  پرەزيدەنتى نۇرسۇلتان نازاربايەۆ «بەس الەۋمەتتىك باستاما» اتتى حالىققا ۇندەۋىندە: «2022 جىلدىڭ سوڭىنا دەيىن ستۋدەنتتەرگە ارناپ كەمىندە 75 مىڭ ورىندىق جاڭا جاتاقحانا سالۋدى تاپسىرامىن» – دەدى. وسىعان وراي تالدىقورعانداعى «قاراتال» شاعىناۋدانىندا  ءى.جانسۇگىروۆ اتىنداعى جەتىسۋ مەملەكەتتىك ۋنيۆەرسيتەتىنە قاراستى ستۋدەنتتەر ءۇيى اشىلدى.

سالتاناتتى شاراعا قاتىسقان الماتى وبلىسىنىڭ اكىمى اماندىق باتالوۆ: «2001 جىلى تالدىقورعان وبلىس ورتالىعى مارتەبەسىنە يە بولىپ، قالانى كوتەرۋ ماقساتىندا وسىندا كوشىپ كەلگەنىمىزدە قۇرىلىسى اياقتالماي قالعان بۇل عيمارات بىردەن-اق كوزگە ءتۇستى. ۇزاق ۋاقىت بىتپەي تۇرعاندىقتان ونداعى قۇرىلىس ماتەريالدارى ساپاسىنىڭ دا ناشارلاي تۇسكەنى انىق. قۇرىلىستى ودان ارى قاراي جۇرگىزۋ ءۇشىن ساراپتامادان وتكىزۋ قاجەت بولدى. رەتىن تاۋىپ عيماراتتى مەملەكەت مەنشىگىنە الىپ، ساراپتاما جۇرگىزىپ، 2019 جىلدان باستاپ قۇرىلىستى قايتا جانداندىردىق. ەلباسىنىڭ "بەس الەۋمەتتىك باستاماسىنا» ساي ستۋدەنتتەرگە ارنالعان جاتاقحانا بولسىن دەگەن شەشىمگە كەلدىك. ەندى جەتىسۋلىق جاستار بۇگىنگى ۋاقىت تالابىنا ساي سالىنعان ستۋدەنتتەر ۇيىنە ورنالاسىپ، ءبىلىم الاتىن بولادى»، – دەپ جەتىسۋ مەملەكەتتىك ۋنيۆەرسيتەتىنىڭ رەكتورى قۋات بايمىرزايەۆقا جاڭا عيمارات كىلتىن سالتاناتتى تۇردە تابىس ەتتى.

الماتى وبلىسىنىڭ قۇرمەتتى ازاماتى ءالىمعازى رايىمبەكوۆ اتامىز اق باتاسىن بەرگەن سوڭ عيماراتتىڭ لەنتاسى قيىلىپ، جينالعان كوپشىلىك جاڭا نىساننىڭ ءىشىن ارالاپ كوردى.

جوبا قۇنى - 222،3 ملن.تەڭگە. نىساننىڭ قۇرىلىسىنا  جاۋاپتى بولعان باس مەردىگەر كومپانيا «استانا قۇرىلىس» ج ش س بولىپ تابىلادى. ال عيماراتتىڭ سۇلباسىن سىزعان ساۋلەتشى مارقۇم، اقمىرزا رۇستەمبەكوۆ. ون ءۇش قاباتتى ۇيدە 96 جاتىن بولمە بار. ءار بولمەگە ءۇش ستۋدەنتتەن ورنالاسادى. 288 ورىندى جاتاقحانانىڭ ءبىرىنشى قاباتىندا  جاستاردىڭ ۋاقىتىن ءتيىمدى وتكىزۋگە ارنالعان ءتۇرلى تانىمدىق-سپورتتىق بولمەلەر، شاعىن كينوتەاتر، كافە، بي الاڭى ورنالاسقان. سونداي-اق، ءار قاباتتا اس بولمە، كىتاپحانا، كومپيۋتەر بولمەسى، دەمالىس ورىندارى بار. جاتاقحانا الاڭى دا جاستاردىڭ دەمالىپ، ءتۇرلى شارا وتكىزىپ، سپورتپەن اينالىسۋىنا  لايىقتالىپ جاسالعان.

بۇگىنگى تاڭدا جەتىسۋ  ۋنيۆەرسيتەتىندە 6 مىڭعا جۋىق جاس ءبىلىم الۋدا. وقۋ ورنىنا قاراستى 525 ورىندى ەكى جاتاقحانا بار. جاستار تاراپىنان بۇعان دەيىن جاتاقحانالىق 500 ورىنعا سۇرانىس بولعان. مىنە، ەندى ول دا بار.