قاراساي اۋدانىنداعى مەملەكەتتىك-جەكەمەنشىك ارىپتەستىگى اياسىندا جۇزەگە اسىرىلعان "نۇر-امان" دەنە شىنىقتىرۋ-ساۋىقتىرۋ كەشەنىنىڭ تۇساۋكەسەر ءراسىمى ءوتتى. شاراعا الماتى وبلىسىنىڭ اكىمى اماندىق باتالوۆ قاتىستى.

رايىمبەك اۋىلىندا بوي كوتەرگەن عيمارات قاراساي اۋدانىندا ازاماتتاردىڭ باستاماسىمەن جۇزەگە اسقان ەكىنشى جوبا ەكەنىن ايتا كەتۋ كەرەك.

– بيىلعى جىلى بۇكىل الەممەن بىرگە ءبىزدىڭ مەملەكەتىمىز دە اسا جاۋاپتى سىننان ءوتتى،– دەدى اماندىق عابباس ۇلى «COVID – 19» پاندەمياسىنا بايلانىستى تۋىنداعان ماسەلەلەردى ەسكە سالىپ. – دەگەنمەن، كارانتين جاعدايىنا قاراماستان وبلىسىمىزدا اۋقىمدى شارالار اتقارىلىپ جاتىر. سونىڭ ايقىن ءبىر دالەلى – بۇگىنگى رايىمبەك اۋىلىندا پايدالانۋعا بەرىلگەن دەنە شىنىقتىرۋ-ساۋىقتىرۋ كەشەنى. وبلىستىڭ كاسىپكەر ازاماتتارى بۇقارالىق سپورتتى دامىتۋدى جۇزەگە اسىرۋعا، تۋعان جەرىن كوركەيتۋگە بەلسەنە اتسالىسىپ كەلەدى. مەسەناتتاردىڭ ەكونوميكانىڭ باسقا سالالارىمەن قاتار سپورتقا قولداۋ كورسەتۋى – وسكەلەڭ ۇرپاققا قىزمەت ەتكەنى دەپ تۇسىنەمىز.

اتالعان نىسان مەملەكەتتىك-جەكەمەنشىك ارىپتەستىك اياسىندا سالىندى. كەشەن زاماناۋي جابدىقتارمەن جابدىقتالعان. سپورت كەشەنىندە بوكسپەن، كۇرەسپەن، دزيۋدومەن، تاەكۆاندومەن، اۋىر اتلەتيكا جانە فۋتبولمەن اينالىسۋعا بارلىق مۇمكىندىكتەر جاسالىنعان.

ەلباسى نۇرسۇلتان  نازاربايەۆتىڭ قولداۋى جانە پرەزيدەنتىمىز قاسىم-جومارت توقايەۆتىڭ حالىققا جولداۋىندا بەرگەن تاپسىرمالاردى ورىنداۋ ناتيجەسىندە حالىقارالىق ارەنادا قازاقستان سپورتىنىڭ بەدەلى جىل ساناپ ارتۋدا. ءبىزدىڭ سپورتشىلار ءتۇرلى دودالاردا جەڭىس تۇعىرىنان كورىنىپ، قازاق ەلىن الەمگە تانىتىپ كەلەدى. الداعى ۋاقىتتا بۇقارالىق سپورتتى دامىتۋ باستاماسى بويىنشا مۇنداي كەشەندەر وبلىسىمىزدىڭ بارلىق اۋداندارى مەن قالالارىندا بوي كوتەرەتىن بولادى.

جاڭا اشىلعان سپورت كەشەنى تۇرعىندارعا قىزمەت ەتىپ، مۇندا ەلىمىزدىڭ ابىرويىن ارتتىراتىن رەسپۋبليكالىق جانە حالىقارالىق دەڭگەيدەگى جارىستار وتەدى دەپ سەنەمىن.

كەلەسى بولىپ ءسوز العان «نۇر-امان» سپورتتىق كەشەنىنىڭ سالىنۋىنا مۇرىندىق بولعان وبلىسىمىزدىڭ قۇرمەتتى ازاماتى، گەنەرال-لەيتەنانت امانگەلدى شابداربايەۆ كىندىك قانى تامعان اۋىلعا قامقورلىق جاساۋدى پەرزەنتتىك پارىزى سانايتىنىن ايتا كەلىپ، وسى كەشەننەن بولاشاقتا ەلىمىزدىڭ كوك بايراعىن جەلبىرەتەتىن سپورتشىلار شىعاتىنىنا سەنىم ءبىلدىردى. سوڭىندا اماندىق عابباسۇلىنا اتاقتى سپورتشىلاردىڭ قولتاڭباسى بار ۆولەيبول دوبىن سىيلادى.

قازاقستان رەسپۋبليكاسىنىڭ ءۇش دۇركىن چەمپيونى، كاراتەدەن ەكى دۇركىن «قارا بەلبەۋ» يەگەرى بەكجان سۇندەبەكوۆ بولسا، جاڭا كەشەندە جاتتىعاتىن جاستارعا بيىك مىنبەرلەردەن كورىنۋىنە تىلەكتەستىك ءبىلدىردى. ال اۋىل اقساقالى يمانجان ءومىرقۇل ۇلى جۇرتشىلىقتىڭ ىزگى نيەتتەرىن ايتىپ، اق باتاسىن ارنادى. «ەليتستروي پروەكت» قۇرىلىس كومپانياسىنىڭ باسشىسى قايرات ورازبەكوۆ جاڭادان اشىلعان سپورت كەشەنىنىڭ كىلتىن «نۇر-امان» دەنە شىنىقتىرۋ-ساۋىقتىرۋ ورتالىعىنىڭ ديرەكتورى ايگۇل يسكاكوۆاعا سالتاناتتى تۇردە تابىس ەتتى.

سالتاناتتى جيىندا اماندىق عابباس ۇلى حالقىمىزدىڭ ىزگى ءداستۇرى بويىنشا جۇرتشىلىق الدىندا اۋىلداستارىنا وسىنداي ۇلكەن سىي جاساعان امانگەلدى سماعۇل ۇلىنىڭ يىعىنا شاپان جاۋىپ، «جەتىسۋ» ۆولەيبول كومانداسىنىڭ فورماسى مەن ويىنشىلاردىڭ قولدارى قويىلعان دوپتى تارتۋ ەتتى.

كەشەننىڭ القىزىل لەنتاسى قيىلعاننان كەيىن سالتاناتقا جينالعان قوناقتار عيماراتتىڭ ءىشىن ارالاپ كورىپ، ۆولەيبول، بوكس، كۇرەس، گيمناستيكا زالدارى مەن شاحمان-دويبى بولمەسىنىڭ جۇمىسىمەن تانىستى. ولكە باسشىسى مەن سپورت مەسەناتتارى بوكسشىلارعا بۇلعارى قولعاپتار، بالۋاندارعا ارنايى كيىمدەرىن سىيلاپ، تاعى ءبىر بەرەكەلى شارۋانى باستاپ جىبەردى.

اماندىق عابباس ۇلى مەن امانگەلدى سماعۇل ۇلى وبلىسىمىزدىڭ ابىرويىن اسقاقتاتىپ جۇرگەن «جەتىسۋ» ۆولەيبول كومانداسىنىڭ ويىنىنشىلارىنا ارنايى مەدال تابىستاسا، جينالعان قاۋىمعا تاماشا ويىن ۇلگىسىن كورسەتتى.