61 كەلىدەن جوعارى سالماقتا سىنعا تۇسكەن سوفيا بەرۋلسيەۆا توكيو وليمپياداسىنداعى جۇلدەسىن مارقۇم ۇستازى جاستالاپ ساناۋوۆقا ارنادى. بۇل تۋرالى olympic.kz سايتى حابارلادى.

جاستالاپ ساناۋوۆ كارەتەدەن قازاقستان ۇلتتىق قۇراماسىنىڭ باس باپكەرى بولعان. ول 2020 جىلدىڭ 31 جەلتوقسانىندا مەزگىلسىز دۇنيەدەن وتكەن بولاتىن.

– جاستالاپ اعانىڭ دۇنيەدەن وزعانى بارىمىزگە وتە قاتتى اسەر ەتتى. ءبىزدىڭ وسى وليمپياداعا كەلۋىمىز ءۇشىن بارىن سالدى. بىزگە دە كومەكتەستى، فەدەراسياعا دا كومەكتەستى. مەدالىمدى سوعان (جاستالاپ ساناۋوۆقا - رەد) ارنايمىن، – دەپ كوزىنە جاس الدى سپورتشى.

جارىستان كەيىن جۋرناليستەرگە بەرگەن سۇحباتىندا فينالعا جەتە الماعانىنا وكىنەتىنىن جەتكىزدى.

– ارينە، قۋانىشتىمىن. ءبىراق فينالعا شىعۋعا بولاتىن ەدى. بارىمدى سالدىم. كىشكەنە جەتپەي قالدى. فينالعا كىشكەنە جەتپەي قالعاندا وكىنىشتەن كوزىمە جاس كەلدى. بۇگىنگى قارسىلاستارىمنىڭ ەشقايسىسىمەن وسى ۋاقىتقا دەيىن جارىستا كەزدەسكەن ەمەسپىن.  

جارتىلاي فينالدا بىر-ەكى سوققى العاننان كەيىن كىشكەنە تاپىراقتاپ قالدىم. بۇل جەردە تورەشىنى دە، ەشكىمدى كىنالاي المايسىڭ. ءبارى ءادىل ءوتتى. ناتيجەسى وسى، – دەپ جاۋاپ بەردى سوفيا بەرۋلسيەۆا.

7 تامىز كۇنى قازاقستاندىق كاراتەشى سوفيا بەرۋلسيەۆا وليمپيادا ويدىندارىنان ەل قورجىنىنا قولا جۇلدەنى سالدى. 20 جاسار سپورتشى توپتىق كەزەڭدە ۇزدىك اتانىپ، ۋاقىتىنان بۇرىن جارتىلاي فينالعا جولداما العان بولاتىن. الايدا جارتىلاي فينالدا ەگيپەتتىك فەريال ابدەلازيزگە 5:4 ەسەبىمەن جول بەرىپ، قولا جۇلدەنى قاناعات تۇتتى.

سوفيانىڭ مەدالى كاراتەدەن قازاقستان قۇراماسىنىڭ توكيو وليمپياداسىنداعى ەكىنشى جۇلدەسى. ول كاراتەدەن وليمپيادا ويىندارىندا ايەلدەر اراسىندا  جۇلدە العان تۇڭعىش قازاقستاندىق سپورتشى رەتىندە ەل سپورتىنىڭ تاريحىنا ەندى.