مۇعالىمدەر قاۋىمى ءۇشىن ايرىقشا ىستىق ماۋەلى كۇزدىڭ بەل ورتاسىندا «ورلەۋ» پەداگوگيكالىق قىزمەتكەرلەردىڭ بىلىكتىلىگىن ارتتىرۋ ۇلتتىق ورتالىعىنىڭ قۇرىلعانىنا ءۇش جىل تولادى. ءۇش جىل: بۇل كوپ پە، الدە از با؟ اتالمىش كەزەڭدە بىلىكتىلىكتى ارتتىرۋ جۇيەسىندە ەرەكشە نە وزگەردى؟ الدىمەن، اتاپ ءوتۋ كەرەك، وسىناۋ قىسقا مەرزىمدە كوپتەگەن شارۋالار تىندىرىلدى. ءقازىردىڭ وزىندە بىلىكتىلىكتى ارتتىرۋدىڭ قازاقستاندىق جۇيەسىن تۇبەگەيلى جاڭارتۋعا باعىتتالعان ءىس ۋاقىتىندا جانە سەنىمدى تۇردە قولعا الىنعانىن ايتۋعا ءتيىسپىز.
بۇكىل الەمدە ۇزدىكسىز ءبىلىم جۇيەسىن قۇرۋعا باسىمدىق بەرىلەدى. بۇعان دەيىنگى «ءومىر بويى وقۋ كەرەك» قاعيداسىنا كەرىسىنشە، بۇگىندە «بۇكىل ءومىر بويى وقۋ كەرەك» قاعيداتى ىسكە اسىرىلۋدا. مۇندا بىلىكتىلىكتى ارتتىرۋ جۇيەسىنە جەتەكشى ورىن بەرىلەتىنى بەلگىلى. قازىرگى كۇنى «ورلەۋ» ۇلتتىق ورتالىعى، ونىڭ وبلىستىق فيليالدارى وزىنە جۇكتەلگەن مىندەتتەردى تابىستى ورىنداپ كەلەدى دەي الامىز. بۇعان ورتالىقتىڭ تۇعىرناماسىن نىقتاۋ، قىزمەتتىڭ مازمۇنىن انىقتاۋ ناتيجەسىندە قول جەتكىزۋگە مۇمكىندىك تۋدى.
سوعان وراي حالىقارالىق قوعامداستىقتىڭ تاجىريبەسى تەوريا جۇزىندە دە، پراكتيكادا دا ەگجەي-تەگجەيلى زەرتتەلدى. ماسەلەن، ۇلىبريتانياداعى، كورەياداعى، سينگاپۋرداعى، الەمنىڭ باسقا دا دامىعان ەلدەرىندەگى بىلىكتىلىكتى ارتتىرۋدىڭ ۇيىمدىق جوسپارلارى مەن وقۋ-ادىستەمەلىك كەشەندەرى ازىرلەنىپ، تەك ءۇشىنشى بازالىق دەڭگەيدەگى كۋرستاردا عانا ەمەس، سونىمەن بىرگە، ءپان مۇعالىمدەرىنىڭ قىسقا مەرزىمدىك كۋرستارىندا دا نەگىزگە الىندى. ءبىزدىڭ فيليالىمىزدا وسى جىلى كەمبريدج باعدارلاماسى بويىنشا ءۇشىنشى بازالىق دەڭگەيدەگى كۋرستاردان 781 پەداگوگ ءوتتى. ال اعىمداعى جىلدىڭ قىركۇيەگىنەن باستاپ تاعى 190 پەداگوگ وقۋعا كىرىستى. قىسقا مەرزىمدىك كۋرستاردا 2456 پەداگوگ وقىدى.
ينستيتۋتتا دەڭگەيلىك باعدارلامالار ورتالىعى جۇمىس ىستەيدى، مۇنىڭ ءوزى بارلىق سەرتيفيكاتتالعان مۇعالىمدەردى شوعىرلاندىرۋعا مۇمكىندىك بەرەدى. ال جەلىلىك قوعامداستىقتى قۇرۋ كۋرستان كەيىنگى كەزەڭدە پەداگوگتارمەن بىرلەسىپ جۇمىس ىستەۋدى جالعاستىرۋعا ىقپال ەتۋدە. ءسويتىپ، سەرتيفيكاتتالعان پەداگوگتار وقۋ ۇدەرىسىنە بارلىق جاڭاشىل ىستەردى تابىستى ەنگىزۋگە مۇمكىندىك الدى. مۇنىمەن قوسا، پەداگوگيكالىق ۇجىمداردا وقۋ-تاربيە ۇدەرىسىن ۇيىمداستىرۋعا دەگەن كوزقاراس ەلەۋلى تۇردە وزگەردى. ءتىپتى، وقۋشىلار ءبىلىم ۇدەرىسىنىڭ بەلسەندى سۋبەكتىلەرى بولىپ تابىلۋدا، ويتكەنى، ولار تابىسقا جەتۋدىڭ ءوزى جەكە نەگىزدەۋ مەن وقۋدىڭ ناتيجەلىلىگىنە بايلانىستى ەكەندىگىن تۇسىنەدى.
«ورلەۋ» جوسپارىنا ءسايكەس پەداگوگ جۇمىسىنىڭ تاعى ءبىر ماڭىزدى اسپەكتىسى – ەلەكتروندىق وقىتۋعا ايرىقشا كوءڭىل بولىنۋىندە. بۇگىندە بۇل – ۋاقىت تالابى. الەمدىك ءبىلىم كەڭىستىگىنە كىرۋ ءۇشىن پەداگوگتار ينفوكوممۋنيكاسيالىق الەۋەتتى جەتىك مەڭگەرۋى ءتيىس. اسىرەسە، «E-learning» جوباسى پەداگوگتار ءۇشىن جاڭا مۇمكىندىكتەر اشاتىنى ءسوزسىز. ءقازىردىڭ وزىندە سالانى باسقارۋ جۇيەسىن اۆتوماتتاندىرۋ ەنگىزىلۋدە: ەلەكتروندىق جۋرنالدار، كەستە، كۇندەلىكتەر، كىتاپحانالار جانە ت.ب. وسىعان بايلانىستى، قىركۇيەك ايىنان باستاپ ينستيتۋتتا «ە-learning» ەنگىزۋ جونىندە كۋرستاردى وتكىزۋگە كىرىستىك. بيىلعى جىلى 301 ءپان ءمۇعالىمى جانە اقمولا وبلىسى كوللەدجدەرىنىڭ 25 وقىتۋشىسى ارنايى كۋرستاردان وتەدى. بۇل كۋرستاردا ساباق بەرۋدى ايماقتىق ترەنەرلەر، ءبىزدىڭ ينستيتۋتتىڭ وقىتۋشىلارى ر.مۇقانوۆا، ا.وماروۆا، د.سەيپييەۆ، س.شوكىموۆا جۇزەگە اسىرادى. ولار الماتىدا «ءبىلىم ۇيىمدارىندا «ە-learning» ەلەكتروندىق وقىتۋ جۇيەسىن باسقارۋدى ۇيرەتۋدىڭ، وقىتۋدىڭ تەحنولوگياسى» كۋرستارىندا ءدارىس تىڭداعاننان كەيىن ءتيىستى سەرتيفيكاتتار العان بولاتىن.
بىلىكتىلىكتى ارتتىرۋدىڭ قازىرگى قولدانىلىپ جۇرگەن جۇيەسىندە وقىتۋشىلار قۇرامىن دايارلاۋعا ايرىقشا ءمان بەرىلەدى. كۋرستاردى جۇرگىزۋگە رۇقساتناما الۋ ءۇشىن الدىمەن وعان جاۋاپتى ءاربىر ادام ءتيىستى وقۋدان، تەستىلەۋ پروسەدۋراسىنان ءوتىپ، سىناق تاپسىرۋى كەرەك. سونداي-اق، قىسقا مەرزىمدىك كۋرستاردا دا وقۋ ۇدەرىسى ساپالىق جاعىنان وزگەردى. ينستيتۋت وقىتۋشىلارى سەرتيفيكاتتالعان ترەنەرلەردىڭ ينتەراكتيۆتىك ادىستەمەلەرىن پايدالانىپ، كۋرس تىڭداۋشىلارى ءۇشىن وقۋ-ادىستەمەلىك كەشەندەردى (مانۋالدار) ازىرلەدى. كىرىسپە جانە قورىتىندى تەستىلەۋ ەنگىءزىلدى. وسىناۋ ادىستەر كۋرستىڭ قىزمەتىنىڭ تيىمدىلىگىن كۇشەيتۋگە مۇمكىندىك بەرۋدە.
بۇگىنگى تاجىريبە قازاقستان رەسپۋبليكاسىندا ءبىلىم جۇيەءسىن دامىتۋدىڭ 2011-2020 جىلدارعا ارنالعان مەملەكەتتىك باعدارلاماسىندا بەلگىلەنگەن يدەيالار ناقتى جۇزەگە اسىپ جاتقاندىعىن ايعاقتايدى. ءبىلىم مەكەمەلەرىندەگى يننوۆاسيالىق قايتا قۇرۋلاردىڭ جانداندىرىلۋىنا «ورلەۋ» ۇلتتىق ورتالىعىنىڭ باستاماسىمەن ءوتىپ جاتقان شارالار – تۇڭعىش رەسپۋبليكالىق پەداگوگيكالىق وقۋلار، فيلولوگيا پاندەرى مۇعاءلىمدەرىنىڭ سەزى، «جىل ءادىسكەرى» رەسپۋبليكالىق كونكۋرسى، پەداگوگيكالىق يننوۆاسيالار جارمەڭكەسى، پەداگوگتاردىڭ تامىز كەڭەسى ەداۋىر دارەجەدە ىقپال ەتۋدە. پەداگوگتار ءوز جەتىستىكتەرىن شەبەرلىك سىنىپتارىنىڭ، باياندامالاردىڭ، پىكىرتالاستاردىڭ، كونكۋرستاردىڭ بارىسىندا كورسەتۋگە تولىق ءمۇمكىندىك الدى. قازاقستاننىڭ پەداگوگيكالىق كورپۋسى وتكەن فورۋمداردا ءوز ەڭبەگىنىڭ ناقتى ءناتيجەلەرىن باعامداۋعا، شىعارماشىلىقپەن جۇمىس ىستەۋگە، ءوزىنىڭ كاسىبي شەبەرلىگىن ۇشتاۋعا قول جەتكىزە ءبىلدى.
پەداگوگيكا عىلىمدارىنىڭ دوكتورى گۇلناز احمەتوۆا جەتەكشىلىك ەتەتىن «ورلەۋ» پەداگوگيكالىق قىزمەتكەرلەردىڭ بىلىكتىلىگىن ارتتىرۋ ۇلتتىق ورتالىعىنىڭ كاسىبي بىلگىرلىگىنىڭ، وبلىستىق فيليالداردىڭ بەلسەندى جۇمىسىنىڭ ارقاسىندا العاشقى جىلدىڭ مىندەتتەرىن تابىستى اتقارۋعا قول جەتكىزىلدى. قازىرگى زامانعى كومپيۋتەرلىك تەحنولوگيانى ەنگىزۋ فيليالداردىڭ ورتالىقپەن تۇراقتى بايلانىس جاساۋىنا مۇمكىندىك بەردى – ەلەكتروندىق پوشتا، اكىمشىلىك كەڭەستەر مەن ونلاين تارتىبىندەگى ىلەزدەمەلەر، ۆەبينارلار جەدەل اقپارات الۋعا مۇمكىندىك جاساپ، جۇرگىزىلىپ جاتقان جۇمىسقا ەكپىن بەردى. وسىنىڭ ناتيجەسىندە بىلىكتىلىكتى ارتتىرۋدىڭ ۇلتتىق جۇيەسىنىڭ قالىپتاسۋى قارقىن الىپ كەلەدى. مۇنىڭ ءوزى قازاقستان رەسپۋبليكاسىندا ءبىلىم جۇيەسىن دامىتۋدىڭ مەملەكەتتىك باعدارلاماسىندا قويىلعان مىندەتتەر بۇدان بىلايعى ۋاقىتتا دا تابىستى شەشىلەتىنىن ايعاقتايدى.
دەرەككوز: ەگەمەن قازاقستان
پىكىر قالدىرۋ