قىرعىزستاننىڭ ەكس–پرەزيدەنتى قۇرمانبەك باكييەۆ قىرعىز رەسپۋبليكاسى قىلمىستىق كودەكسىنىڭ "سىبايلاس جەمقورلىق" بابى بويىنشا ايىپتالىپ، 30 جىلعا باس بوستاندىعىنان ايىرىلدى.

ال بۇرىنعى پرەزيدەنتتىڭ كىشى ۇلى ماكسيم باكييەۆتىڭ مۇلكى تاركىلەنىپ، ەرەكشە رەجيمدەگى كولونيادا ءومىر بويىنا باس بوستاندىعىنان ايىرىلدى، دەپ حابارلادى 24.kg اقپاراتتىق اگەنتتىگى.

دامۋ، ينۆەستيسيالار جانە يننوۆاسيالار جونىندەگى ورتالىق اگەنتتىك باسشىسىنىڭ بۇرىنعى ورىنباسارى الەكسەي ەليسەيەۆكە 15 مىڭ سوم ايىپپۇل سالىنىپ، مۇلكى تاركىلەنىپ، 30 جىلعا باس بوستاندىعىنان ايىرىلدى. 

دۇنيەجۇزىلىك بانك اتقارۋشى ديرەكتورىنىڭ بۇرىنعى كەڭەسشىسى سادريددين دجيەنبەكوۆتىڭ مۇلكى تاركىلەنىپ، 10 جىلعا باس بوستاندىعىنان ايىرىلدى.

قارجى ءمينيسترىنىڭ بۇرىنعى ءبىرىنشى ورىنباسارى ەميرلان تورومىرزايەۆ 12 جىلعا باس بوستاندىعىنان ايىرىلدى. سوت ۇكىمىمەن ول جازاسىن جالپى رەجيمدەگى تۇزەۋ كولونياسىندا وتەۋى ءتيىس. ونىڭ مۇلكى تاركىلەندى، سونىمەن قاتار ول ءۇش جىل مەرزىمگە مەملەكەتتىك قىزمەت اتقارۋ قۇقىعىنان ايىرىلدى.

مەملەكەتتىك اپپاراتتىڭ زاڭ ءبولىمىنىڭ بۇرىنعى باسشىسى ەلەنا بەلكوۆسكايا مۇلكى تاركىلەنىپ، توعىز جىلعا باس بوستاندىعىنان ايىرىلدى.

بۇرىنعى تابيعي رەسۋرستار ءمينيسترى قاپار قۇرمانالييەۆ مۇلكى تاركىلەنىپ، 13 جىلعا باس بوستاندىعىنان ايىرىلدى.