ۆيسە-مينيستر رومان سكليار اباي وبلىسىنداعى ورتكە قاتىستى جۋرناليستەردىڭ سۇراعىنا جاۋاپ بەردى. ۆيسە مينيستر ءورت سوندىرۋگە بولاتىن ەڭ اۋەلگى ءساتتى جىبەرىپ العانىمىزدى ايتتى. 

"مۇنداي كەزدە جەدەل ارەكەتكە كوشۋ كەرەك ەدى. وقيعا ورنىندا جاعدايعا دۇرىس باعا بەرىلمەي قالعان. ءورت تەز تاراعان. البەتتە، ادام ءولىمى قاشان دا قايعىلى. ءقازىر پروكۋراتۋرا تەرگەۋ جۇرگىزىپ جاتىر. سودان كەيىن تولىق باعا بەرەدى"، دەدى ۆيسە-مينيستر. 

سونداي-اق رومان سكليار ءورتتى سوندىرۋگە كورشى ەلدەردەن كومەك سۇرالمايتىنىن ايتتى. 

“ءبىزدىڭ ءوز كۇشىمىز جەتەدى. سۇراۋدىڭ قاجەتى جوق”، – دەدى ول.

سوڭعى اقپارات بويىنشا، ءورتتى سوندىرۋگە تجم، ورمان شارۋاشىلىعى كوميتەتىنەن، جاو جانە قورعانىس مينيسترلىگىنەن 1 800-دەن استام ادام، 350-گە جۋىق بىرلىك تەحنيكا جۇمىلدىرىلعان.

وتكەن تاۋلىكتە ءورت وشاقتارىنا اۋەدەن 546 رەت كولەمى 1 500 استام توننا سۋ توگىلدى. ءورتتى ءسوندىرۋ جۇمىستارى باستالعالى بەرى ءورت وشاقتارىنا اۋەدەن 1323 رەت جالپى كولەمى 4000 تونناعا جۋىق سۋ توگىلدى.