اباي وبلىسىندا بولعان الاپات ورمان ورتىنەن كوز جۇمعان 14 ادامنىڭ ءبىرى، ورمانشى سەرىكجان توقتاسىننىڭ اكەسى بولعان جاعداي تۋرالى ايتىپ بەردى. 

سەرىكجان توقتاسىننىڭ اكەسى باقىتجان ءجۇمادىلوۆتىڭ ايتۋىنشا، "نوۆوشۋلبا" ورمان شارۋاشىلىعىنىڭ باسشىلارى ۇلىن ەشبىر قورعانىش كيىمىنسىز ءورت بولعان اۋماققا جىبەرە سالعان.

"كەشكى ساعات 7 دە قىزمەتكەرلەردىڭ ءبارىن جيناپ، 45 كيلومەتر جەردەگى ءورت بولىپ جاتقان ايماققا جىبەرەدى. تۇنگى ساعات 9 دا قالىڭ ءورتتىڭ ورتاسىنا قولدارىنا كۇرەك بەرىپ، كىرگىزىپ جىبەرگەن. كۇندىز باستالعان ءورتتى باسشىلىق باقىلاماعان. ابدەن ۋشىققاننان كەيىن اۋىل–ايماققا كىرىپ كەتەدى دەپ قورقىپ، "نوۆوشۋلبا" ورمان شارۋاشىلىعى قورعاۋ كەرەك دەپ اسىعىس–ۇسىگىس اتتاندىرىپ جىبەرگەن. مەنىڭ بالام ەسكى "نيۆامەن"، باسقالارى بىرەۋدىڭ جەكەمەنشىك ۋاز–ىمەن بارعان" – دەدى ۇلىنان ايىرىلعان اكە

مارقۇمنىڭ اكەسى بالاسىنىڭ ۇستىندە قورعانىش كيىمى دە بولماعانىن ايتتى.

"قورعانىش كيىمدەرى گازدان قورعايتىن قۇرىلعىلارىمەن بىرگە ورمان شارۋاشىلىعىنىڭ قويمالارىندا جاتادى. تەك ءبىر عانا ءورت ءسوندىرۋ كولىگى بارعان. ول ورمان قورعاۋ جونىندەگى ينجەنەر بولىپ ىستەيتىن. ورتالىق وفيستە وتىرىپ، كىمنىڭ قايدا بارۋىن راسيامەن ايتىپ، باسقارۋى كەرەك ەدى. ال بۇل بالانى ديرەكتور مەن ونىڭ ورىنباسارى "سەن سول جەرگە بارۋىڭ كەرەك" دەپ جىبەرە سالعان. ال وزدەرى "ءبىزدىڭ دەنساۋلىعىمىز جوق، ورماننىڭ ىشىندە جۇرە المايمىز" دەپ ايتقان" – دەدى باقىتجان ءجۇمادىلوۆ.

 ول بالاسىنىڭ ءمايىتىن ەكى كۇننەن بەرى ساراپتامادان الا الماي ءجۇر.

"ولاردىڭ ايتۋىنشا، بالام ەڭ ءبىرىنشى ۋلانعان. سودان كەيىن دەنەسىن ءورت شارپىعان. دەنەسىن تانۋ مۇمكىن ەمەس. جەرلەي الماي وتىرمىز. ەندى دنق ناتيجەسىنە بايلانىستى بەلگىلى بولادى دەپ وتىر. ونىڭ قاشان شىعاتىنى تاعى بەلگىسىز"، – دەپ مالىمدەدى سەرىكجان توقتاسىننىڭ اكەسى.

سونىمەن قاتار، باقىتجان ءجۇمادىلوۆ بالاسىنىڭ جالاقىسى نەبارى 80–100 مىڭ تەڭگە عانا بولعانىن ايتتى.

"جالاقىسى العاشىندا 80 مىڭ تەڭگە بولعان. ءقازىر 100 مىڭعا جۋىق الاتىن. وقۋىن ءبىتىرىپ كەلگەننەن كەيىن وسى جەردە بەس جىل ينجەنەر بولىپ جۇمىس ىستەگەن. سودان كەيىن جالاقىم از دەپ پاۆلودارعا جۇمىس ىستەۋگە كەتىپ قالعان. ول جەردە زاۋىتتا جۇمىس ىستەپ، جاپ–جاقسى 200 مىڭ تەڭگە جالاقى الىپ جۇرگەن. ءبىز – زەينەتتەگى ادامدارمىز. شەشەسىنىڭ جۇرەك اۋرۋى بار ەدى. اراسىندا قىسىلىپ، دەمالا الماي قالاتىن. ۇلىمنان باسقا ءۇش قىزىم تۇرمىستا، باسقا جاقتا تۇرادى. سول سەبەپتى ۇيدە ءبىر–بىرىمىزگە كومەكتەسىپ ازەر جۇرگەننەن كەيىن بالامدى ءبىر جارىم اي بۇرىن ەلگە شاقىرىپ العانمىن"، – دەيدى مارقۇمنىڭ اكەسى.

باقىتجان ءجۇمادىلوۆ بالاسىنىڭ ءوز جۇمىسىن جاقسى بىلەتىن، تاپتىرماس مامان ەكەنىن دە تىلگە تيەك ەتتى.

"ورىس ءتىلىن جاقسى بىلگەندىكتەن، بۋحگالتەرلىك ەسەپ-قيساپ جۇمىستارىن اتقاراتىن. سەمەيدەگى باسقارماعا سىناق تاپسىرعاندا ەشقانداي قاتەسىز تاپسىرعان. ءسويتىپ جۇمىسقا بىردەن قابىلدادى. ءوزى كۇزدە نەمەسە قىسقا تامان ۇيلەنەمىن دەپ جوسپارلاپ جۇرگەن. موينىندا ميلليون نەسيەسى دە بار. سونى جاۋىپ، اقشا جيناپ، وتباسىن قۇرعىسى كەلگەن ەدى" – دەدى باقىتجان ءجۇمادىلوۆ.

ەسكە سالا كەتەيىك، "سەمەي ورمانى" تابيعي رەزەرۆاتىندا بولعان ءىرى ءورت سالدارىنان ورمان شارۋاشىلىعىنىڭ 14 قىزمەتكەرى قازا تاۋىپ، 12 ماۋسىم ەلىمىزدە جالپىۇلتتىق ازا تۇتۋ كۇنى بولىپ جاريالاندى.

قازا تاپقانداردىڭ وتباسىلارىنا "قازاقستان حالقىنا" قورىنان 7 ملن تەڭگەدەن، سونداي-اق،  كامەلەتكە تولماعان ءار بالاعا 2 ميلليون تەڭگەدەن تولەنەدى. بۇدان بولەك، قازا تاپقانداردىڭ وتباسىلارىنا جانە زارداپ شەككەندەرگە قاجەتتى قولداۋ شارالارىن كورسەتۋ ماقساتىندا ارنايى قور قۇرىلدى. 

دەرەككوز: stan.kz