قازاقستاندا ءجۇن مەن تەرىنى قايتا وڭدەۋ بويىنشا بىرنەشە جوبا ىسكە اسىرىلۋدا، ەكى جوبانى كەلەسى جىلى ىسكە قوسۋ جوسپارلانۋدا. بۇل تۋرالى ق ر ونەركاسىپ جانە قۇرىلىس ءمينيسترى قانات شارلاپايەۆ پارلامەنت ماجىلىسىندە مالىمدەدى.

وتىرىس بارىسىندا دەپۋتات قاراقات ابدەن قازاقستاندا ءجۇن مەن تەرىنى قايتا وڭدەۋ قاجەتتىلىگى تۋرالى ماسەلەنى كوتەردى. ونىڭ ايتۋىنشا، رەسپۋبليكاداعى وڭدەۋ زاۋىتتارىنىڭ جاعدايى ناشار، سونداي-اق شيكىزاتتى ەلدەن تىس جەرلەرگە اكەتۋدە پروبلەمالار بار. اۋىلدىق جەرلەردە تەرى، ءجۇن ساتاتىن ورىنداردىڭ بولماۋىنا بايلانىستى فەرمەرلەر ولاردى تاستاۋعا نەمەسە ورتەۋگە ءماجبۇر. ال وڭدەلگەن تەرىلەر مەن ءجۇن قازاقستانعا شەتەلدەن بىرنەشە ەسە قىمبات اكەلىنەدى.

"فەرمەرلەر تەرىنى ساتا المايتىندىعىن ەسكەرە وتىرىپ، ولار جىلىنا 30 ملرد تەڭگەگە دەيىن جوعالتادى"، - دەپ اتاپ ءوتتى دەپۋتات.

ونەركاسىپ جانە قۇرىلىس ءمينيسترى قانات شارلاپايەۆ سالانى دامىتۋ ءۇشىن قازىرگى ۋاقىتتا بىرنەشە ءىرى جوبالاردى ىسكە اسىرۋ بويىنشا دايىندىق جۇرگىزىلىپ جاتقانىن، ونىڭ ەكەۋىن 2024 جىلى ىسكە قوسۋ جوسپارلانىپ وتىرعانىن ايتتى.

"ءبىز ەلىمىزدە 40 مىڭ توننا ءجۇن وندىرەمىز، ءبىراق ونىڭ تەك 20% - ى عانا قايتا وڭدەلەدى. 2022 جىلى ءبىز 3،4 ميلليون تەرى الدىق، ءبىراق تەك 22% قايتا وڭدەلەدى. اقتوبە وبلىسىندا ۇبت دامىتۋ قاجەت ەكەنىن تۇسىنەمىز، ءجۇن وڭدەۋ زاۋىتىن سالامىز. جوبا كەلەسى جىلى ىسكە قوسىلادى. بۇل ءجۇندى قايتا وڭدەۋدى 20% - عا دەيىن ارتتىرۋعا مۇمكىندىك بەرەدى. الماتىدا شەتەلدىك ينۆەستورلاردىڭ قاتىسۋىمەن ەكىنشى جوبا - تەرىنى قايتا وڭدەۋ كاسىپورنى. بۇل جوبا جۇزەگە اسىرىلۋدا، كەلەسى جىلى ءبىز ونى ىسكە قوسامىز"، - دەدى مينيستر.