كولىك، جول ماسەلەسى تالقىلانعان ءماجىلىس وتىرىسىندا دەپۋتات ەدىل جاڭبىرشين Air Astana اۋە كومپانياسىنداعى باعا ساياساتىن سىنعا الىپ، كومپانيا باسشىسى پيتەر فوستەرگە اشۋىن توكتى. 

ەدىل جاڭبىرشين ۇشۋ كۇنى جاقىنداعان سايىن بيلەت قۇنىنىڭ وسەتىنىنە نارازىلىق ءبىلدىردى. ونىڭ ۇستىنە بىرنەشە ايدان بەرى رەيس كەشىككەنى ءۇشىن بەرىلەتىن وتەماقىنى ءالى الا الماعان ەكەن. 

“شىنىندا دا Air Astana ءبىزدىڭ اسپانىمىزدىڭ قۇدايى بولىپ العان. بيلەتتىڭ ءبارى جاقىنداعاندا كوتەرىلەدى. ول اراقاشىقتىققا بايلانىستى دەگەن بوس اڭگىمە. بيلەت جاقىنداعاندا قالاي كوتەرىلەدى؟ جاقىنداعان كەزدە كوتەرىلمەۋى كەرەك، باعاسى ءتۇسۋى ءتيىس. ويتكەنى بيلەتتى تەزىرەك وتكىزۋ كەرەك قوي. بۇلار كەرىسىنشە جۇمىس ىستەيدى. Air Astana، لوۋكوستەر ماسەلەسىن مايشاممەن قاراۋ كەرەك. فوستەر مىرزا (Air Astana كومپانياسىنىڭ باسشىسى)، ءسىز شاڭىراققا قاراڭىز. ءسىز وسى مەملەكەتتىڭ زاڭىنا باعىنۋىڭىز قاجەت. مۇسابايەۆ ەكەۋىمىز (ءماجىلىس دەپۋتاتى سامات مۇسابايەۆ) 1 ساعات كەشىككەنگە 3 پايىز ايىپپۇل سالاتىن نورما ەنگىزدىك. ەندى قىزىقتى قاراڭىزدار، 2 تامىزدا Air Astana 12 ساعاتقا كەشىكتى، ءالى كۇنگە دەيىن ايىپپۇلىن الا الماي ءجۇرمىن. نەگە؟ ولار قيتۇرقى سىزبا ازىرلەپ قويعان. سايتقا كىرىپ ءوتىنىم بەرىپ، اقشانى الۋ قيىن. مەن ءالى ءجۇرمىن. ونى الامىن دا. ال ەندى الاتىن بولساڭىز، "جازبالارىڭىزدى، اقشاڭىزدى ەشكىمگە جاريالاماۋ كەرەك" دەپ شارت قويادى”، – دەدى دەپۋتات.

وسى ورايدا ول كولىك ءمينيسترى مارات قارابايەۆقا وتەماقىلاردى الۋدى جەڭىلدەتۋ قاجەتتىگىن ايتتى. دەپۋتاتتىڭ اتاپ وتۋىنشە، اۋە كومپانيا سايتىنان وتەماقىعا ءوتىنىم بەرۋ وتە قيىن.

“Air Astana-نىڭ مۋلتيمەدياسىنىڭ كوبى باسقا تىلدە. مەملەكەتتىك تىلدەگى كونتەنت وتە از. ونى ورنىنا كەلتىرۋ قاجەت. ول دا ۇلكەن ماسەلە. كەڭىستىگىمىزدە ۇشىپ ءجۇر، ءوزىمىزدىڭ كومپانيا سانايمىز. ەندەشە نەگە مەملەكەتتىك تىلگە باسىمدىق بەرمەيدى؟! فوستەر مىرزا، ءسىز پارلامەنتكە ءبىرىنشى رەت كەلىپ وتىرسىز. سىزگە ءبىر رەت قانا سۇراق قويىلدى. ءبىراق، ءسىز قازاقستان اۋماعىنا كەلگەننەن كەيىن ءبىرىنشى كەزەكتە قازاقستان ازاماتتارىنىڭ مۇددەسىن قورعاۋىڭىز، زاڭىن سىيلاۋىڭىز، جاعداي جاساۋىڭىز قاجەت. اقشانى ءبارىمىز دە جاقسى كورەتىن شىعارمىز. ءبىراق، اقشانى جاقسى كورەمىن دەپ بيلەتتى كوتەرە بەرمەڭىز. كۇندە جالاقى كوتەرىلىپ، كۇندە وتىن باعاسى قىمباتتاپ جاتقان جوق. تەرريتوريامىزدىڭ اراقاشىقتىعى كۇندە رەزەڭكە ۇقساپ سوزىلىپ جاتقان جوق. ال سىزدەر باعانى كوتەرەسىزدەر. بيلەت باعاسى 60 مىڭنان 120 مىڭعا دەيىن كەتىپ قالادى”، – دەدى ەدىل جاڭبىرشين.

جيىن بارىسىندا جاڭبىرشين پيتەر فوستەرگە كۇلىپ وتىرعانى ءۇشىن نارازىلىعىن ايتتى. 

“ءسىز كۇلمەڭىز. ءسىز ءبىزدى مەنسىنبەي وتىرسىز. ءبىز سىزگە افريكاداعى ابوريگەن ەمەسپىز. ەشتەڭەنى تۇسىنبەيتىن! ويناماڭىز، ءبىزدى كۇلىپ مەنسىنبەي. بۇل پارلامەنت! وسى جەردە وتىرعانداردىڭ ءبارى – حالىق سايلاعان ادامدار”، – دەدى ول.