بۇگىن استانا قالاسىندا وتكەن قازاقستان مۇسىلماندارىنىڭ ح قۇرىلتايىندا قمدب ءتوراعاسى، باس ءمۇفتي لاۋازىمىنا ناۋرىزباي قاجى تاعان ۇلىنىڭ كانديداتۋراسى ۇسىنىلدى.

قۇرىلتايعا جينالعان 300-گە جۋىق دەلەگات وسى كانديداتۋراعا ءبىراۋىزدان داۋىس بەرىپ، قولداۋ كورسەتىپ، ناۋرىزباي قاجى تاعانۇلىن باس ءمۇفتي لاۋازىمىنا قايتا سايلادى.

قمدب ءتوراعاسى، باس ءمۇفتي ناۋرىزباي قاجى تاعان ۇلى جۋرناليستەرگە بەرگەن سۇحباتىندا: «قۇرىلتايعا ەلىمىزدىڭ ءار وبلىسىنان كەلگەن 300-گە جۋىق دەلەگات مەنىڭ كانديداتۋراما داۋىس بەرىپ، سەنىم ءبىلدىرىپ، باس ءمۇفتي لاۋازىمىنا قايتا سايلادى. بۇل سەنىمدى ابىرويمەن اقتاۋعا بار كۇش-جىگەرىمدى جۇمسايمىن. جوسپارلاپ وتىرعان ءبىرقاتار جۇمىستارىمىز بار. ماسەلەن، الداعى 2025 جىلى قازاقستان مۇسىلماندارى ءدىني باسقارماسىنىڭ دەربەس ءمۇفتيات بولىپ قۇرىلعانىنا 35 جىل تولادى. مەرەيتوي اياسىندا جوسپارداعى كوپتەگەن يگى ىستەردى جۇرت بولىپ جۇمىلىپ، حالىق بولىپ بىرىگىپ اتقارۋعا بارشاڭىزدى شاقىرامىن» دەدى. 

ايتا كەتەيىك، ناۋرىزباي قاجى تاعان ۇلى قمدب ءتوراعاسى، باس ءمۇفتي لاۋازىمىنا ەكىنشى رەت سايلانىپ وتىر.