تيبەت اۆتونوميالىق اۋدانىندا ماگنيتۋداسى 6،8 بولاتىن دۇمپۋلەر تىركەلدى. ولار نەپالدا جانە ءۇندىستاننىڭ كەيبىر بولىكتەرىندە دە سەزىلدى.

سوڭعى مالىمەتتەر بويىنشا، قىتايدىڭ وڭتۇستىك-باتىسىنداعى جەر سىلكىنىسى سالدارىنان كەم دەگەندە 126 ادام قازا تاۋىپ، تاعى 188 ادام جاراقات الدى. تيبەت اۆتونوميالىق اۋدانىندا 7 قاڭتار، سەيسەنبى كۇنى تاڭەرتەڭ ماگنيتۋداسى 6،8-گە جەتكەن جەر سىلكىنىسى تىركەلدى. ولار سونداي-اق نەپالدىڭ كوپ بولىگىندە، اسىرەسە ەلدىڭ شىعىس جانە ورتالىق ايماقتارىندا، سونداي-اق ءۇندىستاننىڭ كەيبىر بولىكتەرىندە سەزىلدى.

ءبىراز ۋاقىتتان كەيىن تيبەتتە ماگنيتۋداسى 4،4-كە جەتەتىن كوپتەگەن جەر سىلكىنىسى تىركەلدى، دەپ حابارلايدى سينحۋا مەملەكەتتىك اگەنتتىگى. قىتايدىڭ CCTV مەملەكەتتىك تەلەارناسى قيراعان ۇيلەردىڭ ءتۇسىرىلىمىن كورسەتتى. جەر سىلكىنىسىنىڭ ەپيسەنترىندەگى كوپتەگەن عيماراتتار قيرادى.

توتەنشە جاعدايلار مينيسترلىگى اپات ورنىندا 1،5 مىڭعا جۋىق قۇتقارۋشىنىڭ عيماراتتار قيراندىلارىنىڭ استىنان قازا تاپقاندار مەن ءتىرى قالعانداردى ىزدەپ جاتقانىن حابارلادى.

قىتايدىڭ سەيسمولوگيالىق جەلى ورتالىعىنىڭ حابارلاۋىنشا، جەر سىلكىنىسىنىڭ وشاعى نەپالمەن شەكاراعا جاقىن ورنالاسقان شيگاسە قالاسىنداعى تينگري وكرۋگىندە بولعان. اقش-تىڭ گەولوگيالىق قىزمەتى 7،1 بالدىق جەر سىلكىنىسى بولعانىن حابارلادى.