2025 جىلعى 23 قاڭتاردا بۇۇ ادام قۇقىقتارى جونىندەگى كەڭەسىنىڭ جۇمىس توبىنىڭ جەنيەۆادا ءوتىپ جاتقان 48ء-شى امبەباپ كەزەڭدىك شولۋ (اكش) سەسسياسى شەڭبەرىندە قازاقستان رەسپۋبليكاسى ادام قۇقىقتارى مەن بوستاندىقتارىن قورعاۋ سالاسىنداعى حالىقارالىق مىندەتتەمەلەردىڭ ورىندالۋى تۋرالى ءتورتىنشى ۇلتتىق باياندامانى قورعاۋ راسىمىنەن ءوتتى.

قازاقستان رەسپۋبليكاسىنىڭ ادام قۇقىقتارى سالاسىنداعى حالىقارالىق مىندەتتەمەلەردى ىسكە اسىرۋى تۋرالى نەگىزگى قۇجاتتى ادىلەت ءمينيسترى ەرلان سارسەمبايەۆ باستاعان دەلەگاسيا ۇسىندى.

قازاقستاندىق دەلەگاسيا قۇرامىنا باس پروكۋراتۋرا، سوت اكىمشىلىگى، ىشكى ىستەر، مادەنيەت جانە اقپارات، سىرتقى ىستەر، ەڭبەك جانە حالىقتى الەۋمەتتىك قورعاۋ، دەنساۋلىق ساقتاۋ جانە وقۋ-اعارتۋ مينيسترلىكتەرى باسشىلارىنىڭ ورىنباسارلارى مەن لاۋازىمدى ادامدارى كىردى.

قازاقستاندىق دەلەگاسيا ءىس-شاراعا قاتىسۋشىلاردى قازاقستان رەسپۋبليكاسىنىڭ سوڭعى بەس جىلداعى ادام قۇقىقتارى سالاسىنداعى نەگىزگى جەتىستىكتەرىمەن جانە مەملەكەت دامۋىنىڭ باستى باسىمدىقتارىمەن تانىستىردى.

ەرلان سارسەمبايەۆ 2019 جىلعى قاراشادا ءۇشىنشى بايانداما ۇسىنىلعان ساتتەن باستاپ، قازاقستان ەلىمىزدى ودان ءارى دەموكراتيالاندىرۋعا باعىتتالعان ءبىرقاتار ماڭىزدى باستامالاردى ىسكە اسىرۋ ارقىلى ادام قۇقىقتارى سالاسىندا ەلەۋلى تابىستارعا قول جەتكىزگەنىن اتاپ ءوتتى.

سوت ءىسىن جۇرگىزۋدى جەتىلدىرۋ ماقساتىندا اكىمشىلىك ادىلەت ىسكە قوسىلدى. 3 جىل ىشىندە ول تيىمدىلىكتى دالەلدەدى، ءادىل، ءتيىمدى جانە قول جەتىمدى ادىلەتتىلىكتى قامتاماسىز ەتتى. قازىرگى ۋاقىتتا پارلامەنتتە اكىمشىلىك ادىلەت سالاسىن كەڭەيتۋگە باعىتتالعان زاڭ جوبالارى بار. قازىرگى ۋاقىتتا سوتتار ولاردىڭ شەشىمدەرىنە، مەملەكەتتىك ورگاندار مەن لاۋازىمدى ادامداردىڭ ارەكەتتەرى مەن ارەكەتسىزدىگىنە شاعىمدانۋ تۋرالى تالاپتاردىڭ 60% - نا دەيىن قاناعاتتاندىرادى.

كونستيتۋسيالىق سوتتى قالپىنا كەلتىرۋدەن جانە اكىمشىلىك راسىمدىك-پروسەستىك كودەكستى قابىلداۋدان باسقا، قازاقستان ازاماتتاردىڭ قۇقىقتارىن قورعاۋ ءۇشىن اكىمشىلىك سوت تورەلىگى ينستيتۋتىن ەنگىزۋدى قوسا العاندا، سوت جۇيەسى سالاسىندا رەفورمالار جۇرگىزدى، سونداي-اق ولاردىڭ اشىقتىعى مەن ەسەپتىلىگىن ارتتىرۋ ماقساتىندا قۇقىق قورعاۋ ورگاندارىنىڭ قىزمەتىن رەفورمالادى.

قازاقستاندىق دەلەگاسيا باسشىسىنىڭ سوزىنەن كەيىنگى ينتەراكتيۆتى ديالوگ بارىسىندا بۇۇ-نىڭ مۇشە مەملەكەتتەرى ادام قۇقىقتارىن قورعاۋدىڭ زاڭنامالىق تەتىگى مەن پراكتيكاسىن جەتىلدىرۋ بويىنشا ءتيىستى ۇسىنىمدارىن ۇسىندى.

قازاقستان رەسپۋبليكاسىنىڭ رەسمي دەلەگاسياسى ۇلتتىق باياندامانى قورعاۋعا قاتىسۋشىلاردىڭ سۇراقتارىنا جاۋاپ بەردى.

شەت مەملەكەتتەردىڭ دەلەگاسيالارى قازاقستان رەسپۋبليكاسىنىڭ ادام قۇقىقتارىن قورعاۋ سالاسىنداعى زاڭنامالىق، پراكتيكالىق جانە باسقا دا شارالاردى دامىتۋداعى جانە ادام قۇقىقتارىن قورعاۋ سالاسىنداعى نەگىزگى حالىقارالىق قۇجاتتاردىڭ باسشىلىق قاعيداتتارىن ورىنداۋداعى ۇدەمەلى ىلگەرىلەۋىن اتاپ ءوتتى.