الەۋمەتتىك جەلىدە بەلسەندىلەر الماتىداعى ابدۋللا روزىباكييەۆ كوشەسىن مۇحتار ماعاۋين اتىنا اۋىستىرۋدى ۇسىنىپ جاتىر.

بۇل باستامانى جەلى قولدانۋشىسى بوتا دن Facebook-تەگى جازباسى ارقىلى جەتكىزدى. ول جازۋشىنىڭ ەڭبەكتەرى ناسيحاتتالىپ، ەسىمى ەل اراسىندا ايتىلىپ جۇرەتىندەي بولۋى كەرەك دەيدى. 

"الماتىنىڭ شەتىندەگى، باياعى پەرەسەلەندەردىڭ سالعان جاپىرايعان ۇسقىنسىز ۇيلەرى ورنالاسقان قيسىق، شولاق كوشەسىنىڭ بىرىنە ەمەس، ورتالىقتاعى كوسىلىپ جاتقان داڭعىلداردىڭ بىرىنە، مىسالى، ۇزىندىعى 7000 مەتر روزىباكييەۆ اتىنداعى كوشەنى مۇحتار ماعاۋين داڭعىلى دەپ اۋىستىرۋعا كۇش سالىپ، ناتيجەسىن شىعارار. روزىباكييەۆ دەگەن ۇلتقا قانداي ەڭبەگى سىڭگەنى بەلگىسىز بىرەۋ"، - دەيدى ول. 

سونداي-اق بەلسەندى الماتىدا ماعاۋين ورتالىعىن اشۋ كەرەكتىگىن ايتتى. اتالمىش باستاما كەلەسى عاسىر جەتەگىنە كەتپەي، "تەمىردى قىزعان كەزىندە سوقتىعا" باسىپ، جاقىن ارادا ىسكە اسىرىلسىن دەيدى ول. 

"جارقىراتىپ ماعاۋين ورتالىعىن اشتىرسىن. الماتىنىڭ كورنەكتى جەرىنە باتىس ەۋروپا سكۋلپتۋرا ۇلگىسىندەي، كورگەن ادام وتە شىقپاي، بۇرىلىپ توقتاپ قارايتىنداي، تاريحي جادىگەر، ەرەكشە كوركەم قۇندىلىعى بار ەسكەرتكىش قويعىزسىن. كىتابىن قولىنا ۇستاپ كورمەگەن اق، قارا، سارى ناسىلدىلەر "بۇل كىم ەكەن؟" دەپ، ەڭ قۇرىماسا ۆيكيپەديانى اشىپ قاراۋى ءسوزسىز، ارى قاراي قىزىعىپ وقىپ، ساناسىنان ساڭىلاۋ اشىلۋى دا مۇمكىن. ناسيحاتتالسىن. مۇحتار ءماعاۋيننىڭ ءاربىر سويلەمى ءوز الدىنا ءومىر سۇرە الاتىن قاناتتى، ماعىنالى. مەكتەپ وقۋ باعدارلاماسىنا ەنگىزىلىپ، تالدانىپ، وقىتىلسىن. وشپەس ەڭبەكتەرى ەكراندالسىن. قاتتى تولعانعانداردىڭ ىشىندە بيلىكتە بولعان، جاقىن جۇرگەندەر دە از ەمەس. دەمەك، كوپىرە سالماي، شىنداپ، قۇلشىنا كىرىسسە، ىسكە اسىرۋعا بولاتىن شارا. "تەمىردى قىزعان كەزىندە سوق" دەيدى عوي، بۇگىنگى ىستەيتىن جۇمىستى ەرتەڭگە قالدىرماۋ كەرەك. سيىرقۇيىمشاقتانىپ كەتىپ، جاڭا قازاقستاندى قۇرىپ جۇرگەندە، حح عاسىر ەنشىسىنە قالىپ كەتەر"، - دەپ ءبولىستى بەلسەندى.