بۇگىن، 25 اقپان كۇنى ق ر ۇلتتىق مۋزەيىندە مادەنيەت جانە اقپارات ءمينيسترى ايدا بالايەۆانىڭ قاتىسۋىمەن 2024 جىلعى جاستارعا ارنالعان پرەزيدەنتتىك ارناۋلى ادەبي سىيلىق جەڭىمپازدارىن ماراپاتتاۋ ءراسىمى ءوتتى.

جيىندا مادەنيەت جانە اقپارات مينيسترلىگى مەن قازاقستان جازۋشۋىلار وداعىنىڭ ستراتەگيالىق ارىپتەستىگى اياسىندا «قازاقستاننىڭ ادەبي-تانىمدىق پانوراماسى» جوباسىمەن جارىق كورگەن 20 جاس قالامگەردىڭ كىتاپتارىنىڭ تۇساۋكەسەرى ءوتتى.

ءىس-شاراعا زيالى قاۋىم وكىلدەرى جانە مينيسترلىك جانىنان قۇرىلعان «القا» جاستار ادەبي كلۋبىنىڭ مۇشەلەرى قاتىستى.

«جاس قازاقستاندىق جازۋشىلار مەن اقىندارعا ارنالعان پرەزيدەنتتىك ادەبي سىيلىق 2023 جىلى پرەزيدەنت جارلىعىمەن تاعايىندالىپ، وتاندىق ادەبيەت الەمىندەگى ماڭىزدى وقيعالاردىڭ بىرىنە اينالدى. بۇل – مەملەكەت باسشىسىنىڭ مادەنيەت سالاسىن جۇيەلى تۇردە جاڭعىرتۋعا باعىتتالعان باستامالارىنىڭ ءبىرى. بۇل سىيلىقتىڭ باستى ماقساتى – شىعارماشىل جاستاردى قولداۋ، جاڭا تۋىندىلاردىڭ جارىق كورۋىنە جول اشۋ. مەملەكەت باسشىسىنىڭ مادەنيەت پەن ونەردى دامىتۋعا ەرەكشە ءمان بەرۋى – ونىڭ ۇستانىپ وتىرعان رەفورمالارى مەن باستامالارىنىڭ زاڭدى جالعاسى. ويتكەنى مادەنيەتتى، ادەبيەتتى دامىتۋ – جاس ۇرپاقتىڭ جان-جاقتى دامۋىنىڭ نەگىزگى تەتىكتەرىنىڭ ءبىرى. ال رۋحاني تۇرعىدان كەمەلدەنگەن، ءبىلىمدى، ەڭبەكسۇيگىش ءارى پاتريوت ازاماتتاردان قۇرالعان قوعامدا زاڭ مەن ءتارتىپ ۇستەمدىك قۇرادى، ادامدار ءوز ارەكەتتەرى ءۇشىن جاۋاپكەرشىلىك الادى، داستۇرگە قۇرمەتپەن قاراپ، ۇلتتىڭ نەگىزگى قۇندىلىقتارىن ارداقتايدى»، – دەدى ايدا بالايەۆا.

مينيستر حالقىمىزدىڭ نەگىزگى قۇندىلىقتارىن ناسيحاتتاۋ – ادەبيەت قايراتكەرلەرىنە جۇكتەلەر اۋىر ءارى مارتەبەلى مىندەت ەكەنىن اتاپ ءوتتى. سونداي-اق، اقىن-جازۋشىلار قوعامنىڭ مورالدىق باعىت-باعدارىن ايقىندايتىن رۋحاني كوشباسشىلار ەكەنىنە توقتالدى.

«سىزدەر ءوز زاماندارىڭىزدىڭ بەينەسىن جاڭاشا جازىپ، جاڭا كوزقاراس قالىپتاستىرۋعا تيىسسىزدەر. ۇلى قالامگەرلەردىڭ جولىن جالعاستىرىپ قانا قويماي، ادەبيەتتى جاڭا بەلەسكە كوتەرۋ – سىزدەردىڭ قولدارىڭىزدا. 20 عاسىرداعى ادەبيەت ادامنىڭ جان الەمىن تەرەڭنەن سۋرەتتەسە، 21 عاسىردىڭ قالامگەرلەرى جاڭا تەحنولوگيالار داۋىرىندەگى ادام تاعدىرى، جاھاندانۋ مەن ۇلتتىق بولمىس، جەكە تۇلعانىڭ كۇرەسى سەكىلدى تاقىرىپتارعا قالام تەربەۋى كەرەك»، – دەدى ايدا بالايەۆا.

باسقوسۋدا بۇگىنگى ادەبي تەندەنسيالار مەن وزەكتى ماسەلەلەر تالقىلانىپ، ءتۇرلى ۇسىنىس-پىكىرلەر كوتەرىلدى.

قازاقستاندىق جاس جازۋشىلار مەن اقىندار ءۇشىن پرەزيدەنتتىك ارناۋلى ادەبي سىيلىعى «پروزا» نوميناسياسى بويىنشا «2026» شىعارماسى ءۇشىن ەسبول سوسيالحانعا، «پوەزيا» نوميناسياسى بويىنشا «بوز ۇشقات» ولەڭدەر جيناعى ءۇشىن جانىبەك باقىت ۇلى ءاليمانوۆقا، «دراماتۋرگيا» نوميناسياسى بويىنشا «اپاتاي» درامالىق تۋىندىسى ءۇشىن اليشەر جەڭىس ۇلى ايتۋارعا، «بالالار ادەبيەتى» نوميناسياسى بويىنشا «روكەت ەرا» پوۆەسى ءۇشىن اسەت جۇكەن ۇلى سىزدىقوۆقا بەرىلدى.

ادەبي سىيلىققا 18-35 جاس ارالىعىنداعى قالامگەرلەر بۇرىن حالىقارالىق جانە ۇلتتىق بايقاۋلارعا قاتىسپاعان تۋىندىلارىمەن قاتىستى.

ايتا كەتسەك، جاس قالامگەرلەر شىعارماشىلىعىن قولداۋ ۇنەمى نازاردا. وتكەن جىلى پرەزيدەنتتىڭ ۇلتتىق قۇرىلتايداعى تاپسىرماسىنا سايكەس، 23 ءساۋىر – ۇلتتىق كىتاپ كۇنى بولىپ بەكىتىلدى. سوعان وراي «ۇلتتىق كىتاپ» بايقاۋى جاريالاندى.

سونداي-اق ق ر مادەنيەت جانە اقپارات مينيسترلىگى قازاقستان جازۋشىلار وداعىمەن «ستراتەگيالىق ءارىپتeستىك» ورناتۋ بويىنشا 3 جاڭا جوبا جۇزگە اسىرعان بولاتىن.

اتاپ ايتقاندا، جاس قالامگەرلەر «قازاقستاننىڭ ادەبي-تانىمدىق پانوراماسى» جوباسى نەگىزىندە ەلىمىزدىڭ ءار قيىرىن ارالاپ، جاڭا شىعارمالار جازدى. جوبا ناتيجەسىندە جىل سوڭىنا دەيىن قازاق ادەبيەتىنە 20 جاڭا تۋىندى قوسىلىپ، ءار جاس قالامگەرگە 4 ملن تەڭگە كولەمىندە قالاماقى تاعايىندالدى.

بۇدان بولەك، 2025 جىل – «جۇمىسشى ماماندىقتارى جىلى». وسى ورايدا، ەڭبەك ماماندىقتارىنىڭ ماڭىزىن اشۋ ماقساتىندا «ەرلىك پەن ەڭبەك داستانى» بايقاۋى وتكىزىلەدى.

سونىمەن قاتار «ايبوز» ۇلتتىق ادەبي سىيلىعى جالعاسىن تاۋىپ كەلەدى. بىلتىر ۇلتتىق سىيلىققا 7 نوميناسيا بويىنشا بۇرىن-سوڭدى ەش جەردە جاريالانباعان 176 تۋىندىنىڭ قۇجاتى قابىلداندى.

ق ر مادەنيەت جانە اقپارات مينيسترلىگىنىڭ باسپا ءسوز قىزمەتى