بجزق زەينەتاقى اكتيۆتەرىن ينۆەستيسيالىق باسقارۋ بويىنشا شولۋدا ەسەپتەلگەن ينۆەستيسيالىق كىرىس بويىنشا شىعىنداردى ءتۇسىندىردى.

قوردىڭ مالىمەتىنشە، 2025 جىلعى قاڭتاردا ەسەپتەلگەن ينۆەستيسيالىق كىرىس مينۋس 284،86 ميلليارد تەڭگە بولعان.

بجزق مالىمەتىنشە، بۇل تەرىس كورسەتكىش شەتەل ۆاليۋتالارى باعامىنىڭ قۇبىلمالىلىعى مەن ول ينۆەستيسيالاعان قارجى قۇرالدارىنىڭ نارىقتىق قۇنىنىڭ وزگەرۋىنەن پايدا بولعان.

"نەگىزگى سەبەپتەرى – تەڭگەنىڭ اقش دوللارىنا قاتىستى 525،11-دەن 518،14 تەڭگەگە دەيىن نىعايۋىنان بولعان ۆاليۋتالىق قايتا باعالاۋ، سونداي-اق قازاقستان رەسپۋبليكاسى قارجى مينيسترلىگىنىڭ مەملەكەتتىك باعالى قاعازدارىنىڭ (مبق) نارىقتىق قۇنىنىڭ، ولاردىڭ كىرىستىلىگىنىڭ ورتاشا ەسەپپەن 40 بازيستىك پۋنكتكە ءوسۋى اياسىندا تومەندەۋى. سونىمەن قاتار، شەتەلدىك نارىقتاردا ساتىپ الىنعان اكتيۆتەردىڭ دە نارىقتىق قۇنى ازايدى"، – دەلىنگەن حابارلامادا.

قاڭتاردا نارىقتاعى قۇبىلمالىلىق اقش پرەزيدەنتى ترامپتىڭ تاريفتەر ەنگىزۋ ءقاۋپى مەن ەڭبەك نارىعىنىڭ تۇراقتىلىعى اياسىندا بايقالدى.

سونىمەن قاتار، بجزق زەينەتاقى اكتيۆتەرىنىڭ سوڭعى 12 ايداعى سالىمشىلار (الۋشىلار) شوتتارىنا بولىنگەن كىرىستىلىگى 15،66 پايىز، ال وسى كەزەڭدەگى ينفلياسيا 8،90 پايىز بولعان.

"2025 جىلدىڭ قاڭتار ايىندا بجزق زەينەتاقى اكتيۆتەرىنىڭ سالىمشىلار (الۋشىلار) شوتتارىنا بولىنگەن كىرىستىلىگى (-)1،25 پايىز بولدى"، – دەلىنگەن حابارلامادا.

جالپى، ۇلتتىق بانكتىڭ سەنىمگەرلىك باسقارۋىنداعى بجزق زەينەتاقى اكتيۆتەرى 22،28 تريلليون تەڭگە بولعان. پورتفەلدىڭ نەگىزگى ۇلەسىن قارجى مينيسترلىگىنىڭ مەملەكەتتىك باعالى قاعازدارى الادى. ولاردىڭ قاڭتار ايىنداعى ۇلەسى 41،40 پايىز بولادى.