«الماتى قالاسىندا نەمەرە اعاسى ىنىسىنە ادامنىڭ اۋزى بارمايتىن حايۋاني زورلىق جاساپ كەلگەن». ەگەر بۇل جايت راس بولسا جانە وسى وقيعانى جازىپ وتىرعان سايتتاردىڭ دەرەگىنە سۇيەنسەك، ماسەلەنىڭ ءمان-جايى تومەندەگىدەي كورىنەدى.
اكەلەرى دۇنيە سالعان ءۇش بالانى – ەكى قىز، ءبىر ۇلدى قايتىس بولعان ازاماتتىڭ اعاسى وپەكۋندىققا، ياعني قامقورلىعىنا الادى. ءۇش بالا قامقورلىققا الىنعان ۇيدە تۇرىپ، ءوسىپ جاتادى. وسى كۇندەردىڭ بىرىندە ءۇش بالانىڭ كىشىسىنە – 11 جاستاعى ۇلعا نەمەرە اعاسى ۇنەمى قيانات جاساۋدى ادەتكە اينالدىرادى. قيانات جاساعاندا ۇرىپ-سوقپايدى – توسەككە تارتادى. بۇل سۇمدىقتى بالا قامقورلىعىنا العان اكەسىنە ايتىپ كورسە، ول مۇنىڭ وزىنە دۇرسە قويا بەرىپ قورقىتادى. بالا سىرتتا ءجۇرىپ كەلسە، تەلەفونىن تەكسەرىپ، تەلەفونىنىڭ داۋىس جازىپ الاتىن اپپارتىن اقتارىپ وتىرادى. ال نەمەرە اعاسى بولسا، ىنىسىنە «ەگەر سەن مەنىڭ ءىسىمدى بىرەۋ-مىرەۋگە ايتار بولساڭ تىرىدەي جەرگە كومەمىن» دەپ زارەسىن ۇشىرادى. بالا بۇل قورلىقتى ءۇش جىل كورەدى. اقىرىندا قورلىققا توزە الماي پوليسيا قىزمەتىنە جۇگىنەدى. پوليسياعا بارماس بۇرىن ول ءۇش بالانىڭ ۇلكەنى – بۇل كەزدەرى تۇرمىسقا شىققان اپكەسىنە بارىپ شاعىنادى. اپكەسى جەتەلەپ بالانى پوليسيا باسقارماسىنا اكەلەدى. پوليسيا قىزمەتكەرلەرى باسىندا اپكەلى-ىنىلى قوس جەتىمەكتىڭ ارىز-شاعىمىن ىسىرىپ تاستاعانعا ۇقسايدى. ىسكە بەلگىلى ءبىر ادۆوكات ارالاسقاننان كەيىن عانا بالانىڭ تاعدىرىنا ءمان بەرىلە باستاپتى.
اسىعىس اقپارات تاراتاتىن سايتتار مەن كورەرمەن اۋديتورياسىن سەلت ەتكىزەر سەنساسيامەن ۇستاپ تۇرۋعا ۇمتىلاتىن تەلەارنالار وسىلاي دەپ جاتىر. جوعارىداعى جايت راسىمەن سۇمدىق! ءبىراق ول شىنىمەن دە سول سولاي ما ەكەن؟.. ويتكەنى بىزگە جەتكەن كەيبىر دەرەكتەر ماسەلەگە باسقاشا قاراۋعا جەتەلەيدى.
الدىمەن العاشقى سۇراق؟ ءۇش بالانىڭ اكەسى ولسە، شەشەسى قايدا؟ سايتتار «سەن بۇل بالالاردى باعىپ جەتكىزە المايسىڭ» دەپ» ۇشەۋىن وپەكۋندىققا العان وتباسى ولاردى اناسىنان اجىراتىپ الىپتى» دەيدى. بۇل – مۇلدە جاڭساق اقپارات. بىزدەگى دەرەككوزى ءۇش بالانى اناسى تاستاپ كەتكەنىن ايتادى جانە وعان ناقتى مالىمەتتەر كەلتىرەدى. سوسىن، اكەسىز قالعان ۇشەۋدى جاڭا وتباسى وپەكۋندىققا ەمەس، قازاقى جولىمەن باۋىرىنا باسىپ، اسىراپ العان. ويتكەنى دۇنيەدەن قايتقان جىگىتتىڭ اعاسى – اكەسىز قالعان ءۇش بالانىڭ ۇلكەن اكەسى. قازاقى اۋلەتتىك ءداستۇر – بۇل. بالالاردى باۋىرىنا باسىپ العان اكە ۇكىمەتتەن جاردەماقى سۇرامايدى، جەتىمدەردى باعىپ وتىرمىن دەپ ەشكىمگە مىندەتىن ارتپايدى. مۇنى «ءبىر» دەپ قويىڭىز. ەكىنشىدەن، بالالارعا اتا-انا بولىپ وتىرعان وتباسىندا الگىندەي زورلىق-زومبىلىقتىڭ بولۋى مۇمكىن بە؟ 11 جاستاعى بالانى نەمەرە اعاسى توسەككە تارتىپ زورلايدى ەكەن، سونى بىلە تۇرا ءۇيدىڭ وتاعاسى كۇندە قيانات كورىپ، جانى كۇيزەلىپ جۇرگەن بالانى قورعاۋدىڭ ورنىنا ءوزىنىڭ تۋعان ۇلىنىڭ ارەكەتىن قولداعانداي بولادى. شاماسى، بۇل وتباسىندا ادامدار ەمەس، قانداي دا ءبىر سەكسمانياكتار، زومبيلەر تۇراتىن بولسا كەرەك. انىعىندا نەمەرە ىنىسىنە «زورلىق جاساپ» جۇرگەن اعانىڭ دا بالاسى بار بولىپ شىقتى. جانە ول بالا «نەمەرە اعام مەنى توسەككە تارتادى، ءتۇن ىشىندە كەلىپ زورلايدى» دەپ، پوليسياعا شاعىم تۇسىرگەن بالامەن تۇيدەي جاستى ەكەن ءارى ەكەۋى ءبىر بولمەدە، قاتار سالىنعان توسەكتە جاتادى ەكەن. سوندا بالاسى ۇيىقتاپ جاتقان بولمەگە كىرىپ اكەسى بالاسىنداي بالانىڭ ۇستىنە كەلىپ ارتىلا ما؟ نەمەسە جىنىستىق قاتىناستىڭ باسقا ءتۇرىن جاساي ما؟ بۇل نە قىلعان ازعىندىق؟ قايدان شىققان ازعىندىق؟ الدە الگى سايتتاردىڭ تۇرتپەكتەپ وتىرىپ ايتپاعى، «مىنە، قازاق وسىنداي ازىپ-توزعان حالىق» دەگەنگە سايا ما؟ تۇسىنبەدىك.
ءۇش بالانى ىستىق باۋىرىنا باسقان انا بار. ول وسى كۇنى اڭىراپ، كوكىرەگى قارس ايرىلىپ وتىر. ونىڭ ءسوزىن، ءتىپتى ونىڭ بار-جوعىن ەلەڭ قىلىپ جاتقان ەشكىم جوق. ول بەيباقتى دا ءبىر ۋاق تىڭداۋعا بولار ەدى عوي. الايدا ءبىر جاقتى اقپارات تارتىپ قويىپ، حايپ قۋىپ وتىراتىندارعا ونىڭ ءۇنى، زارى كەرەك ەمەس.
«بالا زورلاعىش» نەمەرە اعا قايدا ءجۇر؟ ونى نەگە پوليسيا تەرگەپ-تەكسەرمەيدى؟ بالكىم ول پسيحولوگيالىق اۋىتقۋى بار اۋرۋ ادام شىعار؟ مەديسينالىق سىناما الىندى ما؟ زورلانعان بالانىڭ تانىندە جاراقات بار ما؟ «الماتىدا مەكتەپ وقۋشىسى زورلاندى» دەپ ايقاي سالىپ وتىرعان سايتتار وسى جانە وزگە دە سۇراقتارعا جاۋاپ ىزدەي وتىرىپ ماقالا جازسا، ءجون بولار ەدى. ازىرگە ءبىز ولاردان ونداي وبەكتيۆتىلىكتى كورىپ وتىرعان جوقپىز. ءبىراق بىرەسە باسىنا قاپ كيگىزىپ ۆيدەوعا ءتۇسىرىپ، بىرەسە قولىمەن بەتىن كولەگەيلەپ كورسەتپەگەن بولىپ «زورلانعان بالانى» ولار دا «زورلاپ» جاتىر. ماسەلەنىڭ انىق-قانىعىنا جەتپەي ۇشقارى تۇردە جاريالانىپ جاتقان بۇل اقپاراتتار بالانىڭ قۇقىعىن قورعاپ ەمەس، قورلاپ جاتىر، وعان پسيحولوگيالىق قىسىمدى ارتتىرىپ جانە بارلىق جاسوسپىرىمدەردىڭ ءومىرىن ۇرەيگە تولتىرۋدا.
ءبىزدىڭ قوعام قۇقىق قورعاۋ ورگاندارىن قاشاندا كىنالاي جونەلۋگە دايىن تۇرادى. بالانىڭ ىسىنە ارالاسقان ادۆوكات تا، بالانىڭ تاعدىرىنا جانى اشىعانسىپ وتىرعان سايتتار مەن تەلەارانا دا پوليسيا مەن پروكۋراتۋرانىڭ ۇستىنە اكەلىپ بارلىق بىلىقتى ءۇيىپ تاستادى. بۇل جەردە دە قيسىن مەن شىندىق شامالى. ويتكەنى انىق قىلمىستىڭ بەلگىسى بايقالاسا، ونىڭ بەتىن جىلى جاۋىپ قويا سالۋعا بولمايتىنىن پوليسيا دا، پروكۋراتۋرا دا جاقسى بىلەدى. ال ولار ءىستىڭ ءمان-جايىن ءبىلىپ وتىر، سوندىقتان دا جارياعا جار سالماي وتىر. الايدا اشۋشاڭ ادۆوكات پەن ءباسپاسوزدىڭ ىقپالى قۇقىققورعاۋ ورگاندارىن «بالا زورلاعىش» نەمەرە اعانىڭ ۇستىنەن قىلىمىستىق ءىس قوزعاۋعا يتەرمەلەگەن كورىنەدى. مۇنىڭ سوڭى نەمەرە اعانىڭ ءىستى بولىپ، سوتتالىپ كەتۋىنە جەتسە، ءبىز وعان تاڭعالمايمىز. ارينە، نەمەرە اعانىڭ جەكە باسى تولىق تەرگەپ، تەكسەرىلۋى كەرەك. ەگەر ول سونداي حايۋاندىق ارەكەتكە بارعان بولسا، جازاسىن دا الۋى كەرەك.
P.S. ءبىزدىڭ بىلۋىمىزشە، ايرانداي ۇيىپ وتىرعان وتباسىنىڭ تىرلىگىنە بوتەن بىرەۋلەر ارالاسىپ، الاتايداي ءبۇلدىرىپ جاتقان كورىنەدى. جوعارىداعى شۋ-شۇرقان سودان شىعىپ جاتىر-مىس. ونى دا رەتى كەلگەن كەزدە وقىرمانعا جەتكىزەتىن بولامىز.
