الماتى. قازاقپارات - الماتىدا «سۇيىسپەنشىلىكپەن...» دەپ اتالاتىن قازاقستاندىق جاڭا تەلەجوبا اياسىندا «الماتى-امستەردام» اۆتوشەرۋى ۇيىمداستىرىلادى. بۇل تۋرالى بۇگىن الماتىدا وتكەن باسپا ءسوز بريفينگى بارىسىندا وسى تەلەجوبانىڭ رەجيسسەرى ابدەل ەلۋبايەۆ مالىمدەدى.

«بۇل اۆتوشەرۋ ەلىمىزدە 2017 جىلى بولاتىن «ەكسپو-2017» حالىقارالىق كورمەسى مەن قىسقى ۋنيۆەرسيادا ويىندارىنا باعىشتالىپ وتىر. بۇل جوبانىڭ ماقساتى قازاقستاندى بۇكىل ەۋروپا كەڭىستىگىنە تانىتۋ. بۇل يدەيا وسىدان جارتى جىل بۇرىن تۋىنداعان ەدى. ءبىز ءوز كۇشىمىزبەن تۋريزم سالاسىنا قاتىستى وتە ءبىر ساپالى تەلەباعدارلاما جاساۋدى ارماندادىق. ءسويتىپ،  «سۇيىسپىنشىلىكپەن... الماتىدان!» دەپ اتالاتىن قاناتقاقتى العاشقى حاباردى دايىندادىق. كورەرمەندەر وعان وڭ باعا بەرگەن سوڭ، ءبىز مۇنىمەن شەكتەلىپ قالماۋدى ءجون كوردىك. سودان اۆتوكولىكپەن ءجۇرىپ وتىرىپ، بولعان جەرلەرىمىزدە جەرگىلىكتى جۇرتشىلىقپەن كەزدەسۋلەر وتكىزىپ، قازاقستان جايلى تۇسىرگەن فيلمدەرىمىزدى كورسەتۋدى جانە بولعان جەرلەرىمىز جايلى ءوز  كۇشىمىزبەن تەلەحابارلار ازىرلەپ شىعارۋدى ۇيعاردىق. سودان 8 ادامنان قۇرالعان كوماندا قۇرىلدى. ونىڭ قۇرامىندا رەجيسسەر، پروديۋسەر، ەكى تەلەجۇرگىزۋشى، دىبىس رەجيسسەرى، فوتوگراف، اكىمشى جانە ءبىر اۆتوكولىك جۇرگىزۋشىسى بار»، - دەدى ا. ەلۋبايەۆ.

ايتا كەتەلىك، «الماتى-امستەردام» اۆتوشەرۋىنە قاتىسۋشىلار  ۇستىمىزدەگى جىلى 8 قازاندا الماتىدان دەمەۋشىلەر ۇسىنعان ەكى اۆتوكولىكپەن جولعا شىعادى. ساپار بارىسىندا شىعارماشىلىق توپ استانا، ماسكەۋ، مينسك، برەست، ۆارشاۆا، پراگا، بەرلين، پاريج جانە امستەردام قالالارىندا بولادى.

«35 كۇنگە ارنالعان اۆتوشەرۋ بارىسىندا وعان قاتىسۋشىلار 30 مىڭنان استام شاقىرىمدى باسىپ وتەدى. بۇعان شامامەن 5 توننا بەنزين جۇمسالادى»، - دەدى ءوز سوزىندە «الماتى-امستەردام» اۆتوشەرۋىنە جانارماي جاعىنان دەمەۋشىلىك كورسەتكەن  - «گازپرومنەفت-قازاقستان» ج ش س جەلىلىك جەتەكشىسى مارات مالاتايەۆ.

ۇيىمداستىرۋشىلاردىڭ ايتۋىنشا، اۆتوشەرۋ بارىسىندا تۇسىرىلگەن تەلەحابارلار الداعى ۋاقىتتا وتاندىق تەلەارنالاردىڭ بىرىنەن كورسەتىلەدى. 

"قامشى"سىلتەيدى

دەرەككوز: قازاقپارات