مۇحتار اۋەزوۆ اتىنداعى وڭتۇستىك قازاقستان مەملەكەتتىك ۋنيۆەرسيتەتى – ەلىمىزدەگى مادەنيەت سالاسىنا ماماندار دايارلايتىن ۇزدىك وقۋ ورىندارىنىڭ ءبىرى. وڭتۇستىكتەگى ءىرى شىعارماشىلىق ورتالىق رەتىندە تانىلعان ءبىلىم ورداسى كوپتەگەن تالانتتى جاستاردىڭ ەسىمدەرىن ەلگە ايگىلەپ، ونەر سالاسىندا تالاي بيىكتەردى باعىندىردى. وسى جەتىستىكتەرگە، اسىرەسە، بيىل وتىز جىلدىعىن اتاپ ءوتىپ وتىرعان ۋنيۆەرسيتەتتىڭ حورەوگرافيا كافەدراسىنىڭ دا قوسقان ۇلەسى ەرەكشە. 30 جىلدىق تاريحىندا كافەدرانىڭ شاكىرتتەرى رەسپۋبليكالىق جانە حالىقارالىق كوپتەگەن بايقاۋلاردا مىقتىلىعىن مويىنداتىپ، جۇلدەلى ورىندارعا يە بولدى. كافەدرا جانىنان اشىلعان «قاراكوز» بي ءانسامبلىنىڭ جەتكەن جەتىستىكتەرى ءبىرتالاي، ياعني ش.جيەنقۇلوۆا اتىنداعى رەسپۋبليكالىق بي كونكۋرسىنىڭ 2 دۇركىن لاۋرەاتى، حالىقارالىق «شابىت» بايقاۋىنىڭ ءى ورىن يەگەرى، تاعى باسقا ءدۇبىرلى شارالاردىڭ جەڭىمپازى اتاندى. بۇل جەڭىستەر، ارينە – ونەرگە دەگەن شىنايى سۇيىسپەنشىلىك پەن قاجىرلى ەڭبەكتىڭ ناتيجەسىندە كەلدى.

كافەدرا مەرەيتويىنىڭ قۇرمەتىنە وراي ۋنيۆەرسيتەتتە «الەم حالىقتارىنىڭ بيلەرى» اتتى حالىقارالىق فەستيۆال وتكىزىلدى. ايتۋلى ءىس-شاراعا ەلىمىزدىڭ عانا ەمەس، سونداي-اق، شەتەلدىڭ دە بيشىلەرى، اتاپ ايتقاندا، باشقۇرتستاننىڭ، وزبەكستاننىڭ، قىرعىزستاننىڭ، قاراقالپاقستاننىڭ ءجا­نە رەسەيدىڭ بي ۇجىمدارى ارنايى كەلىپ قاتىستى. وتە جوعارى دەڭگەيدە وتكەن فەس­تيۆال بارىسىندا ونەر ۇجىمدارى كو­رەرمەندەردى شەبەرلىگىمەن ءتانتى ەتتى. مە­رەكە اياسىندا شەبەرلىك سىنىپتارى ءجا­نە عىلىمي-تاجىريبەلىك كونفەرەنسيا ۇيىم­داستىرىلدى.

كافەدرا مەڭگەرۋشىسى، تانىمال ۇستاز بالجان تىلەۋبايەۆا شاكىرتتەرىنىڭ تالانتىنا شۇكىرشىلىك ەتىپ، بي ونەرىندە تابىسقا جەتۋدىڭ وڭاي ەمەستىگىن العا تارتتى.

– تالانتتى شاكىرتتەر تاربيەلەۋ ءۇشىن، بىلىكتى ۇستازدار قاتارىنىڭ بولۋ قا­جەتتىگى زاڭدىلىق. وسى مىندەتتى جاقسارتۋ ماقساتىندا ءبىز جاس وقىتۋشىلاردىڭ بالەتمەيستەرلىك بىلىكتىلىگىن جوعارىلاتۋ جانە ستۋدەنتتەردىڭ ورىنداۋشىلىق شە­بەرلىگىن ارتتىرۋ ءۇشىن وزگە وقۋ ورىندارىمەن، سول سياقتى رەسپۋبليكالىق جانە حالىقارالىق تانىمال شىعارماشىلىق ۇجىمدارمەن تىعىز بايلانىس ورناتۋعا بارىمىزدى سالدىق، – دەيدى بالجان سەيدىرامان قىزى.

وسىنداي شىعارماشىلىق قاتىناس­تار­دىڭ ناتيجەسىندە كافەدراعا وزبەك­س­ت­ا­ن رەسپۋبليكاسىنىڭ حالىق ءارتىسى، مەم­لەكەتتىك «ۋزبەكيستان» بي ءانسامبلىنىڭ باس بالەتمەيستەرى ك.مۋمينوۆ، ت.ءجۇر­گەنوۆ اتىنداعى قازاق ۇلتتىق ونەر اكادە­مياسىنىڭ فاكۋلتەت دەكانى ك.ان­داسوۆ جانە ن.گونچاروۆا، گ.سايتوۆا، ە.اسىل­عازىنوۆ سىندى بەلگىلى حورەوگرافتار ار­نايى شەبەرلىك سىنىپتارىن وتكىزۋگە شا­قىرىلدى. ال مودەرن ءبيى بويىنشا ءيزرايلدىڭ زاماناۋي بي تەاترىنىڭ بالەت­مەيس­تەرى، كەشەگى كافەدرا تۇلەگى ە.سيم­بروۆسكايا، فرانسيادان زاماناۋي «حيپ-حوپ» ءستيلىنىڭ دۇلدۇلدەرى، الەمدىك دەڭگەيدەگى بيشى-حورەوگراف جان-كلود ۆۋاياكو مەن ءبيشى ب.ۆۋاياكو شەبەرلىك سىنىبىن وتكىزدى.

جالپى، ۋنيۆەرسيتەت قوعامدا سۇرانىسقا يە مادەني تىنىعۋ قىزمەتى ماماندارىن سوناۋ 1967 جىلدان بەرى دايارلاپ كەلەدى. اۋەلگىدە بۇرىنعى ءال-فارابي اتىنداعى شىمكەنت پەداگوگيكالىق مادەنيەت ينستيتۋتى جانىنان قۇرىلعان مادەني تىنىعۋ قىزمەتى كافەدراسى 1998 جىلدان باستاپ وقمۋ-دىڭ قۇرامىنا ەندى. كەڭەس وداعى تۇسىندا ەلىمىزدىڭ ەشبىر وقۋ ورنىندا مۇنداي كافەدرانىڭ بولماعانىن ەسكەرسەك بۇل ءبىلىم وشاعىنداعى شاكىرتتەرگە لە­نينگراد، ماسكەۋدەگى اتاعى جەر جارعان مادەنيەت ينستيتۋتتارىن ءتامامداپ كەلگەن ۇستازدار ءتالىم بەردى. قازىرگى تاڭدا اتالمىش مامانداردى ەلىمىزدىڭ التى مەملەكەتتىك وقۋ ورنى مەن ءۇش جەكەمەنشىك ءبىلىم ورداسى دايارلايدى. مادەنيەت سالاسىنىڭ جىلىگىن شاعىپ، مايىن ىشەتىن مامانداردى دايارلايتىن وقۋ وردالارىنىڭ قاراشاڭىراعىنا اينالعان كافەدرا بۇگىندە ەلىمىزدەگى ءبىر­دەن-بىر ادىستەمەلىك كەڭەس ورتالىعى بو­لىپ وتىر. ياعني رەسپۋبليكاداعى توعىز وقۋ ورنى وسى كافەدرا وقىتىپ جاتقان باعدارلاما بويىنشا ساباق بەرەدى، ءوقۋ-ادىس­تەمەلىك قۇرالدارمەن دە وسىنداعى ۇس­تازدار قامتاماسىز ەتەدى. بۇدان بولەك مۇندا مادەنيەت جانە ونەر قىزمەتكەرلەرى مەن رەسپۋبليكالىق بىلىكتىلىك جەتىلدىرۋ كۋرسى دا بار.

كوپتەن بەرى ۋنيۆەرسيتەتتە شاكىرت تاربيەلەپ كەلە جاتقان ۇلاعاتتى ۇستاز، پەدا­گوگيكا عىلىمدارىنىڭ دوكتورى، پروفەسسور ءناسىپحانىم كامال قىزىنىڭ ايتۋىنشا، مادەنيەت قىزمەتكەرلەرى حالىققا ەڭ قاجەتتى ماماندىق يەلەرىنىڭ ءبىرى. «ءبىزدىڭ ماقساتىمىز – ەلىمىزدىڭ مادەنيەت سالاسىن ودان ءارى دامىتۋ، كوركەيتۋ. ءبىز شاكىرتتەردى الدىمەن ماماندىققا باۋلۋدان بۇرىن ادام بولۋعا تاربيەلەيمىز. وقۋ ورنىنىڭ ىسكەر باسشىسى جۇماحان مىرحالىقوۆتىڭ دا قويىپ وتىرعان باستى تالابى وسى»، – دەيدى ءناسىپحانىم كامال قىزى.

وڭتۇستىك قازاقستان مەملەكەتتىك ۋني­ۆەرسيتەتى – ىرگەلى ءبىلىم جانە مادەنيەت ورداسى، تالايلاردى ءتانتى ەتكەن تالانتتاردىڭ ەسىمىن پاش ەتكەن وقۋ وشاعى. ناعيما ەسقالييەۆا، ماقپال ءجۇنىسوۆا، مارات وما­روۆ، رينات عايسين، ەدۋارد مالبەكوۆ، لۇقپان ەسەنوۆ، زاميرا قاستەيەۆا، رايحان قالانوۆا، فەرۋزا جولىنبەتوۆا ءتارىزدى ەلگە تانىمال مادەنيەت قايراتكەرلەرى، وتاندىق ەسترادا جۇلدىزدارى دا وسىنداعى ۇستازداردىڭ تاربيەسىن كوردى.

راسىندا دا، وڭتۇستىكتەگى مادەنيەت سالاسى وزگە وڭىرلەرگە قاراعاندا مەيلىنشە دامىعانى جاسىرىن ەمەس. ءبىر عانا وبلىس­تىڭ وزىندە التى بىردەي تەاتردىڭ جۇمىس ىستەۋى، سيرك، فيلارمونيا سەكىلدى ودان باسقا دا ءتۇرلى مادەني نىسانداردىڭ بەلسەندىلىگى ونەرگە جاقىن جاستارعا جول اشادى. سوندىقتان، وقمۋ-دىڭ تۇلەكتەرىنە ءاۋ باستان-اق سۇرانىس ءبىلدىرىپ جاتاتىندار وتە كوپ. قولىنا ديپلومىن ۇستاعان بىتىرۋشىلەردىڭ باستى پروبلەماسى جۇمىس تابۋ ەكەنى راس. ايتكەنمەن، ۋنيۆەرسيتەتتى شىعارماشىلىق ماماندىقتار بويىنشا ءتامامداعان جاستار بۇگىندە رەسپۋبليكا، وبلىس كولەمىندەگى ءتۇرلى قىزمەت ورىندارىندا جەمىستى ەڭبەك ەتۋدە. ماسەلەن، جۇمات شانين اتىنداعى وبلىستىق قازاق دراما تەاترىنىڭ، وبلىستىق وپەرا جانە بالەت، ساتيرا تەاترىنىڭ، شىمكەنتتىڭ ماقتانىشى ءارى برەندىنە اينالعان «وڭتۇستىك سيرك» مەكەمەسىنىڭ تىزگىنىن ۇستاپ وتىرعاندار وسى ءبىلىم وشاعىن ءتامامداپ شىققاندار.

ۇستازدار قاۋىمى ستۋدەنتتەردىڭ بويىن­داعى وزىندىك قابىلەتتەرىن اشۋعا ەرەكشە ءمان بەرەدى. تەوريالىق ساباقتاردان بولەك وقۋ ورنىندا ءبىر ستۋدەنتتىڭ جەكە مۇعالىمنەن ءدارىس الۋىنا مۇمكىندىك جاسالعان. ءار سالا­عا قاجەتتى قۇرال-جابدىقتارمەن قامتا­ماسىز ەتىلگەن اۋديتوريالار دا جەتكىلىكتى. ايتا كەتەرلىگى، ءبىر توپتا ون ستۋدەنت بول­سا شىعارماشىلىق پاندەردەن وتۋگە ءارقاي­سىسىنا جەكە ءمۇعالىم بولىنەدى. سەبەبى، شاكىرتتىڭ بويىنداعى قابىلەتتى اشۋ وڭاي شارۋا ەمەس. ستۋدەنتكە ءوز ويىن اشىق ايتىپ، ماسەلەن، اكتەرلىك شەبەرلىكتى دامىتۋ ساباعى بولسا وعان بەرىلگەن ءرولدى ەرىنبەي تاماشالاپ، ەركىن قوزعالۋىنا مۇمكىندىك جاساۋ قاجەت. ونىڭ قولىنان كەلەتىنىنە سەندىرىپ، شابىتتاندىرسا عانا ول بۇعىپ جاتقان ونەرىن سىرتقا شىعارا الادى. ءشا­كىرتتەرگە مۇنداي مۇمكىندىكتى كەز كەلگەن وقۋ ورنى جاساي المايدى. مۇنىڭ ءبارى وقۋ ورنى باسشىسىنىڭ تىكەلەي قولداۋىمەن جۇزەگە اسىپ جاتقان دۇنيەلەر.

ونەرلى جاستاردىڭ ورداسىندا ونەر ۇجىمدارىنىڭ بولماۋى مۇمكىن ەمەس. وقۋدى پراكتيكامەن ۇشتاستىرۋ ءۇشىن كافەدرادا 4 ستۋدەنتتىك ۇيىرمە قۇرىلعان. بۇل «ىزدەنىس» عىلىمي-زەرتتەۋ ۇيىرمەسى، «قيسىق اينا»، شىمشىما» ساتيرالىق تەاترى، ستۋدەنتتىك كتك (كۆن)، بۇلاردان بولەك «دۋمان» جاستار حالىق تەاترى. ونەر ۇجىمدارى رەسپۋبليكالىق، وبلىستىق كونكۋرستاردا تالاي رەت توپ جارىپ، ۇزدىك ەكەندىكتەرىن مويىنداتىپ كەلەدى. ماسەلەن، «شۋىلداقتار» كتك كومانداسى قازاقستان رەسپۋبليكاسىنىڭ چەمپيونى اتاندى. ۋنيۆەرسيتەتىشىلىك كىشىگىرىم «دۋمان» تەاترىنىڭ حالىق تەاترى اتالىپ كەتۋى دە كوپ نارسەنى اڭعارتسا كەرەك. وسىدان 6 جىل بۇرىن قۇرىلعان ستۋدەنتتىك، حالىقتىق «دۋمان» تەاترىنىڭ جوسپارى كوپ. جاس ۇجىم ەلىمىزدىڭ الىپ قالالارىندا وتەتىن بايقاۋلاردا ب ا ق سىناپ، شىمقالانىڭ ابىرويىن اسقاقتاتۋدى ماقسات ەتىپ وتىر.

جاستارعا تەرەڭىرەك ءبىلىم بەرۋ ماق­ساتىندا 2003 جىلدان باستاپ «مادەني تىنىعۋ قىزمەتى» ماماندىعى بويىنشا ماگيستراتۋرا اشىلعان. ەندى، مىنە، ۋنيۆەرسيتەت باسشىلىعى بيىلدان باستاپ مۇمكىندىكتەرىن كەڭەيتىپ دوكتورانتۋرا اشۋعا ۇمتىلۋدا. گرانت سانى از بولىنەتىن، ءبىراق جاۋاپكەرشىلىگى مول، ارقالايتىن جۇگى اۋىر ماماندىقتا وقيتىن ستۋدەنتتەرگە ۋنيۆەرسيتەتتەن ءبىرقاتار جەڭىلدىكتەر قاراستىرىلىپتى. جەتىم، مۇگەدەك جانە الەۋمەتتىك جاعدايى تومەن جانە وقۋ ۇلگە­ءرىمى جوعارى بالالاردىڭ وقۋ اقىسىنا 50-70 پايىزعا دەيىن جەڭىلدىك الۋلارىنا مۇمكىندىك بار. كافەدرانىڭ عىلىمي شىعارماشىلىق كۇش-قۋاتى وتە جوعارى.ۇجىمدا 2 عىلىم دوكتورى، 11 عىلىم كانديداتى، 4 پروفەسسور، 1 حالىق ءارتىسى، 4 مادەنيەت قايراتكەرى، 8 حالىقارالىق كونكۋرستار مەن فەستيۆالدەردىڭ لاۋرەاتتارى جۇمىس ىستەيدى. 1998 جىلدان باستاپ «مادەني تىنىعۋ قىزمەتى» كافەدراسىنىڭ وقىتۋشىلارى اۆتورلىق ۇجىم رەتىندە مەملەكەتتىك ءبىلىم بەرۋ ستاندارتى، ۇلگىلىك جوسپارلار مەن «مادەني تىنىعۋ جۇمىسى» ماماندىعى بويىنشا باكالاۆريات، ماگيس­تراتۋرا جانە PhD دوكتورانتۋراعا ۇلگىلىك باعدارلامالار وڭدەپ كەلەدى. بۇلاردى وسى سالا بويىنشا ماماندار دايارلايتىن ەلىمىزدەگى جوعارى وقۋ ورىندارى پايدالانادى. ءبىر ايتا كەتەرلىگى، وسىنداي مىقتى ۇستازداردىڭ ءتالىمىن كورۋگە وبلىستىڭ جاستارى عانا ەمەس، وزگە دە وڭىرلەر مەن قالالاردىڭ جاستارى ىنتىق. جىل سايىن استانادان باستاپ كورشى وبلىستاردان كەلىپ وقيتىن ستۋدەنتتەر از ەمەس ەكەن.

ءبىلىم ساپاسى، عىلىمي جەتىستىكتەرىمەن عانا ەمەس، سپورت سالاسىنداعى چەمپيوندارىمەن دە اتاعى ءدۇيىم جۇرتقا ءمالىم وقمۋ-دان شىققان سپورت ساڭلاقتارىن تانىستىرىپ جاتۋدىڭ ءوزى ارتىق. فۋتبولدان بولەك مۇندا باسكەتبول، ۆولەيبول، كوركەم گيمناس­تيكا، ۇستەل تەننيسى، بوكس، ەركىن كۇرەس، اۋىر جانە جەڭىل اتلەتيكا، وق اتۋ، دزيۋدو تاعى باسقا سپورت تۇرلەرىنەن رەسپۋبليكالىق، حالىقارالىق جەڭىمپازدار ءبىلىم الۋدا جانە تۇلەپ ۇشقان. تەك ۋنيۆەرسيتەتتىڭ بيىلعى سۋ جاڭا چەمپيوندارىن اتاپ وتسەك. ولار – وڭتۇستىك كورەيانىڭ كۆاندجۋ قالا­سىندا وتكەن دۇنيەجۇزىلىك ۋنيۆەرسيادادا تاەكۆاندو سپورتىنان التىندى قان­جىعاسىنا بايلاعان نۇرسۇلتان مامايەۆ پەن ستەندتىك اتۋدان قولا مەدالداردى يەلەنگەن انگەلينا مينششۋك، ۆلاديمير پوچيۆالوۆ، الەكساندر ەرشوۆ.

سپورتتىق جەتىستىكتەرى جونىنەن ۋنيۆەرسيتەت رەسپۋبليكامىزداعى جوعارى وقۋ ورىندارى اراسىندا ۇزدىكتەردىڭ قاتا­رىندا. وقۋ وشاعىندا جاستاردىڭ سالاماتتى ءومىر سالتىن ۇستانىپ، سپورتپەن اينالىسۋىنا بارلىق جاعداي جاسالعان. سونىڭ ىشىندە ءتۇرلى جارىس، تۋرنيرلەر كوپتەپ ۇيىمداستىرىلىپ ءجۇر. اسىرەسە، كىشى فۋتبولدان ۇلتتىق ستۋدەنتتىك ليگانىڭ تانىمالدىلىعى كۇن ساناپ ارتىپ كەلەدى. بيىلعى «كۇز-2015» اتاۋىمەن شىمكەنتتەگى ءتۋرنيردىڭ 5ء-شى تۋرىنا قاتىسۋعا نيەت ءبىل­ءدىرىپ، ىنتالانعان ستۋدەنتتەردىڭ، ناقتى­راق ايتقاندا، كوماندالاردىڭ قاتارى كوپ بولدى.

م.اۋەزوۆ اتىنداعى وڭتۇستىك قازاقستان مەملەكەتتىك ۋنيۆەرسيتەتى ۇيىمداستىرعان سايىستىڭ اشىلۋ سالتاناتىنا ءبىلىم جانە عىلىم ءمينيسترى اسلان ءسارىنجىپوۆ قاتىستى. اباي ساياباعىنداعى كىشى فۋتبول الاڭىنا جينالعان جۇرتتىڭ قاراسى كوپ بولدى. كورەرمەندەر ءوز كوماندالارىنا جانكۇيەر بولىپ، فۋتبولدىڭ تارتىستى وتۋىنە اتسالىستى. ال ءوز كەزەگىندە سايىستى سالتاناتتى تۇردە اشىپ بەرگەن مينيستر بارلىق كومانداعا ساتتىلىك تىلەدى. «ءبىلىمپاز جاستاردىڭ سپورتتى سۇيگەنى، اينالىسقانى ءبىز ءۇشىن وتە ماڭىزدى. سوندىقتان، وسىنداي سايىستاردى ءجيى وتكىزىپ تۇرۋ مىندەتىمىز. كىم بىلەدى وسىنداي جارىستاردىڭ ناتيجەسىندە ەرتەڭگى كۇنى قازاقتى الەمگە تانىتاتىن مىقتى فۋتبولشىلار شىعۋى دا مۇمكىن. ءبىز تەك سوعان جول اشۋىمىز قاجەت»، دەدى ول. ستۋدەنتتەر اسىعا كۇتكەن سايىستىڭ اشىلۋ سالتاناتىنا قازاقستان رەسپۋبليكاسى فۋتبول فەدەراسياسىنىڭ ۆيسە-پرەزيدەنتى س.بايشاقوۆ پەن ۋنيۆەرسيتەت رەكتورى جۇماحان مىرحالىقوۆ قاتىستى.

ۇلتتىق ستۋدەنتتىك ليگانىڭ قۇرىلۋى، اسىرەسە، سپورت ماماندارىن ەرەكشە قۋانتىپ وتىر. امەريكا مەن ەۋروپادا ستۋدەنتتىك ليگالار بۇرىننان بار. ماسەلەن، اقش-تا ستۋدەنتتىك كوماندالاردىڭ اراسىندا باس­كەتبول مەن حوككەيدەن وتەتىن جارىستار تانىمالدىلىعى جونىنەن تەك ايگىلى نبا مەن كحل ويىندارىنا عانا ەسە جىبەرەدى. سول سەكىلدى وتاندىق ستۋدەنتتىك ليگانىڭ دا بيىك بەلەستەردى باعىندىرۋىنا تولىق مۇمكىندىگى بار. ونىڭ ۇستىنە، مۇنداي جارىستاردا بولاشاق چەمپيوندار شىڭدالىپ، تالانتتى جاستار ىرىكتەلەتىنى دە بەلگىلى.

ۇيىمداستىرۋشىلاردىڭ وڭىردەگى الا دوپ قۋعان ستۋدەنتتەردىڭ باسىن قوسىپ، ۇزدىكتەردى انىقتاۋى تەگىن ەمەس، ارينە. ءبىلىم جانە عىلىم ءمينيسترىنىڭ ايتۋىنشا، جارىستىڭ قورىتىندىسى بويىنشا ىرىكتەلىپ الىنعان جاس فۋتبولشىلاردان ۇلتتىق قۇراما كوماندا قۇرىپ وسى جىلدىڭ اياعىندا ابۋ-دابيدە وتەتىن ازيا چەمپيوناتىنا قاتىستىرماق. ال كەلەسى جىلدىڭ تامىز ايىندا ستۋدەنتتەردەن قۇرالعان ۇلتتىق كوماندا برازيليادا وتەتىن الەم چەمپيوناتىندا ونەر كورسەتەدى دەگەن جوس­پار بار. ەستەرىڭىزگە سالا كەتەيىك، وتكەن جىلعى تۋرنير جەڭىمپازى، ياعني، ل.ن.گۋميليەۆ اتىنداعى ەۋرازيا ۇلتتىق ۋنيۆەرسيتەتىنىڭ كومانداسى 6 ماۋسىمدا بەرليندە وتكەن چەمپيوندار ليگاسىنىڭ ماچىنا كورەرمەن رەتىندە بارۋعا جولداما العان بولاتىن.

سپورتقا، ونىڭ ىشىندە فۋتبولعا ايرىقشا كوڭىل بولەتىن وقۋ ورداسىنىڭ فۋتبول كومانداسى دا وسال بولماۋعا ءتيىس. جە­تىستىكتەر جايلى ايتار بولساق، وقمۋ فۋتبول كومانداسى قازاقستان رەسپۋب­ليكاسى جازعى ۋنيۆەرسياداسىنىڭ 2001، 2005، 2007، 2009 جىلدارداعى جەڭىمپازى. 2012 جىلى 24-30 قىركۇيەك ارالىعىندا استانا قالاسىندا ءبىلىم جانە عىلىم مينيس­ترلىگىنىڭ ۇيىمداستىرۋىمەن وتكەن رەس­پۋبليكا جوعارى وقۋ ورىندارى اراسىندا كىشى فۋتبول جارىسىنا قاتىسىپ، چەمپيون اتاندى. سونداي-اق، ەلىمىزدەگى جوعارى وقۋ ورىندارى اراسىنداعى جازعى ۋنيۆەرسيادانىڭ ەكى دۇركىن جەڭىمپازى، قازاقستان رەسپۋبليكاسى پرەزيدەنتى كۋبوگىنىڭ 2006 جىلعى جوعارى وقۋ ورىندارى اراسىنداعى كۇمىس جۇلدەگەرى بولدى.

ىرگەلى ءبىلىم ورداسى وليمپيادا ويىندارى، الەم بىرىنشىلىكتەرىندە توپ جارعان ستۋدەنتتەرىن ماقتان تۇتادى. سوندىقتان، وڭتۇستىك قازاقستان مەملەكەتتىك ۋنيۆەر­سيتەتى «سۇڭقار» كومانداسىنىڭ مۇشەلەرى ۇلتتىق ستۋدەنتتىك ليگادا جەڭىسكە جەتىپ، سول ارقىلى حالىقارالىق دەڭگەيدە ەلىمىزدىڭ نامىسىن قورعاۋعا بەلىن بەكەم بۋىپ وتىر.

دەرەككوز: ەگەمەن قازاقستان