Búginde kórshi Qyrǵyzstanda opozısıa serkelerin tutqyndaý jalǵasýda. Muny el basshylyǵy 17 mamyr kúni birqatar saıası toptar elde memlekettik tóńkeris jasaýdy josparlady dep túsindirýde. Bul týraly Qamshy.kz habarlaıdy.
Keshe Qyrǵyzstanda osymen jetinshi opozısıalyq saıasatkerdiń tutqyndalǵany belgili boldy. olardyń barlyǵy bılikti kúshpen basyp alýǵa árekettengeni úshin qamaýǵa alynyp otyr. El prezıdenti Almazbaek Atambaev bolsa eldegi ahýaldy turaqsyzdandyryp otyr dep tek «Halyqtyq parlament» qozǵalysynyń opozısıalyq saıasatkerlerin ǵana emes, jergilikti quqyqqorǵaýshylar men «sheteldik arnaıy qyzmet generaldaryn» da aıyptady. Sarapshylar prezıdenttiń bul málimdemesin Reseıdi aıyptaý dep baǵalaýda.
Prezıdent A. Atambaev Analar kúnine arnalǵan is-shara kezinde Qyrǵyzstanda ómir súrý unamaı júrgen biraz adamdar baryn aıtty. Opozısıany kez-kelgen jolmen eldegi turaqtylyqty shaıqap, bılikke jetýdi kózdeıdi degen syńaıda aıyptady. A. Atambaev bılikti basyp alý senarıi 12 mamyr kúni «Halyqtyq parlament» qozǵalysynyń forýmynda talqylanǵanyn jetkizdi.
«Olar bul forýmdy qandaı maqsatpen ótkizdi. Onda kimder bolmady deısiz? Talǵarbekov bastaǵan aqaevshylar da, Qalmatov bastaǵan baqıevshiler de boldy. «Islam memleketiniń» (IM-halyqaralyq lańkestik uıym) senimdi jaqtaýshysy Nurlan Motýev te boldy. sheteldik granttardy aqtaýǵa tyrysyp júrgen Toleıqan Ismaılov pen Azız Abdrasýlov ta bar», - dedi A. Atambaev.
Muny aıtqan A. Atambaev «el analary 2002 jyldyń naýryzynda, 2010 jyldyń sáýirinde, 1990 jyldyń maýsymynda, 2010 jyldyń maýsymynda da kóz jasyn az tókpegenin», elge beıbitshilik kerek ekenin málimdedi jáne mundaı turaqsyzdyqqa bastaıtyn áreketter qatań túrde aıyptalyp, joly kesiletinin aıtty.
Jalpy elde prezıdenttiń otstavkaǵa ketýin talap etetin narazylyq aksıasynyń daıyndalyp jatqany týraly naýryz aıynda belgili bolǵan. Sol kezde Ulttyq qaýipsizdik jónindegi memlekettik komıtet bılikti kúshpen basyp alýǵa daıyndyq jóninde is qozǵady. «Shyndyq» partıasynyń jetekshisi Qubanychbek Qadyrov, Jalal-Abad oblysynyń burynǵy gýbernatory Bektur Asanov qamaýǵa alyndy. Sondaı-aq, Bekbolat Talǵarbekov, Marat Sultanov syndy oppozısıonerler de tutqyndaldy. Ústilerinen qylmystyq is qozǵalyp, qamaýǵa alynǵan basqa da saıasatkerlerdi el bıligi reseılik arnaıy qyzmettermen baılanys ornatyp, prezıdentti qýýǵa árekettendi dep aıyptady.
Opozısıa ókilderi bolsa, bul saıası qaqtyǵystardyń júıelik sıpaty bar ekenin jáne Reseı men Qyrǵyz Respýblıkasy basshylary arasyndaǵy kelispeýshilikterden týyndap otyrǵanyn málimdeýde.
Darhan Muqantegi
