Búgin - memlekettik rámizder kúni. Osyǵan oraı Aqordanyń baspasóz qyzmeti táýelsiz elimizdiń memlekettik rámizderin ázirleý, talqylaý, olardy bekitý úderisi barysyndaǵy Elbasynyń róli men qaıratkerlik qyzmetinen syr shertetin birneshe fotomaterıal men Elbasynyń QR jańa memlekettik rámizderin tanystyrý saltanatynda sóılegen tarıhı sózin jarıalady, - dep jazady Qamshy.kz QazAqparatqa silteme jasap.
Qamshy.kz osy qujattardy oqyrmandarǵa usynady
N.Á.Nazarbaevtyń Qazaqstan Respýblıkasynyń jańa memlekettik rámizderin tanystyrý saltanatynda sóılegen sózi
Almaty qalasy, 5 maýsym, 1992 jyl.
Qadirli otandastar!
Biz búgin asa mańyzdy tarıhı oqıǵany bastan keship otyrmyz. Bárimiz asyǵa, sarǵaıa kútken kún endi tarıh jylnamasyna enetin bolady.
Jıyrmasynshy ǵasyrdyń toqsanynshy jyldary qazaq eliniń shejiresinen oıyp turyp oryn alatynyna kúmán joq. Óıtkeni, bul kezeń - ejelden erkin júrip, erkin turyp úırengen bul halyqtyń basqa túsken buǵalyqty serpip tastap, egemen el, táýelsiz memleket bolýǵa bet burǵan kezeńi; óıtkeni, bul kezeń - janshylyp qalǵan ulttyq sananyń, jasyp qalǵan ulttyq rýhtyń, qasıetine sóz jetpes ana tilimizdiń, qıyn-qystaý tustarda medet bolǵan dinimizdiń, ne yqylym zamandardan kele jatqan ata dástúrimizdiń dúr silkinip, túlep sala bergen kezeńi; óıtkeni, bul kezeń - qazaq halqyn, Qazaqstan Respýblıkasyn dúıim dúnıe túgel tanyp, órkenıetti álemniń eń mártebeli halyqaralyq qaýymdastyǵy - Birikken Ulttar Uıymyna tolyq quqyly múshe bolyp qabyldanǵan kezeńi.
Iá, qadirli baýyrlar, osynyń bári de aınalasy eki-úsh jyldyń jemisi. Sátin salsa, suq kózden, sýyq sózden saqtasa, qazir halyqty qınap turǵan joqshylyq ta, qymbatshylyq ta óter dep kámil senemin. Olaı deıtinimiz - taǵdyrdyń talaı-talaı teperishine tózip, dala ómiriniń danalyǵyn sanaǵa sińirgen ultymy bar, bir-birimen qońsy qonyp, syralǵy bolyp ketken, ejelden tatýlyqty tý etken kópultty halqymyz bar. Olaı deıtinim - ata-babalarymyzdyń aq bilektiń kúshimen, aq naızanyń ushymen qorǵap qalǵan ulan-baıtaq jerimiz, sol jerdiń astynda da, ústinde de tunyp jatqan baılyǵymyz bar. Olaı deıtinim - bizde týǵan elimizdiń egemen memleket retinde qalyptasýy men damýynyń jan-jaqty oılastyrylǵan strategıasy bar. Bul jónindegi tujyrymdarymdy men jaqynda baspasózde jarıalaǵanymdy jaqsy bilesizder.
Táýelsiz memleket, egemen el bolýdyń qyrýar qıyndyǵy, erekshe jaýapkershiligimen qatar birqatar sharttary, basty-basty belgileri bar ekeni málim. Solardyń arasynda eldiń eldigin tanytyp turatyn aıryqsha mándileri - Jalaý, Eltańba jáne Ánuran.
Búgingi saltanatty májiliske bizdi aldyńǵy kúni Joǵary Keńesimiz qabyldaǵan tarıhı sheshimder jıyp otyr. Endi táýelsiz Qazaqstannyń óziniń memlekettik sımvoldary, ıaǵnı aıshyqty nyshandary bar. Respýblıka Konstıtýsıasyn birinshi oqylymynda qabyldaý, memlekettik nyshandarymyzdy bekitý arqyly biz elimizdiń qoǵamdyq-saıası qurylysynyń damýyndaǵy mańyzdy kezeńine - onyń konstıtýsıalyq turǵydan hattalý kezeńine aıaq basyp otyrmyz. Qazaq eliniń táýelsizdigi osydan jarty jyl buryn jarıalanǵanymen, moıyndalǵanymen, júzege asa bastaǵanymen, onyń taıǵa tańba basqandaı aıqyn tanylatyn belgilerine endi ǵana ıe bolyp otyrmyz. Osy qýanyshymyz qutty bolsyn!
Bul jerde memlekettik aıshyqty nyshandardy qaıtadan jasaý ne úshin qajet bolǵanyn aıtyp jatý artyq dep oılaımyn. Jańa nyshandardy dúnıege keltirý ońaıǵa túspegeni belgili. Osy oraıly sátti paıdalanyp, Qazaqstan Respýblıkasynyń Prezıdenti retinde elimizdiń memlekettik nyshandaryn jasaýǵa atsalysqan, oı qosqan, janashyrlyq tanytqan, tilektestik bildirgen, kómek kórsetken azamattardyń barshasyna alǵysymdy aıtqym keledi.
«Keńesip pishken ton kelte bolmaıdy», - degen ǵoı babalarymyz. Rasynda da, quramyna halyq qalaýlylary, ǵylym men mádenıettiń beldi ókilderi, zıaly qaýym engen arnaýly komısıanyń jumysy jemisti boldy dep aıtýǵa ábden negiz bar.
Jańa Jalaý men Eltańbany qabyldaý, Ánurannyń áýeni jóninde bir uıǵarymǵa kelý halyq depýtattarynyń tarıhı jaýapkershilikti tereń sezinýiniń, ulttyq dástúrlerge qurmetpen qaraýynyń arqasy ekenin aıryqsha atap aıtqym keledi. Sesıadaǵy kúni boıǵy aqyldasý respýblıkanyń ishki-syrtqy saıasatynyń temirqazyǵyna aınalǵan beıbitshilik, yntymaq, izgilik pen kelisim rýhyn óner tilinde beıneleıtin nyshandardy dál tabýǵa qol jetkizdi.
Jańa ǵana men tizerlep taǵzym etken, shashaǵynan súıgen Jalaýdyń túsin dál tabý ońaı bolǵan joq. On oılanyp, júz tolǵana kelip toqtaǵan osy zeńgir kók tústiń maǵynasy óte tereń. Munda bizdiń ashyq aspandy, ıaǵnı beıbit kúndi aıshyqtaıtyn kirshiksiz kóńilimiz bar, munda kókti Táńir tutqan ata-babalarymyzdyń arman-ańsary bar, munda bizdiń halqymyzdyń birtektiligin, memleketimizdiń bólinbeıtinin bildiretin uly Tutastyq ıdeıasy bar.
Myna altyn kún alaýlaǵan zeńgir aspannyń aıasynda baıaý qalyqtaǵan dala búrkiti, qıal búrkiti, arman arqalaǵan altyn búrkit qazaqtyń qyran kóńilin, darqan da aq, bitimshil de beıbit kóńilin shyrqaý bıikke alyp shyqqandaı. Mazmunyna órnegi jarasqan táýelsizdiktiń qasıetti týy máńgi jelbiresin, kúnimiz máńgi sónbesin!
Eltańbamyz da kóp kóńilinen shyǵady dep oılaımyn. Ulttyq rýhty osynshama kemel jetkizgen Eltańba álemde sırek kezdesedi desek te, artyq bolmas. Qazaq ómiriniń uly belgisi - shańyraqtan taraǵan tań shapaǵyndaı ýyqtar aıasyndaǵy aı múıizdi, altyn qanatty ǵajaıyp pyraqtar halqymyzdyń bolashaqqa umtylǵan asqaq armanynyń beınesindeı bolyp kórinedi. Qos pyraqtyń ortaq shańyraqty qanatymen qorǵap turǵany da kóp oı salady. Eltańbada óte-móte kelisti kórkemdik sheshimin tapqan uly ıdeıa - Erkindik ıdeıasy bizdiń esimizge qazaqtyń: «Otan úshin kúres- erge tıgen úles» degen qanatty sózin salyp turatyn bolsyn. Aıbynymyzdy asyryp, rýhymyzdy aspandatar Eltańbamyz qutty bolsyn!
Ardaqty aǵaıyn!
Búginde óz taǵdyryn ózi aıqyndaǵan qazaq ultynyń jas egemendi memleketi, Qazaqstannyń búkil halqy men ekonomıkasy jańasha jaǵdaıda tur. Qazirgideı almaǵaıyp zamanda, kúrmeýi kóp kúrdeli dúnıede eshkimge esemizdi jibermeý úshin, óz sybaǵamyz ózimizge buıyrýy úshin bizge erekshe aýyzbirlik kerek, erekshe jaýapkershilik kerek, erekshe parasattylyq kerek, erekshe eńbekqorlyq kerek.
Mine, jańarǵan Jalaýy, Eltańbasy, Ánurany bar el boldyq. Búgingi saltanatta tek jańa memlekettik nyshandardy elge jarıa etý rásimi retinde qaramasaq deımin. Jalaýymyz, Eltańbamyz, Ánuranymyz bizdiń halqymyzdy, kóp ultty Qazaqstan jurtshylyǵyn ortaq maqsatqa jumyldyryp, qasıetti isterge shaqyryp, jigerlendirip, rýhtandyryp tursa deımin.
Biz táýelsizdikke ańsap, zaryǵyp jettik. Endi sol táýelsizdiktiń qasıetti belgilerin de erekshe qadirleýimiz, qasterleýimiz kerek. Árbir azamat Qazaqstannyń Jalaýyn, Eltańbasyn, Ánuranyn tumardaı qasıet tutýy qajet. Eldigimizdiń synalatyn bir tusy osy. Qýanyshymyz qutty bolsyn!
Uzaǵynan súıindirsin!
