Kókpekti eldi mekeninde bógettiń jarylýyna aýa raıy sebep, bul týraly QR Tótenshe jaǵdaılar mınıstri Vladımır Bojko aıtty.
"18 gradýs jyly boldy. Jan-jaǵynan qar jaýǵan. Aǵyn bolǵan, muz, kórip tursyzdar, áli erimegen. Jan-jaqtan sýmen muz qalqyp kelgen", - dedi mınıstr. Ol apattan buryn plotınany nyǵaıtýǵa áreket jasalǵanyn aıtty. "Kesheden beri bógetti aınalyp ótetin aryq qazýǵa tyrysqan, biraq oń jaǵy, sol jaǵy – tasty jer, sondyqtan sýdyń jartysy aǵyp ketti, sý tolqynynyń kúshti bolǵany sonshalyq, ol búkil bógettiń boıymen quıylǵan", - dedi Bojko.
Mınıstr jaǵdaıdy nysannyń menshik ıesi - "Shańyraq" JSHS-men birge talqylaǵanyn atap ótti. "Plotınanyń jaǵdaıyna monıtorıń júrgizilgen, oblystyq qyzmetter jumys istemedi deı almaımyn. Shlúzderdiń bári ashyq. Kúzde toǵandaǵy sý shyǵarylǵan. Bul sýqoımada eshqashan problema bolǵan emes, biz zardap shekkenderdi aralap shyqtyq, olardyń bári buryn-sońdy munshama qardyń bir mezgilde jaýmaǵanyn aıtyp otyr", - dedi mınıstr.
Qazir Kókpekti turǵyndarynyń bári úılerine oraldy. Jergilikti bılik pen shuǵyl qyzmetter aýyldan sýdy soryp, aýmaqty tazalaýǵa kiristi. Eske salaıyq, Kókpekti sýqoımasynyń bógeti 31 naýryzǵa qaraǵan túni shaıylyp ketken bolatyn. Aryndy sý 300-ge jýyq úıdi basyp qaldy. Bes adam qaıtys boldy, alty adam aýrýhanaǵa tústi. Tótenshe jaǵdaı boıynsha qylmystyq is qozǵaldy. Elimizde 2010 jylǵy Qyzylaǵash tragedıasynan keıin kóp kisi ólimine soqtyrǵan mundaı joıqyn tasqyn bolmaǵan edi.
