Astanada 11-13 sáýir aralyǵynda HHİİİ «Jas qanat» jastar án baıqaýy ótedi. Bıyl óner dodasyna qatysýǵa 100-den astam ótinim túsip, onyń 14 qatysýshysy ǵana irikteý kezeńiniń barlyǵynan súrinbeı ótti.

Osy baıqaýdyń aldynda «Jas qanatta» baq synaýǵa kelgender óz oılarymen jáne úmitterimen bólisti.

Rýhıa Baıkenova, 15 jasta, Taldyqorǵan:  - Men «Jas Qanatty» meniń bolashaqqa degen kiltim dep bilemin. Osy baıqaýdan kóp nárseni úırenemin degen oıdamyn. Alǵash ret «Jas Qanatty» teledıdardan kórgen bolatynmyn, keıin irikteý týrynan ótken kezimde qatty qýanǵanym esimde. Bul men úshin ómirlik mańyzy bar úlken qadam. Jeńiske jetkim keledi, biraq jeńilsem jasymaımyn. Eń bastysy - ózimniń talantymdy kórsetý.

Merýert Toıbekova, 28 jasta,Qaraǵandy: - Osy baıqaýǵa úmitim zor. Alǵash ret «Jas qanatqa» 13 jyl buryn oblystyq deńgeıde qatysqan bolatynmyn. Estradalyq órkendeýime bul saıys kómektesedi degen oıdamyn. Árıne, saıys aldynda óte qatty qobaljyp turmyn, biraq oıymdaǵy josparlarym iske asady degen senimdemin. Sebebi, dál osy baıqaý arqyly estradanyń Gúlnur Orazymbetova, Medeý Arynbaev, Mádına Sadýaqasova syndy óner maıtalmandarynyń juldyzy janǵan. Bolashaqta Qazaqstandy halyqaralyq festıváldarda tanystyramyn degen oıdamyn. Sonymen qatar ózimniń jeke shyǵarmashylyǵymdy damytamyn.

Mádı Músápirov, «Han Tengrı» toby, 23 jasta,Taldyqorǵan: - Aıtarlyqtaı qorqyp,qobaljyp turǵanym joq. Árıne, júldeli oryn alamyz degen oıdamyn. Qarsylastaryma sáttilik tileımin.

İldár Omarov, 23 jasta, Astana: - Baıqaý aldynda sál qobaljyp turmyn. Biraq aldyńǵy qatardy bolatynyma senimdimin, sebebi bar yntamdy salyp, daıyndalyp júrmin. Osy baıqaý arqyly ózimdi kórsetkim keledi, talantymdy baıqap qalady dep senemin.

QazAqparat