Qazaqstan Respýblıkasynyń Prezıdenti Nursultan Nazarbaev XII Eýrazıalyq Medıa Forým qatysýshylaryna quttyqtaý joldady.
«XII Eýrazıalyq Medıa Forýmnyń qatysýshylary men qonaqtaryna shyn júrekten ystyq yqylasymdy bildiremin. Búgingi konferensıanyń ashylýyna baılanysty meniń shynaıy quttyqtaýymdy qabyl alyńyzdar!
Osy jyldar ishinde Forým halyqaralyq turǵydan keńinen tanyldy, jedel ózgerip jatqan álemniń eń ózekti problemalaryn talqylap, olardy sheshýdiń jańa tásilderin ázirleýdiń moıyndalǵan alańyna aınaldy.
Onyń jumysyna 12 jylda álemniń 60 elinen 5 myńnan astam sarapshy, saıasatker, jýrnalıs jáne qoǵam qaıratkerleri qatysty, forým jumysyn 500-den astam qazaqstandyq jáne sheteldik BAQ jarıalap-kórsetedi.
Bıyl meniń Eýrazıalyq ekonomıkalyq odaq jónindegi ıdeıany usynǵanyma 20 jyl toldy.
Medıa-forým Eýrazıa halyqtarynyń jaqyndasýy men jan-jaqty yntymaqtasýynyń belsendi bastamashysy retinde tanylǵan Astanada ótýiniń erekshe sımvoldyq máni bar. Bizderdi tereń tarıhı jáne ulttyq-mádenı baılanystar men aýqymdy iskerlik qarym-qatynastar biriktiredi.
Eýrazıalyq ıntegrasıa úderisi búginde damýdyń múlde jańa kezeńine shyqty. Eýrazıalyq ekonomıkalyq odaq qurý týraly tarıhı shartqa 2014 jyly mamyrda dál osy jerde, Astanada qol qoıý josparlanýda.
Eýrazıalyq Medıa Forýmnyń elder men qurlyqtar arasyndaǵy senim ahýalyn qalyptastyrýdaǵy, ultaralyq tatýlyq pen kelisimdi saqtaýdaǵy aıryqsha róli men mısıasyn atap ótkim keledi.
Búgingi forým kúrdeli halyqaralyq-saıası jaǵdaı tusynda ótip otyr.
Sońǵy aılardaǵy kóptegen oqıǵalar etnosaralyq tatýlyqty saqtaýdyń mańyzdylyǵyn taǵy da kórsetip berdi.
Bul úderiske Qazaqstan óziniń beıbitshilik pen birlikti qamtamasyz etý jónindegi oń tájirıbelerine súıene otyryp, laıyqty úlesin qosyp keledi.
Bizdiń elimizde 100-den astam ult ómir súrýde. Eldegi myzǵymas qundylyqtar jáne memlekettik saıasattyń basty basymdyqtary bolyp sanalatyn tatýlyq pen turaqtylyqtyń arqasynda biz «Qazaqstan - 2030» Strategıasyn merziminen buryn oryndadyq.
Elde búginde Qazaqstannyń 2050 jylǵa deıingi damýynyń Strategıasy qyzý júzege asyrylýda. Ultaralyq jáne konfesıaaralyq kelisimdi nyǵaıtý, tatýlyq, birlik turaqtylyq onyń negizgi basymdyqtary bolyp sanalady.
Kelesi 2015 jyl Qazaqstan halqy assambleıasynyń jyly bolyp jarıalandy, Astanada Qazaqstan halqynyń forýmy ótetin boldy.
Sondaı-aq, 2015 jyly bizdiń elimizdiń astanasynda Álemdik jáne dástúrli dinder kóshbasshylarynyń 5-shi sezi ótedi.
Medıa forým aıasyndaǵy syndarly suhbattar ózara túsinistik pen senimdi odan ári nyǵaıtýǵa septigin tıgizedi dep senemin.
Sizderdiń jumystaryńyzǵa jemis jáne barshańyzǵa tabys tileımin!», - delingen quttyqtaýda.
QazAqparat
