Bir jarym aıǵa sozylǵan tergeý Aqsaı qalasyndaǵy janar-jaǵarmaı beketindegi tótenshe jaǵdaıdyń kádimgi gaz balonynyń kesirinen bolǵanyn anyqtady.

Al bekettiń ózinen eshbir tehnıkalyq aqaý tabylmaǵan,- dep habarlaıdy  Qamshy.kz KTK telearnasyna silteme jasap.

Oqıǵa tamyz aıynyń basynda Aqsaı qalasynda bolǵan edi. Shaǵyn shahardyń kire berisinde ornalasqan jekemenshik janarmaı beketi aldymen otqa oranyp, keıin joıqyn jarylys boldy. Saldarynan bekettiń bir jumysshysy men Qaraqudyq aýyldyq aımaǵy ákimdiginiń júrgizýshisi ajal qushqan.

QR Qylmystyq kodekstiń eki birdeı baby boıynsha tergeý bastalyp, qaıǵyly jaǵdaıǵa qyzmetkerler bólmesindegi propan balony sebep delinip otyr. Qaýipti aýmaqta gaz balonyn zańsyz paıdalanylǵany dáleldense, beket qojaıyny 7 jylǵa sottalýy múmkin.