Qaraǵandylyq 18 jastaǵy qyz Bahreınde seks-quldyqqa tap bolǵanyn málimdedi. Bul týraly  Qamshy.kz Tengrinews.kz –ke silteme jasap habarlaıdy.

 Aıtýynsha, ol bul elge súıiktisi arqyly jumys taýyp berem dep ýáde bergen qurbysymen birge barǵan. 

Boıjetken tilshimizge telefon arqyly qurbysynyń massaj jasaýshy qyzmetin taýyp berýge ýáde bergenin, biraq Bahreınge ushyp kelgen soń jaǵdaıdyń basqasha bolǵanyn aıtyp otyr. Qazaqstandyq qyzdyń  jeke kýáligin  alyp qoıyp, jezókshelikpen aınalysýǵa májbúrlegen. "Tanysqanymyzǵa 1,5 jyl bolǵan qurbym Bahreınge shaqyrdy. Maǵan bılet satyp alyp berip, tipti páter jaldady. Massaj týraly ǵana sóz bolǵan, jezókshelik jaıynda eshteńe aıtpady. Taıaýda ǵana 18-ge toldym (...) Men eki aı buryn Bahreınge keldim, bir aptadaı bolatyn shyǵarmyn dep oıladym, - deıdi ol. - Ekinshi kúni jezókshe bolyp jumys isteısiń dep, bılet pen qonaqúıdiń qunyn óndirip berýimdi talap etti. Klıentterimnen kómektesýin surap,  jyladym. Solardyń biri maǵan 200 dınar berdi, qalǵan aqshany qaıdan alatynymdy bilmeımin. Anam Qaraǵandyda, jylap jatyr, bul jaqtan ketýime kómektesińizdershi", - deıdi qyz. Alaıda ol aty-jónin ataǵysy kelmedi. "Bir apta ishinde tórt qonaqúı aýystyrdyq, bul jaqtan da alyp ketýi múmkin (...)", - deıdi ol.

Munymen qatar, boıjetken ózine úrkitip, qorqytý mánindegi sózderdiń aıtylyp jatqanyn málimdedi. Aıtýynsha, ol «sýtenerlerge» shamamen mıllıon teńge bereshek eken. Bul qarajatty ol 27-sine deıin tóleýis tıis, olaı bolmaǵan jaǵdaıda óltirip ketemin dep qorqytady eken.

Qyz álsirep qalǵanyn aıtady. Ózimen birge seksýaldyq quldyqta taǵy da basqa qazaqstandyq qyzdar bar eken. 18 jastaǵy boıjetkenniń 2,5 jastaǵy balasy bar bolyp shyqty. "Men 15 jasymda turmysqa shyqtym, bosandym. Biraq kúıeýimmen ajyrasyp kettik", - dep habarlady ol.

Qonaqúıde túsirilgen bul vıdeony qyz redaksıaǵa joldady.

Tengrinews.kz redaksıasy Qazaqstannyń Syrtqy ister mınıstrliginen osy oqıǵaǵa baılanysty túsinik aldy. Baspasóz qyzmetiniń jetekshisi Ánýar Jaınaqovtyń aıtýynsha, qazaqstandyq dıplomattar bul máseleni sheshý úshin jumysty bastap ketipti. "Qyzǵa kómektesý úshin qoldan kelgenniń bárin jasaımyz. Qazir osy máselemen aınalysyp jatyrmyz", - dedi QR SİM ókilderi.