Júregindegi bar armanyn bir-birimen ushtastyryp, óneri men otbasyn qatar alyp júrgen tanymal ana – Ásel Akbarovamen jaqynda suqbattasýdyń sáti túsken edi. Ári ol tizgindeıtin «Habar» arnasyndaǵy «Bizdiń úı» tok-shoýyna baryp, kadr syrtyndaǵy kórinistermen, jumys barysymen tanysyp qaıttyq.

— Negizgi mamandyǵyńyz zańger eken. Televızıa salasyna qalaı keldińiz?

— Televızıa júıesinde jumys isteý, dıktor bolý – balalyq shaqtan kele jatqan arman edi. Qudaıǵa shúkir, bul armanym oryndaldy. 2006 jyly Astana qalasyna qonys aýdardym. Sol kezde men negizi mınıstrliktiń birinde jumys isteýim kerek edi. Soǵan daıyndalyp, jaýaptaryn kútip otyrǵanmyn. Sol sátte arnalardyń birine «telejúrgizýshiler kerek» degen habarlandyrýdy estidim. Burynnan kele jatqan armanym bolǵannan keıin, baǵymdy synamaqshy bolyp bardym, kórdim. Baǵyma oraı, ol kisiler meni unatty, áıteýir (kúlip). «Daýsyń da, túr-álpetiń de keledi eken, jumys jasaýǵa bolady» dep, keýdeme bir úmit uıalatty. Árıne, men bala armanymnan bas tartpaı, televızıada qaldym. Kim bilsin, peshenege jazylǵany sol shyǵar. Taǵdyr ózi aıdap kelgen shyǵar dep oılaımyn.

—Telejýrnalıstıka kýrstaryna qatysyp, daıyndaldyńyz ba?

— Joq, ondaı arnaıy daıyndyq bolǵan joq. Sol arnada alǵash kelgenimde dıksıamen jumys isteıtin, daýysty qoıatyn arnaıy mamandar da boldy. Synaq merzimi kezinde men solardyń artynan júgirip júrip surasam da «Qoı, aınalaıyn Ásel, onyń saǵan qajeti joq» dep ózderi meni sendirdi.

—Mamandyǵyńyz basqa bolǵan soń kásibı telejýrnalıster tarapynan syndar jıi aıtylatyn shyǵar? Qalaı qabyldaısyz?

—Árıne, endi ondaı-ondaı bolady ǵoı. Ásirese, áıelder arasynda. Endi jigitterdiń oıynda ne júrgenin bilmeımiz ǵoı, al qyzdar aıtyp qalyp jatady. Keıbir kezde neshe túrli pikirlerdi estısiń. Qazir áleýmettik jelilerde ońaı boldy ǵoı. Kez kelgen adam óziniń pikirin bildire beredi. Biraq osy kúnge deıin «Jýrnalıs mamany emessiń, televızıada ne istep júrsiń?» degendi estigen emespin. Qaıta tánti bolyp júrgenderdiń, menen dáris alǵysy keletinder men aqyldasqysy keletinderdiń qatary kóp. Endi bul salada júrgenime 10 jyldan asty ǵoı. Barlyǵy tájirıbeniń arqasynda keledi.

— Ózińizdi aktrısalyq qyryńyzdan da kórsetip júrsiz. Bul jolǵa qalaı tústińiz? Aldyn-ala akterlyq sheberligińizdi damytyp, arnaıy kýrstarǵa barasyz ba?

— Bul da balalyq armanym (kúlip). Negizi adam armandaı bilý kerek qoı, aldyna maqsat qoıa bilý kerek. Men tek úıde jatyp armandap, oılaýmen ǵana shektelgen joqpyn. Televızıaǵa kelý úshin men aldymen ózimdi synap kórdim, kórsete bildim. Bul – bir. Al aktrısalyqqa keletin bolsaq, oǵan da men arnaıy daıyndaldym. Birinshiden, ishteı daıyndaldym. Sodan soń akterlyq sheberlik kýrstarynan óttim. Buǵan da bir sondaı múmkindik boldy. Habar arnasynda, bilseńiz, baıaǵyda «Toǵysqan taǵdyrlar» degen telehıkaıa boldy. Sonyń jalǵasy retinde túsiriletin serıalǵa kastıng júrip jatqanyn estidim. Baryp ony da kórdim. Búkil satysynan ótip, rejıserdiń kóńilinen shyqqandaı boldym. Biraq kim ekenimdi, qaıda qyzmet etetinimdi aıtqan joqpyn. Ol kisi de qazaqsha baǵdarlamalardy kóretin adam emes, sondyqtan meniń kim ekenimdi bigen joq. Sóıtip kastıngten  ótip, Saltanattyń róline meni bekitken bolatyn.

— Búginge deıin qansha fılmge, serıalǵa tústińiz? 

— Sol «Baq mekenim, Astana» («Perekrestok v Astane»), odan keıin «Zaýal» degen telehıkaıaǵa tústim. Ony qazir «Habar» arnasynan da kórsetip júr. Odan keıin, bilseńiz, osy jazda Asqar Uzabaevtyń «Glamýr dlá dýr» tolyqmetrajdy fılmine tústim. Ol, Qudaı qalasa, 1 jeltoqsanda ekranǵa shyǵady. Odan keıin Astanaǵa kelip, demalys ýaqytymdy paıdalanyp, «Vse ız-za mýjıkov» degen kınoǵa da túsip keldim. Ázirshe, eki serıal, eki tolyq metrajdy fılm.

—«Glamýr dlá dýr» fılmine alǵashynda Baıan Esentaeva túsýi qajet eken. Sizge shaqyrtý túskende birden kelistińiz be?

— Bul jerde neshe túrli alyp-qashpa áńgimeler bar endi. Árkimniń aýzyna qaqpaq bola almaısyń ǵoı. Naqty ózim biletinim, alǵashynda Baıan Maqsatqyzy bul róldi somdaýy kerek bolatyn. Sóıtip kelisilgen edi. Biraq aıaq asty ózi bas tartqan. Sodan osy fılmniń rejıseri Asqar Uzabaev habarlasyp, maǵan osy róldi usyndy. Árıne, bas tartpaımyn ǵoı (kúlip). Kelisimimdi birden berdim.

— Sizdi kóbine «Baıan hanymǵa elikteıdi, sol kisige uqsaıdy» dep jatady. Óz basym, uqsastyq baıqamappyn. Jalpy bul sizge qalaı áser etedi?

— Men de sony túsinbeımin. Birinshiden, uqsamaımyz. Baıan Maqsatqyzyn men de bilemin, birge jumys ta istedik. Nelikten jurttyń kózine olaı kórinetinin bilmeımin. Menińshe, biz uqsamaımyz. «Elikteıdi» deıdi.  Qalaı elikteımin? Meniń shashymnyń túsin qarańyz. Ol kisiniń shash úlgisin qarańyz. Qaı jerimmen elikteıdi ekenmin men? Sony da túsinbedim. Ol kisimen salystyryp jatsa, árıne, renjimeımin, «Baıanǵa uqsatty» dep te renjimeımin. Óıtkeni ol eń sulý, kórikti arýlarymyzdyń biri ǵoı. Muny moıyndaý kerek. Onyń ústine bizdiń mádenıetimizge zor úlesin qosyp jatqan tulǵa, maqtanarlyq, úlgi tutarlyq áıel. Renish joq. Degenmen qytyǵymdy keltiretin tusy da bar. Óz basym bul pikirmen múlde kelispeımin. Uqsastyǵymyz da joq, elikteý de joq.

— Oqyrmandarymyzǵa ózińiz jaıly aıta ketseńiz.

— Men jalpy, jeke ómirim, otbasym jaıly ashyqtan-ashyq kóp aıtatyn adammyn. 17 jasymda turmysqa shyqqanmyn. Jigitim marqum Ońtústik Qazaqstannyń týmasy. Birge zań ýnıversıtetinde oqyp júrip tanysqanbyz. Sóıtip, 1-kýrsty támamdaǵan soń, turmysqa shyǵyp kettim. 4-kýrsty bitirgende meniń úsh balam bar edi. Qazir sol eki qyzym, kenje ulym – úsh bala-shaǵam bar. Kúıeýim marqum 2005 jyly aýyr naýqastanyp, dúnıeden ozdy. Bylaısha aıtqanda, mıynda isigi boldy. Sodan beri turmysqa shyqqan joqpyn. Biraq bárin tastap, Astanaǵa kóship keldim. Osynda kóshkennen keıin jańa ómir bastaldy.

—Balalardy jalǵyz tárbıelegen qıyn emes pe?

— Qıyn, árıne.

—Ekinshe ret otbasyn qurý oıyńyzda joq pa?

— Men otbasyn qurar edim. Birinshiden, men turmysqa shyǵatyndaı, laıyq adamymdy kezdestirgen joqpyn áli kúnge deıin. Ekinshiden, qazir kez kelgen adamnyń basqa bireýdiń balasyna baýyr basýy ekitalaı. Onyń ústine, meniń balalarym – jasóspirimder. Qyzdarym boıjetip qaldy. Bir jaǵynan qaýipti de. Neshe túrli jańalyqtardy estımiz ǵoı. Áleýmettik jelilerde de, teledıdardan da kórsetip jatady. Óziniń týǵan balasyn aıamaǵandar bireýdiń balasyn aıaıdy deısiz be? Sondaı da úreıler bar. Sol úshin bóten bir er azamattyń úıde júrgenin ózim de qalamaımyn. Biraq meniń baqytym úshin balalarym qarsy emes te shyǵar?! Olar tek qana jaqsylyq tileıdi ǵoı maǵan. Tilektes, janashyrlarym, kómekshilerim – meniń osy balalarym.

— Biraq múmkin be aldaǵy ýaqytta?

— Múmkin endi, kim biledi? Kezdestirip qalarmyn. Múmkin kezdestirmeıtin de shyǵarmyn. Ony tek qana Alla taǵala biledi.

— Balalaryńyz osy tóńirektegi oılaryn aıta ma sizge?

— Bul taqyrypta ashyq áńgimelese beremiz. Onda turǵan eshnárse joq. Ózderi de bilip júr, kórip júr. Laıyq adam jolyqpaı júr maǵan (kúlip).

— Sizben taǵdyrlas qazaq áıelderi kóp. Sol kisilerge sizden keńes bolsyn, motıvasıa bolsyn. Qıyndyqpen kúresýge, jeńýge qandaı kúsh áser etti? Osynsha kúsh-jigerdi qaıdan alasyz?

— Sol qıyndyqty bastan ótkergennen keıin biz kúsheıemiz ǵoı. Ol bizge qýat beredi. Birinshiden, bala-shaǵam bar. Solardy oılaýym kerek. Qazir joldasymsyz keship jatqan ómirime kóz júgirtip, artqa qarasam, jasaǵanymnyń barlyǵy balalarym úshin ǵana. Árıne, meniń armandarym oryndalyp jatyr (kúlip), ony da eskermeý múmkin emes. Biraq eń qozǵaýshy kúsh – balalar. Olar bolmasa, men bilmeımin, muńaıyp, qandaı kúıge túsetinimdi, aıtpaı-aq qoıaıyn, boljamaı-aq ta qoıaıyn. Áıteýir aman-esenbiz, denimiz saý, bala-shaǵam saý, eń basty baılyq, baqyt osy.

— Bala tárbıesinde, ásirese, qyz balanyń tárbıesinde nege kóńil bólesiz?

— Tıym kóp. Bir jaǵynan oılaımyn, múmkin men shekten tys qatygez adam shyǵarmyn dep.

— Nege?

— Bilmeımin, endi. Solardyń áńgimesine qarasań (kúlip) degenim ǵoı. «Mama, túk te ruqsat etpeısiz ǵoı, bizge túk bostandyq bermeısiz» deıdi. Olardy osylaı tıyp ustaýym bolashaǵyna alańdaǵandyqtan, qorqynyshtan. Jalǵyzbasty ana bolǵannan keıin, qasymda joldasym bolmaǵannan keıin meni de túsinýge bolatyn shyǵar. Keńesetin áke-sheshem de joq, ájem de joq. Bári osy ómirden qaıtqan. Búkil jaýapkershilikti men óz moınyma alýǵa týra keldi. Sondyqtan da osy ul-qyzdarymnyń taǵdyry, bolashaǵy kóbinese maǵan baılanysty dep oılaımyn. Sondyqtan da men osyndaı qatal shyǵarmyn. Barlyǵy osymen túsindiriletin shyǵar.  Kóbisi oılaıdy ǵoı buǵan bireý kómektesedi-aý, bunyń tiregi bar-aý dep neshe túrli oılar keletin shyǵar. Eshkimniń oıyna tosqaýyl qoıa almaımyz. Biraq meniń aıtarym, úsh balany tárbıeleý ońaı emes, qıyn. Kishkentaı kezinde óziniń qıynshylyǵy bolady, ósken saıyn jaýapkershiligi de artady. Jasóspirim shaǵynda «ótpeli kezeń» degen bolady. Bunyń bári ońaı emes.

— Bolashaqta balalaryńyzdyń kim bolǵanyn qalaısyz? Jalpy siz olardyń tańdaýyna aralasasyz ba?

— Joq, olardyń tańdaýyna men aralaspaımyn. Ózderine múmkindik beremin. Óıtkeni meniń óz basymda ótken jaǵdaıdy aıtaıyn, dálel retinde. Men zań ýnıversıtetin bitiremin dep oılaǵan joqpyn. Ony armandaǵan da joqpyn. Marqum ákem jaqsy zańger bolǵan, jaqsy qorǵaýshy bolǵan kezinde. Bastapqyda, táýelsizdik alǵan kezderde elimizde zańgerler, ekonomıser kerek boldy. Kópshiligi osy mamandyqtarǵa túsetin. Sodan anam oılaǵan ǵoı osy salada bilim alsa dep. Al ózim akterlyq oqýdy bitiremin degen edim. Ónerge baraıynshy dep suraǵanmyn da. Biraq anam qarsy boldy. Óz basymnan ótkennen keıin balalarymnyń qatelespeýin, ózderine unaǵan mamandyqty tańdaǵanyn qalaımyn.

— Sońǵy ýaqytta án jazdyryp, mýzykaǵa bet burǵanyńyzdy baıqap qaldyq. Bul da bala kúngi armanyńyz ba?

— (kúlip) Iá, ol da armanym. Men qaıtpaıtyn adammyn ǵoı. Armandarymnyń bárin oryndamasam, kóńilim jaı tappaıdy. Daýsym bir sondaı keremet bolmasa da balalyq shaqtan án aıtyp júrgenmin. Negizi ájemniń daýsy jaqsy bolǵan, ándi de sheber oryndaıtyn. Kezinde Nurǵısa Tilendıevtiń «Otyrar sazy» orkestrinde shańqobyz aspabynda oınaǵan. Mýzykadan dáris bergen. Biraq naǵashy atam óte qyzǵanshaq kisi bolǵan soń apama ruqsat bermegen (kúlip). Men endi arnaıy mektepke baryp, mýzykalyq bilim alǵan joqpyn. Degenmen azdap sol ájemnen berilgen bolar. Biraq án jazdsrǵanda úlken sahnaǵa shyǵyp, estrada juldyzy bolamyn degen maqsat joq mende. Ózim úshin, jaqyndarym úshin oryndap júrmin.

— Zańger, telejúrgizýshi, ánshi, aktrısa. Qaısysy janyńyzǵa jaqyn?

— Bári jaqyn maǵan. Men ózim súımeıtin jumyspen, qyzyqpaıtyn nársemen aınalyspaımyn. Oǵan ýaqytymdy bólip qaıtemin? Oǵan ýaqytymdy bólip emes, ýaqytymdy jumsap qaıtemin? Ómir bir-aq ret beriledi. Múmkindik bolsa tek qana ózińdi qyzyqtyratyn, unaıtyn isińmen aınalysýyń kerek dep oılaımyn.

— Bala kúngi armandaryńyzdyń barlyǵyna qol jetkizip keledi ekensiz. Taǵy qandaı armandaryńyz bar?

— (kúlip) Aıtpaımyn. Áıtpese, oryndalmaı qalady. Oryndalǵannan keıin estısizder ǵoı…

— Úı sharýasymen ózińiz aınalysasyz ba?

— Qolym qalt etkende mindetti túrde, árıne. Balalaryma tamaq ázirleımin. Meniń qolym tımese, jumystan shyǵa almaı jatsam, qyzdarym isteıdi. Úı tazalaý, úı jınaý – solardyń qolynda, solardyń moınynda. Men olarǵa ákemin de, sheshemin de. Qolymnan kelgenshe barlyǵyn jasap jatyrmyn.

— Jas, ádemi kórinesiz. Ózińizdi qalaı kútesiz?

— Kóbisi osy suraqty qoıady. Aýzymdy toltyryp aıtatyndaı, kútim jasamaımyn, shyny kerek. Bul qanymda bar nárse. Marqum anam da biraz jas kóringen edi. Ol kisi de aýyr naýqastyń saldarynan dúnıeden erte qaıtty. Ózime keletin bolsam, ýaqytym bar kezde sportpen aınalysamyn. Sonyń ózi áser etetin shyǵar. Odan bólek 5 jyldaı balet ýchılıshesinde oqydym. Fızıkalyq turǵydan alatyn bolsaq,  múmkin deneme onyń da áseri bar shyǵar. Al bylaı tuqymymyzda 35 jasqa deıin óte jas kórinemiz. Kim biledi, múmkin sosyn jaqsylap kútim jasaý kerek bolar.

— Qyzdarymyzǵa, bolashaq analarymyzǵa, sińlilerińizge qandaı keńes aıtasyz?

— Adam degen óz ómirine qanaǵattaný úshin, súıikti isimen aınalysý kerek. Sosyn otbasy qurǵan bolsa, bala-shaǵasy bar bolsa, eń bastysy sol bala-shaǵanyń amandyǵyn, deniniń saýlyǵyn oılaýy kerek. Ana úshin eń mańyzdysy sol. Qalǵanynyń bárin kúsh-qýat, múmkindik bolyp jasta, oryndaýǵa bolady. Tek boıdaǵy jalqaýlyqty, jigersizdikti jeńe bilip, eńbekke qushtar bola alsaq, barlyǵyna qol jetkizemiz.

Materıal ikerim.kz saıtynan alyndy.