Muǵalim aqsha jınamaǵanda qaıtedi. Búgingi berilip jatqan aqparattarǵa sensek, oqýshylardan aqsha jınaǵan muǵalim jumystan shyǵarylady.
Eń aldymen mektepti jyl saıyn syrlap, áktep, buzylǵanyn jóndep turýǵa jetkilikti aqsha ýaqytymen bólinip tursyn, ony ebin taýyp jol-jónekeı jymqyratyndarǵa tosqaýyl qoıylsyn. Sonda muǵalim aqsha jınamaıdy.
Muǵalimniń jumys isteýine qajetti kitap, qaǵaz, qalam, jelim, boıaý, bor, dısk, fleshka, kórneki quraldar t.b. tolyp jatqan qajettilikteri tegin berilsin nemese oqý jylynyń basynda ár muǵalimge qosymsha aqsha bólinsin, sonda muǵalim aqsha jınamaıdy.
Aýdan kúni, qala kúni, ana kún, myna kún, tolyp jatqan aıtýly kúnder. Bezendirý kerek, sahnalaý kerek, án aıtyp, bı bıleýge kostúm kerek, joq bolsa satyp alý kerek. Osyndaı tolyp jatqan kerekti-kereksiz sharalardy rettep, júıelep, qysqartyp, muǵalimderge salmaq sala bermeı, kórpesine qaraı kósilip ótkizetin ákimshilik bolsyn, sonda muǵalim aqsha jınamaıdy.
Redaktorlar gazet-jýrnaldyń tırajyn kóbeıtý úshin májbúrlep jazdyrýdy toqtatsyn, sonda muǵalim aqsha jınamaıdy.
Keıbireýler kereksiz kitaptaryn basshylar arqyly muǵalimderdi qınap aldyrýdy toqtatsyn, sonda muǵalim aqsha jınamaıdy.
Apta saıyn UBT kitapshasyn satyp, test alýǵa mindetteıtin mekeme jumysyn rettesin, sonda muǵalim aqsha jınamaıdy.
«KRÝ otyr», «Sanepıdstansıa otyr», «Prokýratýra otyr», «Anaý otyr», «Mynaý otyr», «Anandaı komısıa kelip jatyr», «Mynandaı komısıa kelip jatyr», mekteptegilerden estıtiniń osy. Aınaldyryp solardy tekseredi de jatady, sol tekseristerden jaqsy nátıje, ilgerileý, damý bar ma eken? Bar bolsa jaqsy. Ol komısıalardyń barlyǵy óz tústigin ózi alyp ishsin, sonda muǵalim aqsha jınamaıdy. Biraq bizdiń qoǵamdaǵy komısıa músheleri ol deńgeıge jete qoıǵan joq. Kóp jaǵdaıda mekteptegiler baryn salyp dastarhan jasaıdy. Ol dastarhandardyń barlyǵyna dırektor óz qaltasynan shyǵara berse, shashy shaq kelmeıdi. Sondyqtan ol muǵalimderge, muǵalimder oqýshylarǵa salmaq salady.
Qyzym birde mektepten: «Apaı aıtty, Pálenshe Pálensheevanyń konserti bolady, mamań eki bılet alsyn dedi» – dep keldi. «Men onyń konsertine barǵym kelmeıdi» – dedim. Erteńine: «Apaı aıtty, konsertke barmasa da eki bılettiń aqshasyn berip jibersin dedi» – dep keldi. Osylaı qyzymyz úshin, qyzymyzdyń apaıy úshin talaı eki bılettiń aqshasyn berip jiberdik. Sebebi apaıyn dırektor májbúrlep otyr synybyna bılet satýǵa, dırektordy odan joǵaryraq turǵan basshysy, ol basshyny odan joǵary basshy t.s.s. Respýblıka saraıyn, basqa da konsert zaldaryn toltyrý úshin jeń ushynan jalǵasyp muǵalimderge bılet satqyzý toqtatylsyn, sonda muǵalimder aqsha jınamaıdy.
«Osylardyń ıýbıleıleri-aq sharshatty» – dedi oblystyq bilim berý salasynyń bir basshysy sol oblystan shyqqan, respýblıkaǵa tanymal eki-úsh adamnyń atyn atap, «Shapandary bar, syı-sıapaty bar, qonaqtary bar, dastarhany bar, joly bar, jatyn orny bar, bireýin jiberip bolǵanda ekinshisi keledi. Bar salmaq muǵalimderge túsedi.» Búdjetten tolyp jatqan mereıtoılar úshin aqsha bóline bermeıtini belgili. Keıbir aǵa, apalarymyz elýden bastap, bes jyl saıyn mereıtoılatyp otyrýdy azaıtsyn, sonda muǵalimder aqsha jınamaıdy.
Bilimine, biliktiligine, eńbegine qaraı baǵalaıtyn zaman qalyp barady. Attestasıadan ótý de aqsha, konkýrstan ótý de aqsha, basqasy da aqsha. Muǵalimdi emes, paraqor zamandy jumystan shyǵaraıyq.
Aqsha jınaý tek mektepte emes, basqa mekemelerde de bar. Muǵalimniń ózi de, jumysy da kópshiliktiń kóz aldynda bolǵan soń, ár úıde oqýshy bolǵan soń ol tez baıqalady. Onyń ústine mektepte aqsha jınaıtyn jaǵdaı jıi týyndaıdy.
Muǵalimdi emes, osynyń bárin zańdy, órkenıetti túrde retteı almaı otyrǵan mehanızmdi jumystan shyǵaraıyq. Bárin kórip-bilip otyryp, eshteńeni ózgertýge ıa qulyqsyz, ıa sharasyz óz sanamyzdy, óz bolmysymyzdy jumystan shyǵaraıyq.
Mıra Barkazatqyzy. Almaty qalasy, qazaq tili men ádebıeti páni muǵalimi
Materıal kazbilim.kz saıtynan alyndy.
