Óner áleminde jasyndaı jaryq etip, halyqtyń júreginen oryn alǵan, búginde sahnadan kórinbeı ketip, óner súıer qaýymdy saǵyndyrǵan óner adamdaryn, tanymaly tulǵalardy sanamalap kórdik.
Bekbolat Tileýhan
Ol Muhtar Maǵaýınnyń «Aldaspanyn» dombyrada sóıletti. Ol Maǵjannyń jyryn tyńdaýshysyna dombyranyń únimen jetkizdi. Ol halyqtyń shynaıy súıikti ánshisi boldy. Onyń ónerde juldyzy janǵan shaǵy 1992 - 2001 jyldary - Qurmanǵazy atyndaǵy Almaty memlekettik konservatorıasynyń oqytýshysy, dosenti, halyq ánderi kafedrasynyń meńgerýshisi bolǵan kezi edi. Ánshi Bekbolat osy on jylda erekshe jetildi. Halyqtyń izdep júrip tyńdaıtyn jyrshysyna aınaldy.
Ol ózi týǵan Arqanyń ǵana ánin aıtyp qoıǵan joq, qazaqtyń ár aımaǵynyń mektebin boıyna birdeı sińirip, babalar murasyn nasıhattady. 2001 jyldan keıin Bekbolat Tileýhan sheneýnik Bekbolat boldy. QR Mádenıet jáne qoǵamdyq kelisim vıse-mınıstri, 2003-2011 jyldar arasynda QR Parlamenti Májilisi III jáne IV shaqyrylymynyń depýtaty boldy.
Elýge endi ǵana kelgen Bekbolattyń el esinde qalǵan eń sońǵy konserti 2009 jyly Astanada bergen úlken konserti. «Elim meniń» dep atalatyn osy konsertte qolyna qobyzyn alyp, kómeıin Qaztýǵansha búlkildetken Bekbolatqa konsertke kelgen Másimovtiń ózi balqyp, erkisiz basyn shaıqaı bergen.
Sodan keıin Bekbolattyń konsertine ketip bara jatyrmyz dep, Respýblıka saraıyna, Kongres-hollǵa qaraı asyqqan eshkimdi kórmedik. Ras, Bekbolat Qanaıuly Eýropadaǵy qandastar arasyna baryp, Túrkıadaǵy, Qytaıdaǵy qandastaryn jaǵalap áredik án aıtyp ketip júr degendi estidik. Alaıda ol áni men jyryna shólirkegen Atajurttaǵy aǵaıynǵa 7 jyl ishinde bir konsert ótkizbedi. 2011-2015 jyldar arasynda depýtat ta bolmady. Qoly bos edi. Biletinder ol VI shaqyrylymdaǵy Májiliske qaıta depýtat bolyp saılanǵanǵa deıin Qazaqstan Respýblıkasy ulttyq sport túrleri qaýymdastyǵyn basqarýmen qatar qosymsha at baptap, tynysh qana namazyn oqyp júrdi desedi.
Muhamedjan Tazabekov
Búginde diniı tanymdyq «Asyl arna» telearnasynyń basshysy qyzmetinde júrgen Muhamedjan Orazbaıuly halyqqa aıtysker aqyndyǵymen tanylǵan.
Ál-Farabı atyndaǵy Qazaq ulttyq ýnıversıtetiniń fılologıa fakúltetin úzdik tamamdaǵan Muhamedjan, stýdent bolǵan 90 jyldary aıtys álemine dúrkirep keldi. Halyqtyń yqylasyn alyp, Júrsin Ermannyń qolynan talaı kólik mindi. Muhamedjan Tazabekov «Dúnıejúzi qazaqtarynyń İ Quryltaıy» qurmetine ótkizilgen, «Ordabasydaǵy «Qazaqtyń úsh bıine» arnalǵan, Qarasaı batyrdyń 400 jyldyq, Bógenbaı batyrdyń 300, Sypataı batyrdyń 210, Abaıdyń 150, T.Rysqulov pen M.Jumabaevtyń 100 jyldyqtaryna, Baýyrjan Momyshulynyń 90 jyldyǵyna, Jambyl oblysynyń 60 jyldyǵyna oraı ótken halyqaralyq, respýblıkalyq aıtystardyń jeńimpazy boldy. Ol tek aıtys aqyny emes, ándi de jaqsy aıtatyn. Án qýyp prezıdenttik orkesterde de istedi.
Aıtystaryn jurt álikúnge deıin izdep kóretin Ol kınoǵa da tústi. 1996 jyly «Jambyldyń jastyq shaǵy» fılminde Jambyldyń obrazyn sheber somdap shyqqan M. Tazabek QR Ulttyq sport túrleri qaýymdastyǵy «Nur Otan» partıasy, «Samuryq-Qazyna» ulttyq ál-aýqat qorynyń qoldaýymen túsirgen, ulttyq oıyn kókpar sportyn nasıhattaýdy kózdeıtin «Doda» tolyqmetrajdy fılminiń bas prodúseri (2013) de boldy.
Sońǵy on jylda ánimen, aıtysymen sahnadan kórinbeı ketken Muhamedjan Orazbaıuly qazir dindarlyǵymen tanymal. Onyń dinge bet burýy «Qazaqstan» ulttyq telearnasynda 2001-2002 jyldary onyń júrgizýimen jaryq kórgen «Jumadaǵy júzdesý» habarynan bastalsa kerek.
Balǵynbek Imashev
Kazgýgradtan(Qazaq Ulttyq Ýnıversıtetine ózi qoıyp ketken ataý. –red) túlep ushqan Balǵynbek Imashev tanystyrýdy qajet etpeıtin tulǵa. 13 jasynda dombyra ustap, toptan ozǵan aqyn súıkimdi aıtystarymen talaı topty jarǵan. Respýblıkalyq, halyqaralyq aıtystardyń laýraety bolǵan ol aıtystan alǵash ret «mıllıon teńge» aqshalaı júlde alǵan «mıllıoner» aqyn. Árıne kóp áriptesi sıaqty on neshe temir tulpar mindi. Aıtystyń arqasynda úıli de boldy. Máskeý qalasynda ótken aıtystyń, Astana qalasynda ótken «El basqarar eriń kim?», Almatyda bolǵan «Almatyqurylystyń» 50 jyldyǵyna arnalǵan aıtystardyń Bas júldegeri boldy.
2006 jyly akademık R.Nurǵalıdiń jetekshiligimen «Aıtystaǵy satıra men ıýmor» atty taqyrypta kandıdattyq dısertasıa qorǵaǵan Balǵynbek, óz aıtysynda da ıýmor men satırany sátti qoldandy. Kóptegen qoǵamdyq máseleni ájýalap jetkizdi. Áriptesterine qaratqan qaljyńdary talaı ret tyńdarmanyn kúlkige qaryq qyldy.
2014 jylǵy aıtysta «Altyn dombyraǵa» ıe bolǵan aqyn dál bir jyl buryn óziniń aıtystan ketetinin málimdedi. 2015 jyly 21 qazanda Almaty oblysynyń ortalyǵy Taldyqorǵan qalasynda Súıinbaı Aronulynyń 200 jyldyq mereıtoıyna arnalǵan halyqaralyq aqyndar aıtysynda Balǵynbek Imashev osydan keıin aıtysqa shyǵýdy doǵaratynyn aıtty.
Rınat Zaıytov
Rınat batyryp aıtatyn, sonysymen halqyna súıikti aqyn. Bala jasynan tanylyp, talaı topty jarǵan Ol 29 jasynda, 2012 jyly Júrsin Ermanǵa «ókpelep» aıtystan «ketemin» dep málimdeme jasaǵan.
Rınatty «Aıtystan ketemin» degizgen daý Qazaqstan táýelsizdiginiń 20 jyldyǵyna oraılas «Táýelsiz eldiń tańy jaryq» degen taqyryppen 2011 jyly Jeltoqsannnyń 2-si men 4-i aralyǵynda Astanada ótken aıtys bolatyn. Rınat suhbattarynyń birinde «sahnaǵa shyǵamyn. Biraq aıtysqa emes. Júrsinniń aıtysyna emes» degen edi. Ol keıin Júrsin aǵasymen tatýlasty, aıtysqa da shyqty. Biraq 1-2 ret qana.
Shyndyǵynda ol aıtystan ketken joq, ketirdi deıtinder de bar. Anyǵyn kim bilsin, aqyndar aıtyspaı ketti me, aıtys bolmaı ketti me, álde «aıtys» ala jaryldy ma, ony tyńdarmany túsinbeı qalǵan bul kúnde. Bir anyǵy qazir dúbirli aıtys ta joq, óleń tógip júrgen Rınat ta joq. Biletinder ol telearnada deıdi.
Shyndyǵynda aıtystan kórinbeı júrgen aqyndar kóp, Aıbek Qalıev, Amanjol Áltaev sıaqty kezinde aıtys aýylynda at ozdyrǵan jigitter men Ásem Erejeqyzy, Aqmaral Leýbaeva, Marjan Esjanova, Sara Toqtamysqyzy, Qarlyǵash Áýbakirova sıaqty aqyn qyzdar da qazir sahnadan kórinbeıdi. Bular aıtyspaı júrgenimen halyq shaqyrsa baratyn aqyndar. Aıtys tańdap, keıbir aıtysqa kelmeı qoıatyn aqyndardy da halyq biledi.
Maqsat Bazarbaev
Ol jaqynda 40 jasqa toldy. Ónerdi Mýzartpen bastaǵan Maqsat 40-qa Mýzartsyz toldy. 4 jylyn Mýzartpen birge ótkizgen Maqsattyń ózindik qońyr daýysy bar. Tyńdaýshysy bar. Armanynda júrgen «Dúńgen qyzy» bar. Mýzarttan ketken soń Maqsat Bazarbaev sahnaǵa sırek shyqty. Ol jeke konsert berdi degendi de estimedik.
Ol ózi ándetetindeı Ásel atty qyzdy jar etken. Búginde Maqsat Bazarbaevtyń basty maqsaty - uldaryna úlgi bolý. Juldyzdy otbasy búginde Ańsar, Aıbar, Aıat esimdi úsh birdeı atqaminerdiń ata-anasy. Olar bıyl sáýir aıynda 3 uldyń artynan besigine qyz salyp, qýanyshqa bólengen bolatyn.
Baqaı toby
Bir kezde Baqaı «Kim kináli?» dep án aıtsa, jurt Baqaı kináli dep ázildeıtin. Baqaı tobynyń dáýreni 2004-2006 jyldary júrip turdy. Baqaı tobynyń múshesi Bek Sháriptiń aıtýynsha olar aıtqan «Kim kináli» áni bolǵan oqıǵanyń izimen jazylǵan.
"Bul – bolǵan oqıǵanyń izimen jazylǵan óleń. Sózin Aıjamal degen qyz jazǵan. Bir toıda bir jigit jylap turyp Aıjamalǵa basynan ótken osy oqıǵany aıtyp beripti. Ol úıine kele sala estigendegi áserimen bárin aq qaǵazǵa túsirgen. Aıjamal meniń synyptasymnyń ápkesi bolatyn. 11-synypta mýzykaǵa qyzyǵyp júrgenimdi bilip, dosym Aıjamaldyń óleń dápterin ákep berdi. Shynymdy aıtsam, bul dápter mende bes jyldaı sarǵaıyp jatty. Sol aralyqta Aıjamaldyń óleńderinen ana týraly, «Jańa jyl» degen ánder jazdym. Biraq osy «Kim kináliniń» tórt-bes paraqqa sozylǵan óleńin attap kete beretinmin. «Munyń bárinen qandaı án shyǵady?» dep, oqyp bitirmeı erinip qoıa salatynmyn. Uıqym kelmegen bir kúni oqyp shyǵyp edim, maǵan qatty áser etti. Syzyltyp aıtar án jazaıyn desem, óleń tarmaqtary jetpeıdi. Reppen jetkizbeseń basqa amal joq, sodan osy óleń úshin rep janryna kóship kettim" - deıdi Bek Shárip.
Biletinder Baqaı toby quramy ózgerip, qaıta sahnaǵa oralyp jatyr deıdi. Biraq ol báribir burynǵy Baqaı emes qoı.
Ánshiler týraly tizimdi jalǵaıtyn bolsaq, bul kúnde NN BEK, Alaman, Nurlan men Murat, Kaspı sıaqty toptar kórinbeı júr. Aqylbek Jemeneı, Erlan Malaev, Erlan Orynbasarov, Dınara Qyryqbaeva, Zarına Omarova sıaqty ánshiler de ónerden alys júrse kerek. Biri turmystyń qamymyen, biri bıznestiń qamymen, biri jasy kelip kórinbeı júrse kerek. Biz atamaǵan, saǵynyp júrgen óner adamyńyz kim? Siz atańyz, qadirmendi oqyrman!
Qarabýra Qultaı
