Qydyrma qonaq – qazaqtyń kóne jolynda, qonaq bolý saltynda kóp kezigetin qonaqtyń bir túri. Meıram-mereke, demalys kúnderi aýyl azamattary top-top bolyp, aýyl-aýylǵa, úı-úıge qydyrady, úlkenderge amandasady, arnaıy sálem beredi. Qazaq ony úıine kelgen qonaqtardy bizdi arnaıy izdedi, elep-eskerip, keldi dep qushaq jaıa qarsy alady, dámdi qujyryn dastarqanǵa jaıady. Ony qazaq kádesinde «qydyrma qonaq» dep ataıdy.

Qazaqtaǵy qydyrma qonaqtyń da ózindik máni, kisilik sáni bar. Olar jaı qydyryp, qaryn baqqaly, janyn saqtaǵaly júrgen joq. Qaıta aýyl-aýyldaǵy, úı-úıdegi kóńili jaqyn, nıeti bir, tileýi qabyl adamdarǵa júzdesý, sálemdesý, syrlasý, aýyrǵan-syrqaǵandary bolsa, kóńilin suraý, ólgen-jetkenderi bolsa, quran oqý, týys-týǵandaryna kóńil aıtý, jaqsy nıetpen tildesý, bereke birlikti arttyrý. Ol ǵana emes, tirlikte, az ómirde, sanaly ǵumyrda sapaly ómir súrý, kóńil taýyp, mándi-maǵynaly tirlik ótkizý bolyp tabylady. Áýeli aýyl-aýyldy, úı-úıdiń berekesin jalǵaıdy, bir-birine qurmetin kórsetedi, syı-sybaǵasyn jalǵaıdy, adamdyq qunyn, aryn, adamgershilik, kisilik keremetin bildiredi. «Qydyrma qonaqtan qyryq aýyz sóz qalady, úlgi-ónege, óshpes iz qalady» dep ony habar-oshar estýdiń de kilti etkeni beseneden belgili. Deni saý adamnyń qydyrǵanyna ne jetedi, oı-pikir aýysady, oıyn danalaıdy, sanasyn saralaıdy, tanymaǵanmen tanysady, jaqyny bolsa tabysady. Búkil aýyl berekemen, birlikpen qabysady. Qydyra júrip, úgit jasalady, ondaı jaqsylyqtan qandaı jamandyq asa alady. Qydyrma qonaqtyń qyry da, syry da osy bolmaq.

Bolat Bopaıuly Jota Qajy