Bas tabaq – qazaqtyń qonaq kútý, sybaǵa syılaý dástúrinde, ata saltynda úıge kisi, syıly qonaq, aýyl aqsaqaly kelgende, ne alystan óte qurmetti, qadirli qonaq kelgende, ne olardy arnaıy qonaqqa shaqyrǵanda aqsarbas qoıyn soıady. Qoı soıardan buryn tiri maldy esikten alyp kirip, tórde jaıǵasyp otyrǵan qonaqtarǵa basyn qaratyp turyp bata suraıdy. Qonaqtardyń jasy úlken syılysy bata beredi. Mysaly:

Áýeli qudaı ońdasyn,

Qyzyr bolsyn joldasyń,

Qyzyr bolsa joldasyń,

Ár páleden saqtasyn!

Ózen-sýdyń jaǵasyn, 

Amandyqpen qystatsyn!

Ulytaýdyń kóbisin,

Esendikpen jaılatsyn,

Óli-tiri árýaq,

Juma saıyn jebesin!

Mýdýlar bolyp jebesin!

Bulbul qonsyn basyńa,

Bereke bersin asyńa,

Tipti kelmeı ólmeńiz,

Luqpan hakim jasyna!

Sýǵa salǵan qaıyqtaı,

Edil menen Jaıyqtaı,

Qaıyryńyz kóp bolsyn!

Ketpes yrys,

Keń peıil bersin!

Asqa adaldyq,

Basqa amandyq bersin!

Bizge soıǵan qoıyńyz,

Jasap jatqan toıyńyz,

Tilegińiz qabyl bop,

Nurlana bersin oıyńyz.

Qozyǵa tolsyn kógeniń,

Tulpar bolsyn kóbeniń.

Tústi bolsyn jaılaýyń,  

Qutty bolsyn qystaýyń.

Qunarly bolsyn qudyǵyń,

Qaınarly bolsyn bastaýyń.

Arystandaı bolsyn aıbatyń,

Aıýdaı bolsyn qaıratyń,

Asqa tolsyn tabaǵyń,

Ashyq bolsyn qabaǵyń.

Aman bolsyn jan-jaǵyń!

Allahý  akbar!!

Bata aıaqtalǵan soń, maldy soıyp, etin asady, basyn úıitedi, ábden et bylqyp pisken soń ǵana tóre tabaqqa qoıdyń basyn, jambasyn, ortan jiligin, arqasyn, súmbe qabyrǵasyn, jaýyrynyn, beldemesin, kári jiligin, ishek-qarnyn, toq ishegin, júregin, búıregin, eki sıraǵyn túgel tabaqqa salyp, qonaqqa bas tabaq etip tartady. Muny qazaq bas kádesinde «bas tabaq» dep ataıdy. 

Bolat Bopaıuly Jota Qajy