Bas Prokýror Jaqyp Asanovtyń tóraǵalyq etýimen Zańdylyqty, quqyqtyq tártipti jáne qylmysqa qarsy kúresti qamtamasyz etý jónindegi úılestirý keńesiniń otyrysy ótti dep habarlaıdy Bas prokýratýranyń baspasóz qyzmeti.

2016 jyl boıynsha quqyq qorǵaý organdary jeke quramynyń sybaılas jemqorlyqqa qarsy zańnama men Memlekettik qyzmetshilerdiń ádep kodeksin saqtaýy máseleleri talqylandy.

Quqyq qorǵaý organdary sybaılas jemqorlyqqa bárinen beıim kúıinde qalyp otyr. Jyl saıyn qyzmetkerler 200 sybaılas jemqorlyq qylmystaryn jasaıdy.

Qańtardan bastap Ádep kodeksi qoldanysqa engiziledi, ol qoǵamnyń senimin nyǵaıtýǵa jáne ádepten tys minez-qulyqtyń aldyn alýǵa baǵyttalǵan. Osy ýaqyt ishinde 750-den astam qyzmetker jaǵymsyz sebeptermen jumystan bosatylǵan (qyzmetten tys baılanystar ornatqany, mas kúıinde avtokólik basqarǵany, qyzmettik tártipti buzǵany, ádepten tys minez kórsetkeni úshin).

Quqyq qorǵaý organdary júıesindegi sybaılas jemqorlyqqa qarsy zańnamanyń oryndalýy týraly Sybaılas jemqorlyqqa qarsy is-qımyl ulttyq búrosynyń basshysy Talǵan Tatýbaev pen Bas prokýratýra Kadr jumystary departamentiniń bastyǵy Aleksandr Ogaı baıandady.

Ultbúro basqa quqyq qorǵaý organdarymen birlesip ázirlengen Jol kartasynyń tanystyrylymyn júrgizdi, ol sybaılas jemqorlyqqa qarsy is-qımyl men onyń aldyn alýdyń tıimdi júıesin qurýdy, óz qatarlarynda ádep standarttaryn saqtaýdy kózdeıdi.

Keńes qorytyndysy boıynsha Jol kartasy maquldandy.