Lý Shún (Qytaı)

　Qul muńyn shaǵatyn adam izdep júrýshi edi, oǵan keregi osy ǵana edi, qolynan keleri de osy edi. Bir kúni aqyldy adamǵa kezdese ketti
　　− myrza, - dedi ol qaıǵyrǵan beınemen, kóz jasy bir syzyq bolyp kóziniń quıryǵynan sorǵalap ketti, − óziń bilesiń, meniń kórgen kúnim qurysyn, kúnine bir ýaqyt nár tatýymnyń ózi de naǵaıbyl. Bul bir ýaqyttyq tamaq aq júgeriniń kebegi ǵana. adam tur ǵoı, dońyz men ıt te tatpaıdy. Onyń ústine túıeniń kózindeı pıalamen ǵana beredi. 
　　−Aıanyshty - aq eken, - dedi aqyldy adam da qaıǵyrǵan keıippen. 
　　− Báse, - dep qýanyp qaldy qul, - biráq jumystan kún - tún ámir tappaımyn, erte turyp, sý ákelip, keshke tamaq pysyramyn, túske deıin bazarǵa sabylyp, túni boıy un tartamyn. Ashyq kúni kirin jýyp, jańbyr jaýsa tutam kúndik, qysta gaz oshaqqa ot jaǵamyn, jazda jelpýish jelpımin. Tún ortasynda sańyraýqulaq pysyryp, qumar oınaǵan qojaıynymdy kútemin, býhgalterden aqsha alǵandy qoıyp, ara - tura qamshy da jeımin.
　　− Pah, pah, - dep kúrsinip qoıdy aqyldy adam, jas shyǵatyn qusap, kóziniń kireýkesi ántek qyzaryp turdy. 
　　− Myrza, bóıtip tóze alatyn emespin. qalaıda basqa bir lajyn tabýym qajet bolyp tur. Biraq ne shara bar deshi?... 
　　− Menińshe, túbinde bir jaqsylyq kórip qalarsyń... 
　　− Ras pa?! ámse solaı bolsa eken. Biraq, myrza, ózińe sherimdi shaqtym ári tilektestigiń men jubatýyńdy estip, edáýir keńip qaldym. Álemde ádilet ataýlynyń áli de qurymaǵandyǵy osy ǵoı. 
　　Biraq birneshe kún ótpeı jatyp, ol taǵy da alaqyzyp, muńyn shaǵatyn adam izdep shyqty. 
　　− Myrza, - dedi kóz jasyn aǵyzyp turyp, −óziń bilesiń, meniń jatar ornym dońyz qoradan da beter. Qojaıyn meni adam eken demeıdi. Óziniń kándegin menen áldeneshe on myń ese artyq kóredi. 
　　− Kók soqqan neme, - dep álgi adam aqyryp qalǵanda, qul shoshyp ketti. Bul adam aqymaq edi. 
　　− Myrza, men tozyǵy jetken aıadaı jalǵyz bólmeli úıde turamyn, syzy súıekten ótedi, kórdeı tas qarańǵy, qandala degenińiz órip júredi. Kóz iline bere shaqqanda, aıyzyńdy qandyrady. Kúlimsi ıisi qolqańdy qabady. Tórt qabyrǵasynda birde - bir tereze joq. 
　　− Qojaıynyńa aıtyp, tereze ashqyzyp alsań bolmas pa edi? 
　　− Onda qaıtyp bolady?... 
　　− Onda meni ertip barshy, kóreıin. 
　　Aqymaq qulǵa erip, úıdiń syrtyna keldi de, tamdy tese bastady. 
　　− Myrza, bul ne qylǵanyń? - dedi ol shoshynǵan únmen. 
　　− Saǵan tereze ashyp bereıin dep jatyrmyn. 
　　− Bolmaıdy, qojaıyn ursady. 
　　− Onda jumysyń ne! - dep ol alǵan betinen qaıtpady. 
　　− Attanyńdar! ury úıdi talqandap jatyr. Shapshań kelińder, keshikseńder, tesip te jiberedi. 
　　Ol ókire jylap, jerde dóńbekship jatty. Bir top malaı shyǵyp aqymaqty qýyp saldy. Aıǵaı - shýdy estip naıqala basyp qojaıyn jetti. 
　　− Bir ury úıdi shaqqaly jatyr edi, ózim bas bolyp, attan saldym, bárimiz birigip, qýyp jiberdik, - dedi ol ıbaǵatty ári jeńgen pishinmen. 
　　− Jaraıdy ekensiń, - dep qoıdy qojaıyn ony maqtap. 
　　Bul kúni ony jubatýǵa tolyp jatqan adam keldi, ishinde aqyldy adam da bar edi. 
　　− Myrza, bul joly eńbek kórsetip qojaıynnan maqtaý aldym. Ana joly, túbinde, bir jaqsylyq kóresiń dep ediń ǵoı. kóregen - aq ekensiń, - dedi ol úlken úmit kútken adamdaı qýanyshty beınemen. 
　　− Mine, solaı emes pe..., - dedi aqyldy adam onyń qýanyshyna ortaqtasqan keıippen.

aýdarǵan: Ábdildabek Aqyshtaı