Qazaqstandyq saıasattanýshy «Qazaqstannan baıyrǵy orys jerlerin qaıtaryp alý» týraly Reseı depýtaty Pavel Shperovtiń sózine qatysty pikir bildirdi,  dep habarlaıdy tengrinews.kz.

Buǵan deıin de Reseı memlekettik Dýmasynyń depýtaty Pavel Shperovtyń sózine qatysty Syrtqy ister mınıstrligi «pozısıasyn» bildirgen edi. Depýtattyń aryzynda Qazaqstannyń shekarasyna baılanysty narazylyq talaptary kórsetilgen.

«Osy syndy kez kelgen áńgimelerge, meıli, ol qaıda aıtylsyn, jol bermeý kerek. Olar eń aldymen bizdiń naqty pozısıamyzdy alǵa tartýy kerek. Men syrtqy ister mınıstrligi bul másele boıynsha pikir bildirgenin durys sanaımyn. Mundaı áńgimelerdi boldyrmaý kerek», – dep málimdedi Erlan Qarın Reseı depýtatynyń sózine pikir bildirip.

«Bul Syrtqy ister mınıstrligi men resmı tulǵalardyń ǵana pikirimen shektelip qalmaýy kerek. Men buǵan qatysty áreketimiz jan-jaqty bolýy kerek dep oılaımyn. Sonymen qosa, mysaly, «jaǵymsyz tulǵalardy» anyqtap, olarǵa elimizge kelýge tyıym salý kerek jáne taǵy basqalary. Tek pikir bildirip qana shektelip qalmaý kerek. Eki jaqtyń keńesimen joqqa shyǵarýyn, túsinikteme berýin talap etýimiz kerek, bul joldar arqyly ǵana emes jáne basqa da joldarmen», – dep sanaıdy qazaqstandyq saıasattanýshy.

Erlan Qarın Qazaqstannyń jerleri týrasynda aıtylǵan sózder jaı ǵana táýelsiz sarapshynyń ǵana pikiri emes ekenin alǵa tartyp otyr.

«Men ózim jeke basym saıtta bul partıanyń, atalmysh tulǵanyń bergen jaýabyn kórdim. Jáne berilgen pikirde onyń óz oıyn ózgertkeni kórinip turǵan joq. Ol buryn aıtqanyn qaıtalap otyr. Keıbir reseılik qyzmetkerler shekara, aýmaq taqyrybyn qozǵaý – múldem bos áńgime ekenin túsiný kerek. Bul – talqylaýǵa jatpaıtyn dúnıe. Sondyqtan barlyǵy mundaı taqyryptardyń keleshegi joqtyǵyn túsinýi qajet», – dep pikir bildirdi Erlan Qarın.

Saıasattanýshynyń sózinshe, mundaı pikirler arqyly avtorlar óz-ózderiniń bedelin túsiredi.

«Mundaı pikirlerdi qandaı da bir saıası tuǵyrnamasy qalyptaspaǵan, qandaı da bir baǵyty joq saıası elıtanyń «uranshyl» toptyń adamdary aıtady», – dep málimdedi saıasattanýshy.

Aıtqandaryn saraptaı kele, Erlan Qarın mundaı jaǵdaılar Qazaqstan men Reseı arasyndaǵy eki eldiń qarym-qatynasyna qandaı yqpaly bar ekenin aıtty.

«Eki eldiń qarym-qatynasy yntymaqtastyqqa qurylǵan. Halyqaralyq saıasatta bolsyn, aımaqtyq áriptestik bolsyn, barlyq aktýaldy baǵytta tyǵyz qarym-qatynas ornatyp, birge jumys jasaıdy. Kóptegen baǵdarlamalar iske asyrylyp jatyr. Bizdiń qarym-qatynasymyzda túsinbeýshilik pen másele joq. Aıtpaqshy, mundaı «toptyń» adamdary osy jaǵyn da uǵynýy kerek. Árıne, olar kóp zıan tıgize qoımaıdy, alaıda olar óz eliniń múddesine qarsy jumys jasap otyrǵandaryn túsinýleri kerek», – dep qorytyndylady saıasattanýshy.