Búgin OQO-nyń Túlkibas aýdanynda Jambyl oblysyndaǵy qar kóshkininen qaza tapqan áskerı qyzmetker Ámir Aralbaevty jer qoınyna tapsyrdy.
Nur.kz habarlaǵandaı, Daýan aýylyndaǵy marqumnyń jerleý rásimine onyń aýyldastary men polkovnık, "Ońtústik" ınjenerlik qyzmetiniń basshysy Murat Júsipov kelgen.
"Bul bizdiń kiná emes, bul jazym. Egerler shekarany kúzetedi. Olar áskerı mindetin qaı jerde óteıtinin túsine otyryp, barǵan. Bul áskerı bólimsheler udaıy áskerı daıyndyq ústinde bolady. Sondyqtan osyndaı jaǵdaıda qaza tapty. Óńirlik qolbasshy men Qorǵanys mınıstrligi atynan qaıǵyryp kóńil aıtamyn", - dedi sóz alǵan Murat Júsipov.
Jabyl oblysynda áskerı jattyǵý kezinde qar kóshkininen jeti áskerı qaza taýyp, taǵy 16 adam zardap shekkeni habarlanǵan bolatyn. Jambyl oblysynda Kóksaı shatqalynda 91678 áskerı bóliminiń josparly áskerı daıyndyq barysynda oılamaǵan jerden qar kóshkini júrgen.
Tengrinews.kz jańalyqtarynyń jazýynsha, 17 aqpanda saǵat 13.15-te Jambyl oblysynyń TJD kezekshi bólimine qoryqshy Álimbekovten Jýaly aýdany Alataý aýylynan 35-40 shaqyrym jerde (Kóksaı shatqalynda) qar kóshkini júrip, 23 áskerıdiń qar astynda qalǵany týraly habarlama kelip túsken.
91678 áskerı bóliminiń arnaıy taýly-egerlik rotasy Qazaqstan Respýblıkasynyń jalǵyz Qarýly kúshi bolǵan. «Áskerılerge óz kúshterin bilip, densaýlyqtaryna zıan keltirmes úshin beıimdelý qajet. Árıne, endi ǵana kelgen áskerılerde biraz qıyndyqtar týady. Biz bastapqyda olardy taýǵa jibermeımiz. Olar medısınalyq tekseristerden ótip, normatıvterdi tapsyryp bolǵan soń ǵana taýly aımaqtarǵa shyǵady. Sarbazdarǵa beıimdelý úshin bir aı jetedi. Bastapqyda olar 3 shaqyrym júredi, keıin 5, 10 shaqyrymǵa deıin barady. Barlyǵy fızıkalyq turǵydaǵy daıyndyqtarǵa baılanysty. Ol qandaı sportshy bolmasyn, birden taýǵa shyǵa almaıdy», - deıdi áskerı bólim týraly buryn basqarǵan aǵa leıtenant Bek Qambarbekuly.
Kóshkinnen keıin 91678 áskerı bóliminiń qyzmetkerleri men jedel járdem qyzmeti (barlyǵy 60 adam) oqıǵa ornynda izdestirý-qutqarý jumystary júrgizip jatqany habarlandy. Taǵy 75 adam, ıaǵnı qutqarý qyzmetiniń jeke quramy jáne jeti arnaıy tehnıka Taraz qalasynan jóneltilgen. Qar kóshkini saldarynan qaza tapqan jeti adamnyń máıiti tabylǵan.
Jambyl oblysy ákiminiń baspasóz qyzmetiniń habarlaýynsha qaza tapqan áskerılerdiń aty-jónderi:
kishi serjant M.T. Qydyrbaev, 1991 jylǵy,
kishi serjant A.K. Erisbaev, 1992 jylǵy,
qatardaǵy T.K. Kenesov, 1993 jylǵy,
kishi serjant A.J. Aralbaev, 1988 jylǵy,
qatardaǵy N.K. Sháken, 1995 jylǵy,
efreıtor M.B. Turysmaǵanbetov,1991 jylǵy,
aǵa leıtenant A.K. Moshabaev, 1991 jylǵy.
Internette atalǵan áskerı bólimniń ótken naýryz merekesinde túsirilgen áserli rolıgi paıda boldy.
Aıta ketsek, Premer-mınıstr Baqytjan Saǵyntaevtyń Jambyl oblysyndaǵy qaıǵyly oqıǵany tergeý barysyn óz baqylaýyna alatyny habarlanǵan bolatyn. Aıta keteıik, qaza tapqandarmen qoshtasý rásimi áskerı bólimde ótedi.
Qazaqstandaǵy qaza tapqan áskerılerdiń otbasyna jáne Qazaqstan prezıdentine Ózbekstan Prezıdenti Shavkat Mırzıaev kóńil aıtty.
