Almaty ákimi Baýyrjan Baıbek halyq aldynda esep berip jatyr dep habarlaıdy «Qamshy» portaly.
Almaty ótken jyly óziniń áleýmettik-ekonomıkalyq damýy qarqynyn saqtap qaldy. Aldyn ala boljam boıynsha ekonomıkalyq ósim eń keminde 2,5%- dy quraıdy. 25 myń turaqty jumys orny ashyldy. Búgin 2016 jylǵy Almaty qalasynyń áleýmettik-ekonomıkalyq damýyn qorytyndylaǵan qala ákimi Baýyrjan Baıbek osylaı málim etti.
«Infraqurylymdyq damý nazardan tys qalǵan joq. «Nurly jol» baǵdarlamasynyń sheńberinde sáýletti ǵımarattar, mádenıet, densaýlyq saqtaý jáne bilim berý nysandary, balabaqshalar men turǵyn úıler boı kóterip, halyqtyń ıgiligine jaratylýda. Jalpy, qala ınfraqurylymyn jańartý jumystary júrgizilip, memlekettik baǵdarlamalar tıimdi júzege asyryldy. Osy jumystar byltyrǵy jyly barsha almatylyqtar bolyp birge qabyldaǵan, 5 qaǵıdaǵa negizdelgen «Almaty-2020» damý baǵdarlamasyn basshylyqqa ala otyryp júrgizilýde. Olardy taǵy bir ret atap ótsem, birinshiden, árbir adamǵa qamqorlyq; ekinshiden, úzdik tájirıbe negizinde tıimdi jáne únemdi sheshimder qabyldaý; úshinshiden, ekonomıkalyq draıver retinde bıznesti yntalandyrý; tórtinshiden, azamattyq qoǵamdy barynsha tartý; jáne besinshiden, jergilikti basqarý organdarynyń eseptiligi men ashyqtyǵy. Jalpy, tek elimizde ǵana emes, barsha álemde oryn alǵan qarjylyq-ekonomıkalyq qıynshylyqtarǵa qaramastan ótken jyly atqarylǵan, aýyz toltyryp aıtar ister barshylyq. Byltyrǵy jylǵy esepten birer málimet keltirsek, dál osy zalda maǵan qatysýshylar tarapynan 32 suraq qoıylǵan bolatyn. Onyń 24-i (75%) zań sheńberinde óz sheshimin tapty. Al 8 uzaq merzimdi másele boıynsha jumystar aǵymdaǵy jyly aıaqtalatyn bolady. Ótken aptada 8 aýdannyń ákimi qala turǵyndary aldynda árqaısysy birneshe dúrkin kezdesý ótkizip jyldyq esep berdi. Jalpy jurtshylyqpen 44 kezdesý ótip, onda 500-den astam suraq qoıylǵan. Jalpy sany 15 myńǵa jýyq adam qatysqan bul kezdesýlerde qoıylǵan suraqtardyń basym bóligine sol jerde jaýap berilgen bolsa, qalalyq dárejede qarastyrýdy qajet etetin birqatar máselelerdi men óz baqylaýyma aldym. Olardyń barlyǵy da óziniń naqty jaýabyn tabatyn bolady», - dedi Baýyrjan Baıbek. Sonymen qatar, ákim aldaǵy aptaǵa josparlanǵan qalalyq máslıhattyń otyrysyna kóterilgen máselelerge sáıkes ózgertilgen, tolyqtyrylǵan búdjet jobasy engiziletinin aıtty. «Saıyp kelgende barlyǵymyzdyń múddemiz toǵysar bir arna - ol Almatydaı alyp shahardyń turmys-tirshiligi, búgini men erteńi. Osy jolda birlese, jumyla jumys jasaıyq», - dedi qala basshysy.
Sondaı-aq Almaty ákimi úsh tildi oqytý týraly da aıtty. «Aǵylshyn ne úshin kerek? Úsh tildi degenimiz qarapaıym azamattardy oılaý degen sóz. Qazaq árqashan bilimge talpynǵan. Uly Abaı «orys tilin oqy» degen. Ol tek orys tilin aıtqan joq, sol kezde orys tili qazirgi aǵylshyn tili sıaqty bolǵan. Abaı orys tilin úıren dep shet tilin úırenýdi meńzegen», - dedi ol óz sózinde.
Sondaı-aq ekonomıkalyq áleýet týraly aıtqan Baýyrjan Qydyrǵalıuly kredıt alyp toı jasaıtyn qazaqtardy da synady. Sondaı-aq,
Qala basshysynyń aıtýynsha, Almaty halqynyń sany 1,5 esege ósse, kólikter sany toǵyz ese ósken.
"Keńes kezinde adam kólik satyp alsa, baı deıtin, al satyp almasa, jaǵdaıy joq dep esepteletin. Bizde osy paradıgma áli de bar. Azamattar kóliktiń abyroı emes ekenin túsinbeıdi, bul qozǵalys quraly. Keıde metromen júrý yńǵaıly, arzan ári tıimdi. Keshki ýaqytta kólikpen júrýge bolady. Osyny zertteý kórsetip otyr, taıaýda reformany halyqqa tanystyryp, talqylap, ótkizemiz. Kólikter keptelis qana týǵyzbaıdy, sonymen qatar, zıandy zattardyń 80 paıyzyn shyǵarady", - dedi Baýyrjan Baıbek halyqqa esep berý kezdesýinde.
Baıbektiń aıtýynsha almatylyqtar jyl saıyn 500 mıllıon dollar qarajatqa shetelge baryp emdeledi. Osynshama qarajattyń shetelge ketýiniń aldyn alý maqsatynda qalanyń medısınalyq bazasy jetildirilip jatyr. Atap aıtqanda Ýnıversıada aıasynda 40 jedel járdem kóligi alynǵan. Naýryzbaı aýdanynda jańa polıklınıka salynyp jatyr.
Aqshanyń aspannan túsip jatqan joq ekenin eske salǵan Baýyrjan Baıbek Aıaq qoly barlardy jumys isteýge shaqyrdy.
Ol esep berý barysynda jumyssyzdyqty sheshýdiń bir joly týrızm salasyn damytý dep atady.
«Jumyssyzdyqty sheshý úshin týrızm salasyn qarqyndy damytý kerek. Kóptegen jastar JOO-da oqýǵa múmkindikteri joq bolǵandyqtan, olardyń barlyǵy týrızm salasynda qyzmet etýge tıis. Mysaly Megadaǵy batýt 84 adamdy jumyspen qamtýda. Bul da bir týrızm bólshegi. Alaıda qoǵamda týrızmdi damytpaıyq degen oıdaǵy jandar da bar. Biraq biz Túrkıa, Shveısarıa syndy elder óz ekonomıkasyn týrızm arqyly kóterip otyrǵanyn eskerýimiz kerek. Álemdik statısıka boıynsha da týrızm ekonomıkalyq resýrsta 3 oryn alady. Eger qazir týrızmdi damytpasaq bolashaqta jastar arasyndaǵy jumyssyzdyq máselesi ýshyǵa túspek. Ár sheteldik azamat Qazaqstanǵa týrıs bolyp kelgende orta eseppen 1 kúnde 245 dollar qarajat qaldyrady» dedi.
Baıbek halyqqa esebinde Almatyny «Jastar qalasy» dep atady.
«Ardaqty Almatylyqtar, Azattyqtyń altyn besigi – Almaty! Qashannan da otanymyzdyń ekonomıkalyq qozǵaýshy kúshi, elimizdiń rýhanı ordasy, qalamyzdyń ekonomıkalyq jaǵdaıy almatylyqtar úshin ǵana emes barsha almatylyqtar úshin mańyzǵa ıe!», - dep aıaqtady óz sózin
