Almaty q. prokýratýrasy jáne İİM Qylmystyq-atqarý júıesi komıtetimen birlesip, advokat J.Balǵabaevanyń tergeý-qamaýyndaǵy Janbolat Mamaıǵa qater tóndirýi jáne qysym kórsetýi týraly BAQ-ta jarıalanǵan shaǵymyna qatysty tergeý júrgizildi. Bul týraly QR İİM Qylmystyq-atqarý júıesiniń baspasóz qyzmeti habarlady.
"Janbolat Mamaıdan jaýap alý barysynda ol aýyzsha jáne jazbasha túrde tergeý ızolátorynyń ákimshiligine jáne kamerada ustaýda otyrǵan ózge sottalǵandarǵa eshqandaı narazylyǵy joq ekenin jetkizdi.
Tergeý ızolátoryndaǵy medısına bóliminiń mamany da J.Mamaıdyń denesine zaqym kelmegenin, dene jaraqatynyń joqtyǵyn anyqtady. Atalǵan tergeý-qamaýyndaǵy medısınalyq saraptamadan ótýden bas tartqan.
Osylaısha J.Mamaıdyń ómirine qaýip tóndi jáne oǵan qysym kórsetildi degen faktisi rastalǵan joq.
Atalǵan oqıǵanyń aınalasyndaǵy daý-damaıdy ýshyqtarmaý úshin Mamaı tergeý ızolátoryndaǵy jalpy kameraǵa aýystyryldy.
Sonymen qatar, keıbir adamdar qaýesetter men joramaldardy negizge alyp, «J.Mamaıdyń ómirine qaýip tóndi jáne oǵan qysym kórsetildi» degen jalǵan aqparatty shyǵaryp otyr.
Osyǵan baılanysty BAQ ókilderinen osyǵan uqsas aqparatty basýdan buryn nemese silteme jasamaı turyp resmı túsindirme men rastaýdy alý úshin İİM QAJ komıtetine júginýdi suraıdy.
Sondaı-aq Qazaqstan Respýblıkasy Qylmystyq kodeksiniń 242-1-baby 3-tarmaǵyna sáıkes jalǵan málimet taratý belgili bir laýazymdardy atqarý nemese belgili bir qyzmetpen aınalysý quqyǵynan úsh jylǵa deıingi merzimge aıyra otyryp, bes júz aılyq eseptik kórsetkishke deıingi mólsherde aıyppul salý túrindegi jazaǵa alyp keletinin eskertemiz", - delingen habarlamada.
Aıta keter bolsaq, "Trıbýna. Saıası qalam" gazetiniń bas redaktory Janbolat Mamaı 10 aqpanda qamaýǵa alyndy. Oǵan quzyrly organdar qýǵyndaǵy eks bankır Ábilázovpen baılanysy bar degen aıyp taqty. Al, qoǵamdaǵy áleýmettik máselelerde, saıası úderiste belsene boı kórsetip júrgen Janbolat Mamaı atalǵan aıyppen kelispeıdi. Sondaı-aq bir top ultshyl azamattar, qoǵam belsendileri onyń negizsiz aıyptaýǵa ushyrap otyrǵanyna senimdi.
