Reseı Prezıdenti Vladımır Pýtın Qazaqstan Prezıdenti Nursultan Nazarbaevqa Sırıadaǵy jaǵdaıdy retteýge qatysty kelissózderdi uıymdastyrǵany úshin alǵys aıtty. Bul týraly ol Almatyda Prezıdent rezıdensıasynda ótip jatqan kezdesý barysynda aıtty, - dep habarlaıdy Tengrinews.kz.
"Men bizdiń kezdesýimizdi Astanadaǵy Sırıaǵa qatysty kelissózderdi uıymdastyrǵanyńyz úshin alǵys aıtýmen bastaǵym keledi. Men qazaqstandyq taraptyń osy kelissózderge jaqsy áser etkenin bilemin. Sizdiń jeke ózińizdiń osy is-sharaǵa qatysyp, delegasıa qatysýshylarymen jumys istegenińizdi de bilemin. Osy iske qatysýyńyzdyń arqasynda kezdesýler sátti ótti. Kelissózder osyǵan deıin sátti aıaqtalǵan emes. Sırıadaǵy soǵysty toqtatýdy baqylaýǵa qatysty mehanızm quryldy. Bul degenimiz biz úshin eń bastysy, ıaǵnı, bul Jenevada kelissózderdi jalǵastyrýǵa múmkindik berdi degen sóz", - dedi Vladımır Pýtın.
Qazaqstan jáne Reseı prezıdentteri Nursultan Nazarbaev pen Vladımır Pýtınniń kezdesýi Almatyda Prezıdenttiń rezıdensıasynda ótip jatyr. Kelissózder barysynda ekijaqty yntymaqtastyq máseleleri, sondaı-aq, óńirdegi jáne halyqaralyq kún tártibindegi máseleler talqylanyp jatyr. Kreml saıtynyń málimetinshe, Nursultan Nazarbaev pen Vladımır Pýtınniń kezdesýi barysynda eki el arasyndaǵy saýda-eknomıkalyq jáne mádenı-gýmanıtarlyq salalardaǵy, energetıka jáne ǵarysh, sonymen qatar, halyqaralyq kún tártibindegi negizgi taqyryptar talqylanady. Eki el kóshbasshylary eýrazıalyq birlestiktiń ári qaraı damýyna baılanysty máselelerdi qozǵaıdy.
Eske sala keteıik, keshe, 26 aqpanda Nursultan Nazarbaev pen Vladımır Pýtın Almatyda beıresmı kezdesý ótkizgen bolatyn. Memleketter basshylary jeksenbini Almaty mańyndaǵy taý-shańǵy saıajaıynda ótkizgen edi.
