Elimizde tuńǵysh ret sańyraýlardyń estý qabiletin qalpyna keltiretin ota jasaldy. Sonyń arqasynda týǵanynan naýqasqa shaldyqqan bozbala dertinen aıyqty, dep habarlaıdy Eýrazıa birinshi arnasy.
Mundaı operasıalardy Amerıka men eýropa mamandary 50 jyldan beri qoldanyp keledi.
Endi jańa tehnologıanyń arqasynda kereń bolyp týylǵan 800-den astam balaǵa alǵash ret ata-anasynyń daýysyn, jyly lebizin estý baqyty buıyrmaq.
17 jastaǵy Ramazan áli kúnge deıin ata-anasynyń daýysyn estimegen. Týa bitti naýqasqa shaldyqqandyqtan jaqyndarymen tek ymdap qana sóılesedi. Alaıda, endi bozbalanyń taǵdyry túbegeıli ózgerýi múmkin.
«Túrkistan qalasynan kelip otyrmyz. Shaqyrtý boıynsha 3 jyldan beri osynda kelip qaralyp jatyrmyz. Balanyń qulaǵynyń týylǵannan osyndaı. Sony emdetýge, qulaǵyn jaqsy estitýge kelip otyrmyz» — Ramazannyń ákesi Ǵafýr Jorabaıuly.
Mamandardyń aıtýynsha elimizde mundaı otaǵa muqtaj jandar jeterlik. Onyń ishinde balalar da bar.
«Elimizde qulaǵynda kemistigi bar 800-den astam bala bar. Onyń bireýiniń jasy 17-de. Olardyń azdaǵan bóligi ǵana osy máseleni kóterip dabyl qaǵady» — deıdi Aýrýhananyń ortalyq meńgerýshisi Aıgýl Medeýlova.
Estý qabileti nashar naýqastardyń qulaǵynyń artyndaǵy súıekke arnaıy ımplantant bekitiledi. Ol dybystardy mıǵa jetkizý qyzmetin atqarady. Mundaı ota elimizde tuńǵysh ret Ramazanǵa jasalýda. Sheberlik synybyn ótkizý úshin Golandıadan dáriger maman shaqyrtylǵan.
«Implantanttyń artyqshylyqtary kóp. Qaýipsiz ári ota bar bolǵany 30 mınýtqa sozylady. Hırýrgtar tez úırenip alady. Sonymen qatar ımplantant shaǵyn bolǵandyqtan kórinbeıdi. Ári naýqas osy ýaqytqa deıin estimeı kelgen dybystardy estý múmkindigine ıe bolady» — deıdi hırýrg Ian Leder.
Bul aýrýhana naýqas balalarǵa tolyqqandy ómir súrýge alǵash ret múmkindik syılap otyrǵan joq. Qańtar aıynda biz úsh jasar Aıana Rahat taǵdyry týraly aıtqan bolatynbyz. Búldirshin sóıleýge múmkindik bermeıtin sırek kezdesetin naýqasqa shaldyqqan. Sol kezde dárigerler kómektese alatyndaryn málimdegen bolatyn.
«Naýryz aıynda biz shet eldik mamandardyń qatysýymen taǵy bir sheberlik synybyn ótkizýdi josparlap otyrmyz. Naýqasty lazerdiń kómegimen emdeýge bolady» — deıdi Aýrýhananyń ortalyq meńgerýshisi Aıgýl Medeýlova.
Ramazanǵa jasalǵan operasıa sátti aıaqtaldy. Bir aıdan keıin ol tolyǵymen saýyǵyp ketedi. Mundaı otanyń quny shamamen 3 mıllıon teńge turady. Qazir dárigerler emniń bul túrin tegin medısınalyq qyzmet tizimine qosýdy kózdeıdi. Eger densaýlyq saqtaý mınıstrligi maquldaıtyn bolsa, qulaǵynda kemistigi bar balalarǵa ata-nasynyń daýysyn esý múmkindigi týady.
