Semeıde úısizderdiń qataryna qosylǵan 67 jastaǵy Roza ájeı áldebir belgisiz kúshtiń jeteginde júrgenin aıtady. Aıtýynsha, ol jas kezinde jergilikti áskerı gospıtálde bilikti maman bolǵan dep habarlaıdy NUR.KZ portaly.

Taǵdyrdyń teperishin kóp kórgen jalǵyzbasty keıýana adamdarmen kóńili túskende ǵana tildesedi.

«Men adamdarǵa senbeımin. Olar aldap ketedi. Talaı opyq jegenmin. Ózim, adam qalpyna túskim keledi. Biraq ol múmkin emes. Beıimdeý ortalyǵynda da boldym. Qandaı da bir kúsh dalaǵa jetelep ketti. Mysaly, mine bala arqalaǵan azamat qasymda júr. Sol meni «Roza, Roza» dep shaqyra beredi. Al qoqys jáshigin nemese jylý qazandyqtaryna jaqyndasam ursady. "Ket" dep aıǵaılaıdy», - deıdi keıýana.

Roza ájeı qystyń qaharly kúnderi kópqabatty úılerdiń podezderin panalaıdy eken. Tipti, ash qursaq qalsa da jurtqa alaqan jaıyp, qoqys jáshigin aqtarmaǵan. Keıbir turǵyndardyń bergen tamaǵyn da talǵap ishedi.

«Meniń kóshede júrgenime 9 jyldaı ýaqyt boldy. Osy jyldar arasynda toıyp tamaq ishken emespin. Asqananyń ózi aqshammen barsamda maǵan bermeıdi. Ústimniń bári taza. Isin shyǵarmaı jýyp otyramyn. Qazir, jazdyń kelgenin asyǵa kútip júrmin. Óıtkeni, kirimdi eki kúnniń birinde Ertis ózenine sháıip alamyn», - deıdi Roza ájeı.

Áldebir kúshtiń jeteginde ketken áıeldiń qolyna ustaǵan sómkesi kıim-keshekke toly. Ózin jetektep júretin belgisiz azamat ony kirletpeı jýyp otyrýdy da qadaǵalaıdy eken. Al keıýana bilikti maman retinde alǵan baspanasy men qujattarynyń qaıda qalǵanyn bilmeıdi.

«Bizde úı bolǵan. Ákem bárimiz turǵanbyz. Qolymda keńestik dáýirdiń qyzyl pasporty júretin. Onyń bárin joǵaltyp aldym. Baspanamnyń naqty qaı jerde ekenin esime túsire almaı qoıdym. Oılana bastasam, álgi meni ertip júretin azamat shatastyryp jiberedi. «Júr- júr» dep aıǵaılaıdy.  Odan qalsa, qolyndaǵy bala jylaıdy, sony jubatamyn», - dedi Roza.

Rozanyń sózine sensek, elimizde  birde bir týysqany joq. Ata-anasy kezinde Ýkraınadan jer aýyp kelgen. Al ózi zeınetaqy almaıdy. Onyń rásimdeýge jyny yryq bermeıdi eken.